ސަޓާ އެވޯޑް: އައްޑޫ ސިޓީއަށް ބޮޑެތި ކުރިއެރުންތަކެއް

ރާއްޖޭގެ އެންމެ ދެކުނުގެ އެއް އަތޮޅު ކަމަށްވާ އައްޑޫ ސިޓީއަކީ ތަރައްޤީވެ ކުރި އަރައިގެންދާނެ އަތޮޅެކެވެ.

ޒަމާނުއްސުރެ ރާއްޖޭގައި އޮތް އެންމެ ބޮޑު އެއަރޕޯޓުގެ ގޮތުގައި ގަމުގެ ވައިގެ ބަނދަރު ހިމެނިފައި ވެއެވެ. ނަމަވެސް ތަފާތު ސަބަބުތަކާއި ހެދި އެ ވައިގެ ބަނދަރު ތަރައްޤީ ކުރަންވާ ވަރަށް ވަނީ ނުކުރެވިފައެވެ.

އެތައް ފަހަރެއްގެ މަތިން ބައިނަލްއަޤްވާމީ ފްލައިޓް ޖެއްސޭނެ އިންތިމާޒް ހަމަޖެއްސުމަށް މަސައްކަތް ކުރަމުންގޮސް 2017 ވަނަ އަހަރުގެ މެދެއްހާ ތަނުގައި ސްރީލަކަން އެއަލައިނުން ވަނީ ގަމާއި ސްރީލަންކާއާ ދެމެދު ފްލައިޓްތައް ބާއްވަން ފަށާފައެވެ.

މިކަމުގެ ސަބަބުން ދެކުނުގެ ފަތުރުވެރިކަމަށް ރަނގަޅު އަސަރުތަކެއް އަންނަނީ ފޯރަމުންނެވެ. އެހެން ނަމަވެސް އައްޑޫގެ ގިނަ ބައެއްގެ ޝަކުވާއަކަށް ވަނީ އެކަށީގެންވާ ވަރަށް އެސަރަހައްދުގައި ޓުއަރިޒަމް ފުޅާވެގެން ނުދިޔުމެވެ. އެތައް ފަހަރަކު ހަންކެޑަ ސަރަހައްދުގައި ޓުއަރިޒަމް ތަރައްޤީ ކުރުމަށް މަސައްކަތް ފެށި ނަމަވެސް އެމަޝްރޫއު ކުރިއަށް ނުގޮސް ވަނީ މަޑު ޖެހިފައެވެ. އަދި ކެނަރީފް އާއި އީކުއޭޓަރ ވިލެޖުގެ އިތުރުން ޝަންގްރިލާއަކީ ފަތުރުވެރިކަން ދެކުނުގައި އެންމެ ކުރީ ސަފުގައި ހިދުމަތް ދެމުން އަންނަ ތަންތަނެވެ.

ކޮންމެއަކަސް މިމަހު ބާއްވަން ތައްޔާރުވަމުންދާ ބައިނަލްއަޤްވާމީ އެވޯޑެއް ކަމަށްވާ ސައުތު އޭޝިއަން ޓެރެވެލް އެވޯޑް (ސަޓާ)އަކީ އައްޑޫ ސިޓީއަށް އެތައް ގޮތަކުން ފާއިދާކުރާނެ އެވޯޑެކެވެ. މިއީ ދެކުނުގައި މިފަދަ އެވޯޑެއް ބާއްވާ ފުރަތަމަ ފަހަރެވެ. މިކަމަށް އައްޑޫ ރައްޔިތުން ދަނީ ވަރަށް ބޮޑަށް ތައްޔާރުވަމުންނެވެ.

މިމަހުގެ 26 އިން ފެށިގެން 29 ވަނަ ދުވަހާއި ހަމައަށް މި އެވޯޑް ހަފްލާއާ ގުޅިގެން ތަފާތު ގިނަ ހަރަކާތްތައް ވަނީ ރާވާފައެވެ. އަދި އައްޑޫ ސިޓީ ސާފުކުރުމުގެ ޕްރޮގްރާމްތަކެއް ވެސް ދަނީ ހިންގަމުންނެވެ. އެގޮތުން 27 ވަނަ ދުވަހު ހަވީރު އައްޑޫގެ މަސައްކަތްތެރިންގެ ހުނަރު ދައްކާލުމަށް ހަމަޖެހިފައެވެ.

