މިމަހުވެސް އެއް ލައްކައަށްވުރެ ގިނަ ފަތުރުވެރިން ރާއްޖެ އަތުވެއްޖެ

މިހިނގާ ނޮވެމްބަރު މަހުގެ 23 ގެ ނިޔަލަށް މިމަހު 109،000 އަށްވުރެ ގިނަ ފަތުރުވެރިން ރާއްޖެ އައިސްފައިވާކަމަށް ޓުއަރިޒަމް މިނިސްޓްރީން ބުނެފިއެވެ.

ޓުއަރިޒަމް މިނިސްޓްރީން ބުނީ ނޮވެމްބަރު މަހުގެ މިހާތަނަށް ރާއްޖެ އައި ފަތުރުވެރިންގެ އަދަދު، 109،315 އަށް އަރާއިރު، ކޮވިޑް-19ގެ ކުރިން 2019 ވަނަ އަހަރުގެ މި މުއްދަތުގައި އައި ފަތުރުވެރިން 5.1 އިންސައްތަ އިތުރު ކަމަށެވެ. 2019 ވަނަ އަހަރުގެ މި މުއްދަތުގައި ރާއްޖެ އައިސްފައިވަނީ 103،981 ފަތުރުވެރިން ކަމަށް ޓުއަރިޒަމް މިނިސްޓްރީން ބުނެފައިވެއެވެ.

ޓުއަރިޒަމް މިނިސްޓްރީން ބުނީ ނޮވެމްބަރު މަހުގެ މިހާތަނަށް ދުވާލެއްގެ މައްޗަށް 4،753 ފަތުރުވެރިން ރާއްޖެ އަންނަ ކަމަށް ރެކޯޑުކުރެވިފައިވާކަމަށެވެ. އަދި އެމީހުން 8 ދުވަހު ރާއްޖޭގައި މަޑުކުރާކަމަށް ހާމަކޮށްފައިވެއެވެ.

އަހަރުގެ މިހާތަނަށް ރާއްޖެ އައި ފަތުރުވެރިންގެ އަދަދު ވަނީ 1،122،243 އަށް އަރާފައެވެ. ޖުލައި މަހުން ފެށިގެން ކޮންމެ މަހަކުވެސް ރާއްޖެ އަންނަ ފަތުރުވެރިންގެ އަދަދު އުޅެނީ އެއް ލައްކައިން މަތީގައެވެ. އެގޮތުން ޖުލައި މަހު 101،818 ފަތުރުވެރިން އައިސްފައިވާއިރު، އޮގަސްޓު މަހު 143،599 ފަތުރުވެރިން، ސެޕްޓެމްބަރު މަހު 114،896 ފަތުރުވެރިން، އޮކްޓޯބަރު މަހު 142،066 ފަތުރުވެރިން ވަނީ ރާއްޖެ އައިސްފައެވެ.

އަހަރުގެ މިހާތަނަށް ރާއްޖެ އައި ފަތުރުވެރިންގެ ތެރެއިން އެންމެ ގިނަ ފަތުރުވެރިން އައިސްފައިވަނީ އިންޑިއާއިންނެވެ. ދެވަނައަށް އެންމެ ގިނަ ފަތުރުވެރިން އައީ ރަޝިއާއިންނެވެ. އެއަށްފަހު ޖަރުމަނު، އެމެރިކާ، އިނގިރޭސިވިލާތް، ސައުދީ އަރަބިއާ، ސްޕެއިން، ޔޫކްރެއިން، ފްރާންސް އަދި ސްވިޒަރލޭންޑް މި ލިސްޓުގައި ހިމެނެއެވެ.

2020 ވަނަ އަހަރުގެ ޖުލައި 15 ގައި ރާއްޖޭގެ ފަތުރުވެރިކަން އަލުން ފަށައިގަތް ފަހުން މިއަދާ ހަމައަށް އައިއިރު، 910 ޓުއަރިސްޓު ފެސިލިޓީއަކުން ޚިދުމަތް ދެމުންދާކަމަށް ޓުއަރިޒަމް މިނިސްޓްރީން ބުނެފައިވެއެވެ. މީގެ ތެރޭގައި ހިމެނެނީ 160 ރިސޯޓު، 596 ގެސްޓްހައުސް، 144 ސަފާރީ، 10 ހޮޓެލް އެވެ. މި 910 ތަނުން ޖުމްލަ 51،922 އެނދު ޚިދުމަތަށް ހުޅުވާލާފައިވާކަމަށް ޓުއަރިޒަމް މިނިސްޓްރީން ހާމަކޮށްފައިވެއެވެ.

މިއަހަރު ނިމުމުގެ ކުރިން 1.3 މިލިއަން ފަތުރުވެރިން ގެނައުމަށް ސަރުކާރުން ވަނީ އަމާޒު ހިފާފައެވެ. ސަރުކާރުން އެންމެ ފުރަތަމަ ކަނޑައެޅީ މިއަހަރު ނިމުމުގެ ކުރިން 1 މިލިއަން ފަތުރުވެރިން ގެނައުމަށެވެ. މިދިޔަ އޮކްޓޯބަރު މަހުގެ 29 ވަނަ ދުވަހު މި އަމާޒަށް ވާސިލުވެވިފައިވާއިރު، ސަރުކާރުން ވަނީ އައު އަމާޒެއް ކަނޑައަޅައި، 1.3 މިލިއަން ފަތުރުވެރިން ގެންނަން މަސައްކަތްކުރުމަށް ނިންމާފައެވެ. މި އަމާޒަށް ވާސިލުވެވޭނެ ކަމަށް ޓުއަރިޒަމް މިނިސްޓަރ ޑރ. އަބްދުﷲ މައުސޫމް ވަނީ ވިދާޅުވެފައެވެ.