ދިފާއީ ކަންކަމުގައި އިންޑިއާ އާއި ދެމެދު އެއްބާރުލުން ބިނާވެފައި އޮންނަނީ ހަމަހަމަކޮށް
މިއީ ބޭރު ގައުމެއްގެ ވަޒީރަކު މި ޕެރޭޑް ޝަރަފުވެރިކޮށްދެއްވި ފުރަތަމަ ފަހަރު
އެންއައިއޭގެ ދަސްވެނިވުން
ދިފާއީ ކަންކަމުގައި ރާއްޖެއާއި އިންޑިއާ އާއި ދެމެދު އޮންނަ އެއްބާރުލުން ބިނާވެފައި އޮންނަނީ ހަމަހަމަކޮށް ކަމަށް ޑިފެންސް މިނިސްޓަރ މާރިޔާ އަޙްމަދު ދީދީ ވިދާޅުވެއްޖެއެވެ.
އިންޑިއަން ނޭވަލް އެކެޑަމީގެ ޕާސިންގ އައުޓް ޕެރޭޑް ޝަރަފުވެރިކޮށްދެއްވައި ދެއްކެވި ވާހަކަފުޅުގައި މިނިސްޓަރ ވިދާޅުވީ ދިފާއީ ކަންކަމުގައި ރާއްޖެއާއި އިންޑިއާއިން، އެއް ގައުމު އަނެއް ގައުމަށްދޭ އެއްބާރުލުން ބިނާވެފައި އޮންނަނީ ހަމަހަމަކަމާއި، ދެ ގައުމުގެ ފައިދާއާއި ސަރަހައްދުގެ ސަލާމަތާއި ރައްކާތެރިކަން ކަށަވަރުކުރުމަަށް އޮތް މުހިއްމު ބޭނުމުގެ މައްޗަށް ކަމަށެވެ.
މިނިސްޓަރ މާރިޔާ ވަނީ އިންޑިޔާގެ އެޒިމަލާގައި ހުންނަ އޭޝިޔާގެ އެންމެ ބޮޑު ނޭވަލް އެކެޑަމީގެ ޕާސިންގ އައުޓް ޕެރޭޑް ޝަރަފުވެރިކޮށްދެއްވައި ދަސްވެނިވި 231 މިޑްޝިޕްމަނުންނާއި ކެޑޭޓުންނަށް މަރުޙަބާ ވިދާޅުވެފައެވެ. މިއީ ބޭރު ގައުމެއްގެ ވަޒީރަކު، މި ޕެރޭޑް ޝަރަފުވެރިކޮށްދެއްވި ފުރަތަމަ ފަހަރެވެ.
މި ރަސްމިއްޔާތުގައި ވާހަކަ ދައްކަވަމުން މިނިސްޓަރ އިތުރަށް ވިދާޅުވީ މި މުއައްސަސާއިން ދަސްވެނިވެގެން ނިކުންނަ ފަރާތްތަކުން ލިބުނު އިލްމާއި ފަންނީ މައުލޫމާތާއި ލީޑަރޝިޕްގެ ހުނަރު ބޭނުންކުރަން ވާނީ، މިސަރަހައްދުގެ އެންމެންގެ ސަލާމަތާއި ރައްކާތެރިކަން ކަށަވަރުކުރުމުގެ އަޒުމާއި ވިސްނުމުގައި ކަމަށެވެ.
އިންޑިޔާގެ ޗީފް އޮފް ނޭވަލް ސްޓާފް އެޑްމިރަލް ކަރަމްބީރު ސިންގުގެ ދަޢުވަތަކަށް ޑިފެންސް މިނިސްޓަރ އިންޑިޔާއަށް ކުރެއްވި މިދަތުރުފުޅުގައި، އެކަމަނާ ވަނީ، އިންޑިޔާގެ ނޭވީގެ ސަދަރން ކޮމާންޑަށާއި އިންޑިއަން ނޭވަލް އެކެޑަމީއަށް ޒިޔާރަތްކުރައްވައި، ޓްރެއިނިންގ ފެސިލިޓީތައް ބައްލަވާލައްވާފައެވެ. އަދި އިންޑިޔާގައި ތަމްރީނުވަމުންދާ ދިވެހި ސިފައިންނާވެސް އެކަމަނާ ބައްދަލުކުރެއްވިއެވެ.
އިންޑިޔާގެ ނޭވީގެ ޓްރެއިނިންގ ކޮމާންޑުކަމަށްވާ ސަދަރން ނޭވަލް ކޮމާންޑުން ވަނީ، އެމް.އެން.ޑީ.އެފްއަށް ބޭނުންވާ ހުރިހާ ރޮނގަކުން، ތަމްރީނުގެ ފުރުޞަތުތައް ފަހިކޮށްދޭނެކަމުގެ ޔަޤީންކަން ދިވެހި ސަރުކާރަށް ދެއްވާފައެވެ.
