ބަންދުގެ މުއްދަތު 48 ގަޑިއިރަށް ބަދަލުކޮށް ޓެރަރިޒަމް މަނާ ކުރުމުގެ ގާނޫނަށް އިސްލާހު ގެނެސްފިއެވެ.

ސަލާމަތީ ޚިދުމަތްތަކާބެހޭ ކޮމިޓީން ބިލު ދިރާސާކޮށް ނިންމި ގޮތުގެ ރިޕޯޓަށް ކޮމިޓީގެ މުގައްރިރު ހިތަދޫ އުތުރު ދާއިރާގެ މެމްބަރު އަދި ކޮމިޓީގެ މުގައްރިރު މުހައްމަދު އަސްލަމް ވަނީ އިސްލާހެއް ހުށަހަޅާފައެވެ. އެ އިސްލާހުގައިވަނީ، ބިލަށް މާއްދާއެއް އިތުރު ކުރުމަށެވެ. އެ މާއްދާގައި ބަޔާން ކޮށްފައިވަނީ، ހަނގުރާމަވެރި ސަރަހައްދެއްގައި އުފަންވާ ކުދިން ރާއްޖެއަށް އަންނަނަމަ، އައުމުގެ ކުރިން އެ ކުއްޖާ ރާއްޖޭގައި ރަޖިސްޓްރީ ކުރެވޭނެ ގޮތްތަކާއި އުސޫލެވެ.

މި އިސްލާހާއެކު ރިޕޯޓް ފާސްކުރީ، 51 މެމްބަރުންގެ ވޯޓުންނެވެ.

ބަންދުގެ މުއްދަތު 48 ގަޑިއިރަށް އިތުރު ކުރުމަށް ކޮމިޓީން ނިންމި މައިގަނޑު ސަބަބަކީ، ޢާންމުގޮތެއްގައި ޓެރަރިޒަމް ޢަމަލުތަކ ރޭވިގެން ހިންގާ ކުށްތަކަކަށްވާތ ، އެފަދަ ކުށަކާގުޅިގެން މ ހަކު ހައްޔަރުކުރުމަށްފަހު 24 ގަޑިއިރުގެ ތެރޭގައި ތުހުމަތު ކުރެވޭ ފަރާތުގެ ބަންދާމެދު ގޮތެއް ނިންމުމަށް ފަނޑިޔާރެއްގެ ކުރިމައްޗަށް ހާޒިރުކުރުމު ގައި ގޮންޖެހުންތަކެއް ހުންނަކަން ފާހަގަކުރެވިފައިވާތީއެވެ. އެގޮތުން، ޓެރަރިޒަމްގެ ޢަމަލުތަކާ ގުޅިގެން ބަލާފާސްކުރާ ތަންތަން ފާސްކުރުމުގެ މަސައްކަތް 24 ގަޑިއިރުތެރޭގައި ނުނިމޭކަމާއި، މީހެއްގެ ބަންދާގުޅޭގޮތުން ބާއްވާ އަޑުއެހުމަކީވެސް ޝަރީޢަތުގެ މަޖިލީހަކަށްވާއިރު އެ މަޖިލީހަށް ހުށަހެޅުމަށް ބޭނުންވާ ލިޔެކިޔުންތައް ތައްޔާރުކުރުމާއި، ބަންދުގެ މުއްދަތު އިތުރުކުރުމަށް އެދި ހުށަހަޅާ ސަބަބުތަކާއި އެ ސަބަބުތައް ސާބިތުކުރުމަށް ބޭނުންވާ ހެކި ހޯދައި ހުށަހަޅަންޖެހޭކަމަށެވެ. އަދި ފާއިތުވިތަނުގައި، ޓެރަރިޒަމްގެ ޢަމަލުތަކާ ގުޅިގެން ހައްޔަރުކުރެވޭ ފަރާތްތައް 24 ގަޑިއިރު ތެރޭގައި ފަނޑިޔާރެއްގެ ކުރިމައްޗަށް ހާޒިރުކުރާއިރު، ހައްޔަރުކުރުމާއި ފަނޑިޔާރެއްގެ ކުރިމައްޗަށް ތުހުމަތުކުރެވޭ ފަރާތް ހާޒިރުކުރާ ވަގުތާ ދެމެދު އެކަށީގެންވާ ގޮތަކަށް ތައްޔާރުނުވެވޭތީ، ބަންދުކުރެވޭ ފަރާތްތައް ކޯޓުން ދޫކުރާ ޙާލަތްތައް މެދުވެރިވެފައިވާކަން ކޮމިޓީންވަނީ ފާހަގަކޮށްފައެވެ.

މި މުއްދަތުގެ ބޭނުން ނަހަމަ ގޮތުގައި ނުހިފުމަށް މެމްބަރުން އެދިވަޑައިގެންނެވިއެވެ. މުއްދަތު 48 ގަޑިއިރަށް ބަދަލު ގެނައި ނަމަވެސް ވީހާވެސް އަވަހަކަށް ފަނޑިޔާރެއްގެ ކުރިމައްޗަށް ހާޒިރު ކުރަންވާނެ ކަމަށް މެމްބަރުން ވިދާޅުވިއެވެ.

