ސިޓީ ކައުންސިލްގެ އައު ލޯގޯއާއެކު ތަރިކަ ސުންނާފަތިކޮށްލި މާޒީ ދިވެހިންގެ ހަނދާނަށް

އަލިރަސްގެފާނުގެ ޒިޔާރަތް ސުންނާފަތިކޮށް އެތަނުގައި ޕަމްޕް ސްޓޭޝަނެއް ގާއިމުކުރަން މަސައްކަތް ކުރި ޒަމާނެއް ދިވެހިން ދެކެފިއެވެ. ކަޅުވަކަރު މިސްކިތް 1980 ގައި ސަލްޓަން ޕާކުގައި ރާވައި، އޭގެ އެތައް އަހަރެއް ފަހުން އައި ސަރުކާރަކުން އެތަނުގައި އައިސް ސްކޭޓިންގ ޕާކެއް އެޅި މަންޒަރު ފެނިއްޖެއެވެ. ގދ. ތިނަދޫއަށް ގެންދަން ކަމަށް ބުނެ ކަޅުވަކަރު މިސްކިތް ރޫޅާލި ގޮތަށް އެ މިސްކިތަށް ވަމުންދިޔަ ނިކަމެތި ގޮތް ދިވެހިން ލޮލުން ދެކެފިއެވެ.

ޕޯޗުގީޒުންގެ އަޅުވެތިކަމުން ރާއްޖެ ސަލާމަތް ކުރެއްވި އައްސުލްތާނު މުހައްމަދު ތަކުރުފާނު ފަސްދާނުލެވިފައިވާ ޒިޔާރަތް ހުންނަ ބިހުރޯޒު ކަމަނާ މިސްކިތް ބިމާ ހަމަކޮށް، އޮފީސް އިމާރާތެއް އަޅަން އުޅުނު މަންޒަރު ދިވެހިން ދެކެފިއެވެ. ހުކުރު މިސްކިތް ހުރިތަނުގައި ކެފޭ ހެދުމަށް ވިސްނައި، އެ މަސައްކަތް ފުޅާކުރި ސަރުކާރެއް ދިވެހިން ދެކެފިއެވެ.

ކޮންމެ ޤައުމެއްގެވެސް ސަޤާފަތާއި ތަރިކައަކީ އެ ޤައުމެއްގެ މިނިވަންކަމާއި ތާރީޚު ދައްކުވައިދޭ ރަމްޒެެކެވެ. އެ ޤައުމެއްގެ ކާބަފައިންގެ ދިރިއުޅުމުގެ އާޖުފާޖާއި، ވައްޓަފާޅި ފަހުގެ ޖީލުތަކަށް ދައްކުވައިދެނީ ތާރީޚާއި ތަރިކައިންނެވެ. އާސާރީ ތަކެއްޗަށް ތަރިކައޭ ކިޔަނީ އެއްޖީލުން އަނެއް ޖީލަށް ވާރުތަވާތީއެވެ.

ރައީސުލްޖުމްހޫރިއްޔާ އިބްރާހިމް މުޙައްމަދު ސޯލިޙު ވެރިކަމަށް ވަޑައިގެން، މުޅިން އަލަށް ސަޤާފީ ތަރިކައިގެ މިނިސްޓްރީއެއް އުފައްދަވައި، އެންމެ ފުރަތަމަވެސް އުފަން ކުރުވީ ދިވެހިރާއްޖޭގެ ސަގާފީ ތަރިކައިގެ ގާނޫނު" ގެ ނަންދެވިފައިވާ ބިލެކެވެ. ދިވެހިރާއްޖޭގެ ތަރިކަ ރައްކާތެރިކުރުމުގެ ގާނޫނުގެ ދަށުން އެކުލަވާލަންޖެހޭ ގަވާއިދުތައް އެކުލަވާލައި، މިވަނީ ގެޒެޓުވެސް ކޮށްފައެވެ. އޭގެ ތެރޭގައި މާއްދީ އަދި މައުނަވީ ތަރިކަވެސް ވަނީ ތަފްސީލު ކޮށްދީފައެވެ.

