ބޫސްޓަރ ޑޯޒް ޖެހި މީހުންގެ އަދަދު 14،000ށް އަރައިފި
ވެކްސިން ފުރިހަމަ ކުރި މީހުންގެ އަދަދު ވަނީ 364،402ށް އަރާފައި
ކޮވިޑް-19 ވެކްސިން ޖެހުން
ރާއްޖޭގައި ކޮވިޑް-19 ބޫސްޓަރ ޑޯޒް ފުރިހަމަކުރި މީހުންގެ އަދަދު 14،157ށް އަރައިފިއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ)ން އެންމެ ފަހުން އާންމުކޮށްފައިވާ ތަފާސް ހިސާބުތަކަށް ބަލާއިރު ބުރާސްފަތި ދުވަހު ބޫސްޓަރ ޑޯޒް ޖަހާފައިވަނީ 1310 މީހުންނެވެ. އެއީ މާލެ ސަރަހައްދުން 513 މީހުންނާއި އަތޮޅުތަކުން 797 މީހުންނެވެ.
މީގެއިތުރުން ބުރާސްފަތި ވެކްސިންގެ ފުރަތަމަ ޑޯޒް 72 މީހުން ވަނީ ޖަހާފައެވެ. އެއީ މާލެ ސަރަހައްދުން 66 މީހުންނާއި އަތޮޅުތަކުން 6 މީހުންނެވެ. މިއާއެކު ވެކްސިންގެ ފުރަތަމަ ޑޯޒް ޖެހި މީހުންގެ އަދަދު ވަނީ 395،879ށް އަރާފައެވެ.
މީގެއިތުރުން ބުރާސްފަތި ދުވަހު ދެ ވަނަ ޑޯޒް 173 މީހަކު ވަނީ ޖަހާފައެވެ. އެއީ މާލެ ސަރަހައްދުން 169 މީހުންނާއި އަތޮޅުތަކުން 4 މީހުންނެވެ. މިއާއެކު ރާއްޖޭގައި ވެކްސިން ފުރިހަމަ ކުރި މީހުންގެ އަދަދު ވަނީ 364،402ށް އަރާފައެވެ.
ބޫސްޑަރ ޑޯޒް މިހާރު ޖަހައިދެމުންދަނީ އެޕޮއިންޓްމެންޓް އުސޫލުންނެވެ. ރާއްޖޭގައި މިވަގުތު ބޫސްޓަރ ޑޯޒް ޖަހައިދެމުންދަނީ ފައިޒަރ ވެކްސިނުން އެކަންޏެވެ.
ކޮވިޑް-19 ކޮންޓްރޯލް ކުރުމަށް ޚާއްސަ އިސްކަމެއްދީގެން ވެކްސިނޭޝަން ޕްރޮގްރާމް ކުރިއަށް ގެންދާއިރު، ވީހާވެސް އަވަހަށް ވެކްސިން ފުރިހަމަ ކުރުމަށް ކަމާބެހޭ ފަރާތްތަކުން ދަނީ އިލްތިމާސްކުރަމުންނެވެ. ވެކްސިން ފުރިހަމަ ކޮށްފައިވާނަމަ، ބައްޔަށް ޕޮޒިޓިވްވި ނަމަވެސް ހާލަތު ސީރިއަސް ނުވާ ކަމަށް ޑޮކްޓަރުން ވިދާޅުވެއެވެ.