ޖިނާއީ ބޮޑެތި މައްސަލަތަކުގައި ތަހުގީގު ފުރިހަމަ ކުރުމަށްދޭ މުއްދަތުވެސް ވަނީ އިތުރު ކޮށްފައެވެ. އެގޮތުން އެ މުއްދަތު 45 ދުވަހަށް ވަނީ އިތުރުކޮށްފައެވެ. މިގޮތަށް ގާނޫނަށް ބަދަލު ގެނައުމަށް ނިންމާފައިވަނީ، ޓެރަރިޒަމް ފަދަ ރޭވިގެން ހިންގާ ބޮޑެތި ޖިނާއ ކުށްތައް ތަހުޤީޤުކުރުމަށް 30 ދުވަހަކީއެކަށީގެންވާ މުއްދަތެއް ނޫންކަމަށާއި، އަދި މިފަދަ މައްސަލަތަކުގައި ރާއްޖެއިން ބޭރުން ލިބެންޖެހޭ ލިޔުންތައް ހޯދުމާއި، މިފަދަ މައްސަލަތަކުގައި ހުށަހެޅޭ ބައެއް މާއްދީ ހެއްކާއި، ޑިޖިޓަލް ހެކިތައް ރާއްޖެއިން ބޭރުގެ ލެބޯރަޓަރީ ތަކަށް ފޮނުވައިގެން ތަޙްލީލުކުރުމަށް ދިގު މުއްދަތެއް ހޭދަވާތީ، އެ މުއްދަތުގެ ތެރޭގައި މިފަދަ ތަޙްޤީޤުތައް ފުރިހަމަކުރުމަށް ބޮޑެތި ގޮންޖެހުންތައް ހުންނަކަމަށް ދިވެހި ފުލުހުންގެ ޚިދުމަތުގެ ފަރާތުން ފާހަގަކޮށްފައިވާތީ، މި ޤާނޫނުގައި ބަޔާންކޮށްފައިވާ ކުށްތަކާގުޅިގެން ތަޙްޤީޤު ހިންގުމަށް އެކަށ ގެންވާ ވަގުތު ދިނުމުގެ މަޤްޞަދުގައެވެ.

ހަމަ މިއާއެކު އިތުރުކޮށްދޭ މުއްދަތުގައިވެސް އެ މައްސަލައިގެ ތަޙްޤީޤު ފުރިހަމަކުރެވިފައިނުވާނަމަ، އަދި އެފަދައިން ތަޙްޤީޤު ފުރިހަމަކުރެވިފައިނުވަނ ފުލުހުންގެ ބާރުނުފޯރުވޭ ކަމެއް މެދުވެރިވުމުގެ ސަބަބުން ކަމުގައިވާނަމަ، އިތުރު އެއް ފަހަރު އެ މުއްދަތު އިތުރުކޮށްދިނުމަށް އެދި ޕްރޮސިކިއުޓަރ ޖެނެރަލަށް ހުށަހެޅިދާނެއެވެ. އަދި އެފަދައިން އެ މައްސަލައިގެ ތަޙްޤީޤު ފުރިހަމަކުރެވިފައިނުވާ ސަބަބަށް ރިޢާޔަތްކޮށް، 15 ދުވަހަށްވުރެ އިތުރުނުވާނެ ގޮތުގެމަތިން ޕްރޮސިކިއުޓަރ ޖެނެރަލަށް އެ މުއްދަތު އިތުރުކޮށްދެވިދާނެ ކަމަށް ބަޔާންކޮށް ގާނޫނުގެ 28 ވަނަ މާއްދާގެ (ޅ)ގެ ފަހަތަށް ވަނީ އަކުރެއް އިތުރުކޮށްފައެވެ.

28 ވަނަ މާއްދާގެ (ޅ)ގެ ފަހަތަށް ފަސް އަކުރު ވަނީ އިތުރުކޮށްފައެވެ.

މި އަކުރުތައް އިތުރުކުރުމުގެ މައިގަނޑު ބޭނުމަކީ، ބިލުގެ 28 ވަނަ މާއްދާގެ (ރ) ގެ ދަށުން ތަޙްޤީޤުކުރާ މުއްދަތުގެ ތެރޭގައި ތަޙްޤީޤު ފުރިހަމަވެފައި ނުވަނީ، ފުލުހުންގެ ބާރުނުފޯރުވޭ ކަމެއް މެދުވެރިވުމުގެ ސަބަބުން ކަމުގައިވާނަމަ، އިތުރު މުއްދަތު ދިނުމުގެ ފުރުޞަތު ދިނުމުގެ ގޮތުންނާއި، އަދި އެގޮތަށް އިތުރުކުރެވޭ މުއްދަތުގައި ތަޙްޤީޤު ފުރިހަމަވެފައި ނުވާނަމަ ދަޢުވާނުކުރެވޭނެކަން ބަޔާންކުރުމުގެ ގޮތުންނެނެވެ.

އިސްލާހުގައިވާ ގޮތުން ހަނގުރާމަވެރި މާހައުލަކުން އަންނަ މީހެއްގެ ޑީ-ބްރީފިންގއެއް ފުލުހުން ހަދަން ޖެހެއެވެ. ސަބަބަކީ، ހަނގުރާމަވެރި ސަރަޙައްދެއްގައި އުޅެފައިވާގޮތާއި ބައިވެރިވުން އޮތް މިންވަރު، އަދި އެފަދަ މީހުންގެ ފަރާތުން ކުރިމަތިވެދާނެ ނުރައްކަލެއްގެ މިންވަރު އެފަދަ މީހުން ދިވެހިރާއްޖެއަށް އެތެރެވުމާއެކު ލަސްކުރުމެއްނެތި ދެނެގަނެވިފައި އޮތުމަކީ މުހިންމުކަމެއް ކަމުގައިވާތީއެވެ. އަދި ކުޑަކުއްޖަކު އާއިލާއާ ހަވާލު ކުރުމުގެ ކުރިން އެސެސްމެންޓް ހަދަންވާނެ ކަމަށް ބަޔާން ކޮށްފައިވެއެވެ.

ގޮވާ ތަކެތި މާނަ ކުރެވޭ ގޮތް ވަރަށް ތަފްސީލްކޮށް އިސްލާހުގައި ބަޔާންކޮށްފައިވެއެވެ.