ކޮވިޑް-19 އާއި ގުޅިގެން މޯލްޑިވްސް ޕޮލިސް ސަރވިސްއަށް ޚަރަދުކުރަން ދިން ބަޖެޓުން 29.7 މިލިއަން ރުފިޔާ ޚަރަދުކޮށްފައިވާކަމަށް އޮޑިޓް ރިޕޯޓުން ދައްކައިފިއެވެ.

އޮޑިޓަރ ޖެނެރަލް އޮފީހުން ވަނީ 2020 ވަނަ އަހަރު ކޮވިޑް-19އާއި ގުޅިގެން މޯލްޑިވްސް ޕޮލިސް ސަރވިސްއަށް ދިން ބަޖެޓުން ޚަރަދުކޮށްފައިވާގޮތް އޮޑިޓްކޮށްފައެވެ. މިދިޔަ އަހަރު ފުލުހުންނަށް ދީފައިވަނީ 31،510،230 މިލިއަން ރުފިޔާގެ ބަޖެޓެކެވެ. މި ބަޖެޓުން 29.7 މިލިއަން ރުފިޔާ ޚަރަދުކޮށްފައިވާކަމަށް އޮޑިޓް ރިޕޯޓުން ފާހަގަވެފައިވެއެވެ.

ބަޖެޓުން އެންމެ ބޮޑު ޚަރަދެއް ކޮށްފައިވަނީ މުވައްޒަފުންނަށް ފްރަންޓްލައިން އެލަވަންސް ދިނުމަށް ކަމަށް އޮޑިޓް ރިޕޯޓުން ފާހަގަވެފައިވެއެވެ. މުވައްޒަފުންގެ ފްރަންޓްލައިން އެލަވަންސްގެ ގޮތުގައި 27.4 މިލިއަން ރުފިޔާ ވަނީ ޚަރަދުކޮށްފައެވެ. ފުލުހުންގެ ދަތުރުތަކަށް 29،900 ރުފިޔާ ޚަރަދުކޮށްފައިވާއިރު، އެކޮމޮޑޭޝަންއަށް 1.3 މިލިއަން ރުފިޔާ ޚަރަދުކޮށްފައިވާކަމަށް އޮޑިޓް އިޕޯޓުން ފާހަގަވެފައިވެއެވެ. މަރާމާތުތަކަށް 617،050 ރުފިޔާ ޚަރަދުކޮށްފައިވާއިރު، އެހެނިހެން ކަންކަމަށް 356،990 ރުފިޔާ ވަނީ ޚަރަދުކޮށްފައެވެ.

މި ޚަރަދުތަކަށް ޖުމްލަ 29،754،051 މިލިއަން ރުފިޔާ އަރާ ކަމަށް އޮޑިޓް ރިޕޯޓުން ދައްކައެވެ. އަދި 1،756،179 މިލިއަން ރުފިޔާ ބާކީ ވެފައިވާކަމަށް އޮޑިޓް ރިޕޯޓުގައި ފާހަގަކޮށްފައިވެއެވެ.

އޮޑިޓް ރިޕޯޓުގައި ވަނީ މި ޚަރަދުތަކަކީދައުލަތުގެ މާލިއްޔަތުގެ ގާނޫނާއި، ދައުލަތުގެ މާލިއްޔަތުގެ ގަވާއިދާއި، މިނިސްޓްރީ އޮފް ފިނޭންސުން ކަނޑައަޅުއްވާފައިވާ އުސޫލުތަކާ އެއްގޮތަށް ކޮށްފައިވާ ޚަރަދުތަކެއް ކަމަށެވެ.

އަދި ކޮވިޑް-19 އާ ގުޅިގެން ފްރަންޓްލައިންގައި މަސައްކަތްކުރި ފަރާތްތަކަށް ދީފައިވާ އެލަވަންސާ ގުޅޭގޮތުން ވަކި ރިޕޯޓެއް ކަނޑައަޅަން ނިންމާފައިވާކަމަށް އޮޑިޓް އޮފީހުން ފާހަގަކޮށްފައިވެއެވެ. އެހެންކަމުން މޯލްޑިވްސް ޕޮލިސް ސަރވިސް އިން ފްރަންޓްލައިން އެލަވަންސަށް ކުރި ޚަރަދާ ގުޅެގޮތުން ފާހަގަކުރެވުނު ކަންކަން މި ރިޕޯޓުގައި ހިމަނާފައެއް ނުވެއެވެ.