އެއްމެދު ޢިމާރާތުގެ ބިލު ފާސްކޮށްފި
29 ނޮވެމްބަރު 2021 | ހޯމަ 13:48"އެއްމެދު ޢިމާރާތުގެ ބިލު"ގައި ޖުމްލަ 141 މާއްދާ ހިމެނޭ
މެނޭޖްމަންޓް ކޯޕަރޭޝަން އުފެއްދުމާއި، މެނޭޖްމަންޓް ކޯޕަރޭޝަންގެ ފަންޑު ޤާއިމުކުރުމާގުޅޭ އުސޫލުތައްވެސް ހިމަނާފައިވޭ
ދިވެހިރާއްޖޭގައި ބިނާކުރާ ޢިމާރާތްތައް އެއްމެދު ޢިމާރާތުގެގޮތުގައި ރަޖިސްޓަރީކޮށްދިނުމާގުޅޭ އުޞޫލުތައް ބަޔާންކުރާ އެއްމެދު އިމާރާތުގެ ބިލު ފާސްކޮށްފިއެވެ.
"އެއްމެދު ޢިމާރާތުގެ ބިލު" ރައްޔިތުންގެ މަޖިލީހަށް ހުށަހެޅުއްވީ ސަރުކާރުގެ ފަރާތުން، ހިތަދޫ ދެކުނު ދާއިރާގެ މެންބަރު އިބްރާހީމް ނާޒިލެވެ.
ބިލު ފާސްކުރީ ވޯޓުގައި ބައިވެރިވެވަޑައިގެންނެވި 52 މެމްބަރުންގެ ވޯޓުންނެވެ.
މި ބިލުގައި ދިވެހިރާއްޖޭގައި ބިނާކުރާ ޢިމާރާތްތައް، އެއްމެދު ޢިމާރާތުގެގޮތުގައި ރަޖިސްޓަރީކުރުމާއި، އެއްމެދު ޢިމާރާތުގައި ހިމެނޭ ޔުނިޓުތައް ގަނެވިއްކުމާއި މިލްކުކުރުމުގެ ހަމަތައް، އަދި އެއްމެދު ޢިމާރާތް ބެލެހެއްޓުމާއި ބޭނުންކުރުމުގެ އުސޫލުތައް ބަޔާންކޮށްފައިވެއެވެ. "އެއްމެދު ޢިމާރާތުގެ ބިލު"ގައި ޖުމްލަ 141 މާއްދާ ހިމެނެއެވެ.
ބިލުގައި ހިމެނޭ މައިގަނޑު ކަންކަމުގެ ތެރޭގައި، ބިމާއި ޢިމާރާތުގައި ހިމެނޭ ބައިތައް ކަނޑައެޅުމާއި ސްޓްރާޓާ ޕްލޭނަށް ހުއްދަ ދިނުމާއި، ސްޓްރާޓާ ޕްލޭނަށް ބަދަލު ގެނައުމާގުޅޭ އުޞޫލުތައް ބަޔާންކޮށްފައިވެއެވެ.
ސްޓޭޖް ޑިވެލޮޕްމަންޓާގުޅޭ އުސޫލުތައް ބިލުގައި ބަޔާންކޮށްފައިވާއިރު، ސްޓޭޖް ޑިވެލޮޕްމަންޓްގައި ހިމަނަންޖެހޭ ބައިތަކާއި، ސްޓޭޖް ޑިވެލޮޕްމަންޓް ހިންގުމަށް ހުށަހެޅުމާގުޅޭ އިޖުރާއަތުތަކާއި ސްޓޭޖް ޑިވެލޮޕްމަންޓާގުޅޭ އެނޫންވެސް އެންމެހައި ކަންކަންވެސް ބިލުގައި ތަފްޞީލް ގޮތެއްގައި ބަޔާން ކޮށްފައިވެއެވެ.
އެއްމެދު ޢިމާރާތް ރަޖިސްޓަރީކުރުމުގެ ހުއްދަ ދިނުމާއި، އެއްމެދު ޢިމާރާތުގެ ޔުނިޓުތައް ގަނެވިއްކުމާއި ދިނުން އަދި ރަޖިސްޓަރީކުރުމާގުޅޭ މުޢާމަލާތްތައްވެސް ބިލުގައި ތަފްޞީލުކޮށްފައިވާއިރު، މެނޭޖްމަންޓް ކޯޕަރޭޝަން އުފެއްދުމާއި، މެނޭޖްމަންޓް ކޯޕަރޭޝަންގެ ފަންޑު ޤާއިމުކުރުމާގުޅޭ އުސޫލުތައްވެސް ހިމަނާފައެވެ.
އެއްމެދު ޢިމާރާތާގުޅޭ ފަރާތްތަކުގެ ޙައްޤުތައް ހިމެނޭގޮތުން، "އެއްމެދު ޢިމާރާތުގެ ބިލު" ތަންފީޒުކުރުމާ ގުޅޭގޮތުން ކައުންސިލްތަކުގެ މަސްއޫލިއްޔަތުތައްވެސް ބިލުގައި ތަފްސީލްކޮށް ބަޔާންކޮށްފައިވެއެވެ.
"އެއްމެދު ޢިމާރާތުގެ ބިލު" ހުށަހެޅުއްވުމުގެ މަޤްޞަދަކީ، ދިވެހިރާއްޖޭގައި ބިނާކުރާ ޢިމާރާތްތައް އެއްމެދު ޢިމާރާތުގެގޮތުގައި ރަޖިސްޓަރީކޮށްދިނުމާގުޅޭ އުސޫލުތައް ބަޔާންކުރުމާއި، އެއްމެދު ޢިމާރާތެއްގައި ހިމެނޭ ޔުނިޓުތައް ވަކިވަކި ފަރުދުންނަށް ނުވަތަ ފަރާތްތަކަށް މިލްކުކުރެވޭނެ މަގުފަހިކޮށްދިނުމާއެކު، ޔުނިޓުތައް މިލްކުވާނެ ގޮތްތައް ކަނޑައެޅުމާއި، އެއްމެދު ޢިމާރާތުގެ އެކި ބައިތަކުގައި ދިރިއުޅެ، އެ ތަންތަން ގަނެވިއްކައި، ކުއްޔަށްދީ، އަދި އެނޫންވެސް މުޢާމަލާތްތައް ކުރުމާއި، އެއްމެދު ޢިމާރާތް ބެލެހެއްޓުމާއި ބޭނުންކުރުމުގެ އެނޫންވެސް އުޞޫލުތައް ބަޔާންކުރުމެވެ.
