އޮކްޓޯބަރު މަހު 32 މީހުން ޖަލުން ދޫކޮށްލި، 60 މީހުން ޖަލަށްލި
29 ނޮވެމްބަރު 2021 | ހޯމަ 07:40އޮކްޓޯބަރު މަހު 1071 ގައިދީއަކު ޑޮކްޓަރަށް ދެއްކުމަށް އެދިފައިވޭ
ޤައިދީން އަނބުރާ މުޖުތަމައަށް ގެނެސް، ޖަލުތައް އިސްލާޙު ކުރުމަށް ގިނަ މަސައްކަތްތަކެއް ވަނީ ކުރަން ޖެހިފައި
އޮކްޓޯބަރު މަހު 32 މީހުން ޖަލުން ދޫކޮށްލިކަމަށް މޯލްޑިވްސް ކަރެކްޝަނަލް ސަރވިސަސްއިން ބުނެފިއެވެ.
ކަރެކްޝަންސްއިން އާންމުކޮށްފައިވާ ފަހުގެ ތަފާސްހިސާބުތައް ދައްކާގޮތުން އޮކްޓޯބަރު މަހު 32 މީހުން ޖަލުން ދޫކޮށްލާފައިވާއިރު، އޭގެ ތެރޭގައި ޙުކުމް ކޮށްފައިވާ 32 މީހުން ތިއްބެވެ. އޭގެ ތެރެއިން 26 މީހަކު ދޫކޮށްލާފައިވަނީ ޖަލު ޙުކުމް ތަންފީޒުކޮށް ނިމުމުންނެވެ. އަދި އެކަކު ދޫކޮށްލާފައިވަނީ ޙުކުމް ބާތިލު ކުރުމުގެ ސަބަބުންނެވެ.
އޭގެ އިތުރުން، ޝަރީއަތް ނުނިމިވާ 5 މީހަކުވެސް ދޫކޮށްލާފައިވާއިރު، އެމީހުން ދޫކޮށްލާފައިވަނީ ބަންދު ކުރުމަށް ކޮށްފައިވާ އަމުރު ބާތިލުވުމުގެ ސަބަބުންނެވެ.
އޮކްޓޯބަރު މަހު 60 މީހަކު ޖަލަށް ލާފައިވެސް ވެއެވެ. އޭގެ ތެރޭގައި ޖަލު ޙުކުމެއްގެ ދަށުން ޖަލަށް ލާފައިވާ 47 މީހަކާއި، ޝަރީއަތް ކުރިއަށްދާތީ ބަންދުކޮށްފައިވާ 13 މީހަކު ހިމެނެއެވެ.
އަލަށް ޖަލަށް ލާފައިވާ މީހުންގެ ތެރެއިންވެސް 40 އިންސައްތަ މައްސަލައަކީ މަސްތުވާތަކެއްޗާ ގުޅުންހުރި މައްސަލަތަކެވެ. ފޭރުމުގެ 14 އިންސައްތަ، ވައްކަމާގުޅޭ 14 އިންސައްތަ، އަދި އަމުރަށް ނުކިޔަމަންތެރިވުމުގެ 17 އިންސައްތަ މައްސަލަވެސް އޭގެ ތެރޭގައި ހިމެނެއެވެ. އަދި ކޮރަޕްޝަނާއި ގުޅޭ 2 އިންސައްތަ މައްސަލައާއި، ކޯޓުގެ ޙުރުމަތް ކެނޑުމާއިގުޅޭ 2 އިންސައްތަ މައްސަލަވެސް އޭގެ ތެރޭގައި ހިމެނެއެވެ.
އޮކްޓޯބަރު މަހުގެ ތަފާސްހިސާބުތަކަށް ބަލާއިރު، މާފުށީ ޖަލުން އެކަނިވެސް 13 ފޯނު އަތުލައިގެންފައިވެއެވެ. އަދި މާލޭ ޖަލުން 1 ފޯނާއި، އައްސޭރި ޖަލުން 3 ފޯނު އަތުލައިގެންފައިވެއެވެ. މީގެ އިތުރުންވެސް ސިމްކާޑާއި، ޗާރޖަރާއި، ހެޑްސެޓާއި، ބެޓެރީ ފަދަ ތަކެތި ވަނީ ކަރެކްޝަންސްގެ ބެލުމުގެ ދަށަށް ގެންގޮސްފައެވެ.
ބޭސްފަރުވާއަށް ބަލާއިރު، އޮކްޓޯބަރު މަހު 1071 ޤައިދީއަކު އާންމު ޑޮކްޓަރަށް ދެއްކުމަށް އެދިފައިވެއެވެ. އޭގެ ތެރެއިން 948 މީހުން ޑޮކްޓަރަށް ދައްކާފައިވާއިރު، ޚާއްސަ ބަލީގެ ޑޮކްޓަރުންނަށް 393 މީހަކު ދައްކާފައިވެއެވެ. އޭގެ ތެރޭގައި ހަމުގެ އެކި މައްސަލަތަކާއި، ދަތުގެ މައްސަލަތަކާއި، ނަފްސާނީ މައްސަލަތަކާއި، ހިތާއި ނާރުގެ މައްސަލަތަކުގެ އިތުރުން، ލޮލުގެ މައްސަލަތަކުގައި ޑޮކްޓަރަށް ދައްކާފައިވާ ފަރާތްތައް ހިމެނޭކަމަށް ކަރެކްޝަންސްއިން މައުލޫމާތު ދެއެވެ.
