އިނގިރޭސި ޕްރިމިއާ ލީގުގައި ބުރާސްފަތި ދުވަހުގެރޭ އާސެނަލް އަތުން މޮޅުވި މެޗަށްފަހު މެންޗެސްޓާ ޔުނައިޓެޑުގެ ވަގުތީ ކޯޗުގެ މަގާމު އަދާކުރި މައިކަލް ކެރިކް އެ ޓީމު ދޫކޮށްލައިފިއެވެ.

އަމިއްލަ ދަނޑުގައި ކުޅުނު މެޗުން ޔުނައިޓެޑް މޮޅުވީ އާސެނަލް އަތުން 3-2 ގެ ނަތީޖާއަކުންނެވެ.

ފޯރިގަދަ ކުޅުމެއް ފެނިގެންދިޔަ މި މެޗުގެ 13 ވަނަ މިނެޓުގައި އެމިލް ސްމިތު-ރޯވް ވަނީ އާސެނަލަށް ލީޑު ނަގައިދީފައެވެ. ސްމިތު-ރޯވް އެ ލަނޑު ޖެހިއިރު، ޔުނައިޓެޑުގެ ގޯލްކީޕަރު ޑޭވިޑް ޑެހެއާ ވެއްޓިފައި އޮތުމުން ރެފުރީ އެންމެ ފުރަތަމަ ފައުލަކަށް ދެއްކި ނަމަވެސް، ވީޑިއޯ އެސިސްޓަންޓް ރެފުރީ (ވީއޭއާރް) އިން ވަނީ އެއީ ރަނގަޅު ލަނޑެއް ކަމަށް ނިންމާފައެވެ. މެޗުގެ ކުރީކޮޅު އާސެނަލުން ލީޑު ނެގި ނަމަވެސް، ފުރަތަމަ ހާފު ނިމެން މިނެޓަކަށް ވެފައި ވަނިކޮށް ބްރޫނޯ ފެނާންޑޭސް ވަނީ ޔުނައިޓެޑަށް ނަތީޖާ އެއްވަރުކޮށްދީފައެވެ.

މި މެޗުގެ ދެވަނަ ހާފުގެ ކުރީކޮޅު ކްރިސްޓިއާނޯ ރޮނާލްޑޯ ޔުނައިޓެޑަށް ލީޑު ނަގައިދިން ނަމަވެސް، އޭގެ ދެ މިނެޓު ފަހުން މާޓިން އޮޑެގާޑް ވަނީ އާސެނަލަށް ނަތީޖާ އެއްވަރުކޮށްދީފައެވެ. މި މެޗުގައި ޔުނައިޓެޑުން އަލުން ލީޑުނެގީ ރޮނާލްޑޯ ކާމިޔާބުކުރި ޕެނަލްޓީންނެވެ. މިއީ އޭރިއާތެރެއިން ޔުނައިޓެޑުގެ ފްރެޑަށް އާސެނަލުގެ އޮޑެގާޑް ކުރި ފައުލަށް ދިން ޕެނަލްޓީއެކެވެ. މި މެޗުގައި ރޮނާލްޑޯ ދެ ލަނޑު ޖެހިއިރު، އޭނާ މިހާރު ވަނީ ކެރިއަރުގައި 801 ލަނޑު ހަމަކޮށްފައެވެ.

މި މޮޅާއެކު ތާވަލުގެ ހަތްވަނައިގައި ޔުނައިޓެޑް އޮތީ ކުޅުނު 14 މެޗުން 21 ޕޮއިންޓް ހޯދައިގެންނެވެ. ތާވަލުގެ ފަސްވަނައިގައި 14 މެޗުން 23 ޕޮއިންޓާއެކު އާސެނަލް އޮތްއިރު، ހަވަނައިގައި އޮތީ ބުރާސްފަތި ދުވަހުގެރޭ ބްރެންޓްފޯޑް އަތުން 2-0 ގެ ނަތީޖާއަކުން މޮޅުވި ޓޮޓެންހަމް ހޮޓްސްޕާއެވެ.

ލީގުގައި ބުރާސްފަތި ދުވަހުގެރޭ ކުޅުނު މެޗަކީ ކޯޗުގެ މަގާމުން އޮލެ ގުނަ ސޯލްޝެއާ ވަކިކުރުމަށްފަހު އަމިއްލަ ދަނޑުގައި ޔުނައިޓެޑުން ކުޅުނު ފުރަތަމަ މެޗެވެ. މީގެ ކުރިން ސޯލްޝެއާގެ އެސިސްޓަންޓް ކޯޗަކަށް ހުރި ކެރިކް ވަގުތީ ގޮތުން ޔުނައިޓެޑާ ހަވާލުވިއިރު، އޭނާގެ ކޯޗުކަމުގައި ޔުނައިޓެޑުން ކުުޅުނު ފުރަތަމަ މެޗުގައި ވަނީ ޔުއެފާ ޗެމްޕިއަންސް ލީގުގައި 2-0 ގެ ނަތީޖާއަކުން ވިޔަރެއާލް ބަލިކޮށްފައެވެ. އަދި ދެވަނަ މެޗުން މިދިޔަ އާދިއްތަ ދުވަހު ވަނީ ޕްރިމިއާ ލީގުގެ އެއްވަނައިގައި އޮތް ޗެލްސީއާ 1-1 ގެ ނަތީޖާއަކުން އެއްވަރުކޮށްފައެވެ.

އެކަމަކު އާސެނަލާ ދެކޮޅަށް ކުޅުނު މެޗަށްފަހު ޔުނައިޓެޑުން ވަނީ ކެރިކް އެ ޓީމު ދޫކޮށްލިކަން ރަސްމީކޮށް އިއުލާނުކޮށްފައެވެ. ކެރިކަށްފަހު ޔުނައިޓެޑުގެ ކޯޗުކަމާ ވަގުތީ ގޮތުން ދެން ހަވާލުވާނީ ޖަރުމަނުގެ ކޯޗު ރަލްފް ރަންގްނިކެވެ. މީގެ ކުރިން ވޯކްވިސާ ހަމަނުޖެހުމާ ގުޅިގެން އާސެނަލް މެޗުގައި އޭނާއަށް އިރުޝާދުދިނުމުގެ ފުރުސަތު ގެއްލުނަސް، ރޭގެ މެޗު ބަލަން ރަންގްނިކް ވަނީ ޔުނައިޓެޑުގެ ދަނޑަށް ގޮސްފައެވެ.

ޔުނައިޓެޑާ ރަންގްނިކް ރަސްމީކޮށް ހަވާލުވުމަށްފަހު އެ ޓީމުން ކުޅޭނެ ފުރަތަމަ މެޗަކީ އަންނަ އާދިއްތަ ދުވަހު ލީގުގައި ކްރިސްޓަލް ޕެލަސްއާ ދެކޮޅަށް ކުޅޭ މެޗެވެ.