އެޖެންޑާގައިވާ ކަންކަން ނިމެންދެން ޖަލްސާގެ ވަގުތު އިތުރުކޮށްފި
29 ނޮވެމްބަރު 2021 | ހޯމަ 10:28ހޯމަދުވަހުގެ ޖަލްސާއަކީ މިއަހަރުގެ ތިންވަނަ ދައުރުގެ ފަހު ޖަލްސާ
ރައްޔިތުންގެ މަޖިލީހުގެ ޖަލްސާއެއްގެ ތެރެއިން
އެޖެންޑާގައިވާ ކަންކަން ނިމެންދެން ރައްޔިތުންގެ މަޖިލީހުގެ ހޯމަދުވަހުގެ ޖަލްސާގެ ވަގުތު އިތުރުކޮށްފިއެވެ.
ވަގުތު އިތުރުކުރުމަށް ނިންމީ ވޯޓުގައި ބައިވެރިވެވަޑައިގެންނެވި 35 މެމަބަރުންގެ އިއްތިފާގުންނެވެ. ހޯމަ ދުވަހުގެ ޖަލްސާއަކީ މި އަހަރުގެ ތިންވަނަ ދައުރުގެ ފަހު ޖަލްސާއެވެ. މި ޖަލްސާގައި ކޮމިޓީން ނިންމާފައިވާ މަސައްކަތްތައް ތަޅުމަށް ހުށަހަޅައި ވޯޓަށް އެހުމަށް ވަނީ ހަމަޖެހިފައެވެ.
ޗޭންޖް އެންޑީއޭ ޕެޓިޝަން ދިރާސާކޮށް ނިންމި ގޮތުގެ ރިޕޯޓާއި، ބައެއް މުހިއްމު ބިލުތައް ކޮމިޓީން ދިރާސާކޮށް ނިންމި ގޮތުގެ ރިޕޯޓްވެސް ހުށަހަޅާނެއެވެ. އެގޮތުން ބިމާބެހޭ ގާނޫނަށް އިސްލާހު ގެނައުުމުގެ ބިލާއި، ޓްރާންސްޕޯޓް އޮތޯރިޓީ އުވާލުމުގެ ބިލާއި، ޖިންސީ ކުށުގެ ގާނޫނަށް ގެނައި އިސްލާހު ހިމެނެއެވެ. އަދި މަދަނީ އިޖުރާއަތުގެ ބިލާއި، އެއްމެދު އިމާރާތުގެ ބިލަށް ވޯޓަށް އެހުމަށްވެސް ވަނީ ހަމަޖެހިފައެވެ.
އަމާޒު ހިފާފައިވަނީ މިދައުރަށް ކަނޑައެޅިފައި ހުރި މަސައްކަތްތައް ނިންމައި، ވޯޓަށް އަހަން ޖެހޭ ކަންކަމަށް ވޯޓަށް އެހުމަށެވެ.