ތަރިކަ ރައްކާތެރި ކުރުމަށް ކުރަމުންދާ މަސައްކަތްތަކުގައި ސަރުކާރު ހިންދެމިލިތަނާ އެންމެ ސަމާލުކަމަށް މިއައީ މާލެ ސިޓީ ކައުންސިލުގެ ލޯގޯ ބަދަލުކުރި ވާހަކައެވެ.

ތެދެކެވެ. ލޯގޯއަކީ ސަޤާފީ ތަރިކައެއް ނޫނެވެ. ނަމަވެސް މާލެ ސިޓީ ކައުންސިލުގެ ލޯގޯއަކީ ދިވެހި ވަންތަ، ދިވެހި ތާރީޚު ދައްކުވައިދޭ، ދިވެހިރާއްޖޭގެ ޖަޒީރާވަންތަކަންވެސް އެއިން ދައްކުވައިދޭ ލޯގޯއެކެވެ. އެގޮތުން މާ ފުން ކަނޑާއި، ރާއްޖޭގެ ފެހި މަލަމަތީގެ ކުލަތަކުން ޖަރީވެފައިވާ މި ލޯގޯ އިތުރަށް ފުރިހަމަ ކޮށްލަނީ ރާއްޖޭގެ ތާރީޚުގެ ރީތި ކުލަވެސް އޭގައި ޖެހިގެންނެވެ. ހުދު ކުލައިން ލޯގޯގެ މެދުގައި ފެންނަން ހުންނަނީ ޔުނެސްކޯއިން އެކުލަވާލާފައިވާ ދުނިޔޭގެ ތަރިކައިގެ ވަގުތީ ލިސްޓުގައި ހިމެނޭ ރާއްޖޭގެ ހުކުރު މިސްކިތުގެ މުންނާރެވެ. މާލޭ ހުކުރު މިސްކިތު މުންނާރަކީ އެތައް ސަތޭކަ އަހަރު ވާން ގާތް ވެފައިވާ، އަގުނުކުރެވޭނެ ފަދަ ތާރީޚީ ޖަވާހިރެކެވެ. ރައްޔިތުންގެ އަޑު އެންމެ ގާތުން އަހަން ތިބޭ އެއް މުއައްސަސާގެ ލޯގޯއަކަށް ވަކި މިފަދަ ފުރިހަމަ ލޯގޯއެއް އޮވެދާނެބާއެވެ.

ނަމަވެސް "ރީބްރޭންޑް" ކުރުމުގެ ނަމުގައި މާލޭ ސިޓީ ކައުންސިލުގެ ލޯގޯ މިވަނީ މުޅިން ބަދަލު ކޮށްލާފައެވެ. ހަތަރެސްކަން ގޮޅިތަކެއްގައި އެކި ކުލަތަކުން ޖަރީކޮށްފައިވާއިރު، ރާއްޖޭގައި ޙަރަކާތްތެރިވާ އިދިކޮޅު ސިޔާސީ ޕާޓީގެ ކުލަތައް ހުރުމަކީ އިއްތިފާޤެއް ކަމަށް ވެދާނެއެވެ. އޭރު ސަޤާފީ ތަރިކަތައް ސުންނާފަތި ކުރަމުންދިޔައިރު ހައުސިންގ މިނިސްޓަރަކަށް ހުންނެވި ބޭފުޅާ މިއަދު ހަމަ އެ ސިޓީ ކައުންސިލުގެ މޭޔަރަކަށް ހުންނެވުންވެސް ވާނީ އިއްތިފާޤަކަށެވެ. ކޮންމެ ގޮތެއް ވިޔަސް، މާލޭ ސިޓީ ކައުންސިލުގެ އައު ލޯގޯއަށް ގިނަ ބައެއްގެ ފާޑުކިއުން ދަނީ އަމާޒުވަމުންނެވެ. ގިނަ މީހުން ސިފަ ކުރަމުންދަނީ މިއީ ރީބްރޭންޑިންގ ގެ ނަމުގައި ކުޅޭ ސިޔާސީ ގޭމެއް ކަމަށެވެ.