މިހަފްލާގައި ބައިވެރިވުމަށް ރާއްޖޭން ބޭރުން 200 އަށް ވުރެ ގިނަ މީހުން އަންނާނެ ކަމަށް ހައިރައިޒްއިން ބުނެފައިވާއިރު އެވޯޑަށް އައްޑު އަށް 300 އަށް ވުރެ ގިނަ މީހުން ދާނެއެވެ. ދެކުނު އޭޝިޔާގެ ގައުމުތަކަށް ހުޅުވާލައިގެން ބާއްވާ އެވޯޑު މި އަހަރު އޮތީ، އައްޑޫ، އީކުއޭޓާ ވެލިޖުގައި މިމަހުގެ 26 - 28 ވަނަ ދުވަހު އެވެ.

އެވޯޑު ބާއްވާ، އީކުއޭޓާ ވިލެޖުގައި މިފަދަ ހަފްލާއެއް ފުރަތަމަ ފަހަރެއް ބާއްވާއިރު އެވޯޑަށް އަންނަ މީހުންނަށް މަރުހަބާ ކިޔަން އެ ހޮޓާ ތައްޔާރުވަމުންނެވެ. މީހުން ތިބުމާއި ކޭޓަރިންގެ ހިދުމަތް ބަލަހައްޓާނީ އީކުއޭޓަރ ވިލެޖުން ކަމަށްވާއިރު މިއީ އެތަނަށް ވެސް ލިބިގެންދާނެ ބޮޑު ކުރިއެރުމެކެވެ.

ސަރަހައްދީ ފެންވަރުގައި ބާއްވާ ސަޓާ އެވޯޑަށް 450 އަށްވުރެ ގިނަ ފަރާތްތުން ނޮމިނޭޓް ވެފައި ވެއެވެ. މި އެވޯޑު ފުރަތަމަ ބާއްވާފައި ވަނީ ސްރީލަންކާގައެވެ.

ހައިރައިޒްއިން މައުލޫމާތު ދީފައިވާ ގޮތުގައި މިހަފްލާ ފުރިހަމަކޮށް ކުރިއަށް ގެންދިއުމަށްޓަކައި ފުލުހުންނާއި ސިފައިން، ހައުސިން މިނިސްޓްރީ، ފެނަކަ، ސިޓީ ކައުންސިލް އަދި އެމްޕީއެލް އާއި ގަން އިންޓަނޭޝަނަލް އެއާޕޯޓުގެ ބޭފުޅުންނާ މިހާރު ވަނީ ބައްދަލުކޮށް ކަމާ ބެހޭ މަޝްވަރާތައް ކޮށްފައެވެ.

މިއިވެންޓު ބޭއްވުމަށް ފަހު އީކުއޭޓާ ވިލެޖަކީ މިފަދަ އިވެންޓު ބޭއްވުމަށް ނަމޫނާ ތަނެއް ކަމުގައި ދައްކައި ދިނުމަކީ އަމާޒެއް ކަމަށް ހައިރައިޒުން ބުނެފައި ވެއެވެ. މިއީ ފަހުގެ ތާރީޚެއްގައި އީކުއޭޓާ ވިލެޖުގައި މިފަދަ ބޮޑު ހަފްލާއެއް ބާއްވާ ފުރަތަމަ ފަހަރެވެ.

މި އެވޯޑްގެ އިވެލުއުޝޭންތައް ރާއްޖެ އާއި ކޮލަމްބޯ އަދި ދެކުނު އިންޑިއާގެ އިވެލުއޭޝަން ވަނީ ބާއްވާފައެވެ. މިފަހަރު މި އިވެންޓް އައްޑޫ ސިޓީގައި ބޭއްވުމަކީ ރާއްޖޭގެ ދެކުނު ފަތުރުވެރިކަމަށް ލިބިގެންދާނެ ބޮޑު ކުރިއެރުމެކެވެ.