އެމްއެމްޕީއާރްސީ މައްސަލައާ ގުޅުންހުރި ފައިސާތަކެއް ދައުލަތަށް އަނބުރާ ދައްކަން ހުކުމް ކޮށްފި
ސިވިލް ކޯޓުގައި ދައުވާކުރުމުން، އެ ކޯޓުން ހުކުމް ކޮށްފައިވަނީ އެ ފައިސާ ދައުލަތަށް ނަގައިދޭން ޖެހޭ ޝަރުއީ އަދި ގާނޫނީ ސަބަބެއް ނެތް ކަމަށް
އެމްއެމްޕީއާރުސީ މައްސަލައާ ގުޅިގެން ދައުލަތަށް ގެއްލުނު ފައިސާ އަނބުރާ ދައުލަތަށް ހޯދުމަށް މަސައްކަތް ކުރޭ
އެމްއެމްޕީއާރްސީ މައްސަލައާއި ގުޅުންހުރި ފައިސާ ތަކެއް ދައުލަތަށް އަނބުރާ ދައްކަން ހައި ކޯޓުން ހުކުމް ކޮށްފިއެވެ.
ބުދަ ދުވަހު ހައި ކޯޓުން ހުކުމް ކޮށްފައިވަނީ އދ. ފުށިދިއްގާ (ރަށްދިއްގާ) 50 އަހަރަށް ކުއްޔަށް ނެގުމަށްޓަކައި، އެޗް.އެމް.އެޗް.އައި ކޮމްޕެނީ ޕްރައިވެޓް ލިމިޓެޑުން ދެއްކި 50,000 ޑޮލަރު އޭރު އެމްއެމްޕީއާރްސީގެ މެނޭޖިންގ ޑިރެކްޓަރ އަބްދުﷲ ޒިޔަތުގެ އާއިލާގެ މީހެއްގެ ކުންފުންޏަކަށް ޖަމާކޮށްފައިވާތީ، އެ ފައިސާ ދައުލަތަށް އަނބުރާ ދެއްކުމަށެވެ. އެގޮތުން 30 ދުވަހުގެ ތެރޭގައި އެ ފައިސާ އަނބުރާ ސިވިލް ކޯޓަށް ދެއްކުމަށް ވަނީ ހުކުމް ކޮށްފައެވެ.
މި ފައިސާ ހޯދުމަށް ޓޫރިޒަމް މިނިސްޓްރީގެ ފަރާތުން ސިވިލް ކޯޓުގައި ދައުވާކުރުމުން، އެ ކޯޓުން ހުކުމް ކޮށްފައިވަނީ އެ ފައިސާ ދައުލަތަށް ނަގައިދޭން ޖެހޭ ޝަރުއީ އަދި ގާނޫނީ ސަބަބެއް ނެތް ކަމަށެވެ.
ސިވިލް ކޯޓުގެ އެ ހުކުމް ދައުލަތުން ހައިކޯޓުގައި އިސްތިއުނާފުކުރިއެވެ. އެ މައްސަލާގައި ހައިކޯޓުން ކުރި ހުކުމްގައިވާ ގޮތުގައި އެ ޗެކަކީ އެޗް.އެމް.އެޗް.އައި ކޮމްޕެނީ ޕްރައިވެޓް ލިމިޓެޑުން އެމް.އެމް.ޕީ.އާރު.ސީއަށް ދޫކޮށްފައިވީ ޗެކެއް ނަމަވެސް، ޗެކުގައި އެކައުންޓް ޕޭއީ ނުޖަހައި ދެވުމުގެ ސަބަބުން އެ ޗެކް އެމް.އެޗް.އާރު ޓްރޭޑިންގ ކިޔާ ކުންފުންޏެއްގެ ނަމުގައި ޖަމާވެފައިވާކަމަށް ބަޔާންކޮށްފައިވެއެވެ.
ކޯޓަށް ހުށަހެޅުނު ލިޔުންތަކަށް ބަލާއިރު، އެމްއެމްޕީއާރްސީން އެޗް.އެމް.އެޗް.އައި ކޮމްޕެނީއަށް ފޮނުވާފައިވާ ސިޓީގައި އދ.ފުށިދިއްގާ ކުއްޔަށް ނެގުމަށް އެ ކޮމްޕެނީން ދޫކުރި ޗެކް ލިބިފައިވާ ކަމުގައި ބުނެ އެމްއެމްޕީއާރްސީގެ ފަރާތުން އަބްދުﷲ ޒިޔަތު ސޮއި ކޮށްފައިވާކަން އެނގެއެވެ. އަދި އެ ޗެކް ސްޓޭޓް ބޭންކް އޮފް އިންޑިއާގައި ހުޅުވާފައިވާ އެމް.އެޗް.އާރުގެ އެކައުންޓަށް ޖަމާވެފައިވާކަން އެ ބޭންކުން ފޮނުވާފައިވާ ސިޓީއަކުންނާއި އެމްއެޗްއާރްގެ ބޭންކް ސްޓޭޓްމެންޓުން އެނގެއެވެ. އަދި ހުށަހެޅުނު ލިޔެކިޔުންތަކުން އެ ޗެކަކީ، އެޗް.އެމް.އެޗް.އައި ކުންފުނިން އެމްއެމްޕީއާރްސީއަށް ދޫކުރި ޗެކެއްކަން އެނގެން އޮންނަ ކަމަށް ހުކުމުގައި ވެއެވެ.
އެ ޗެކް ޖަމާވި އެމް.އެޗް.އާރް ޓްރޭޑިންގ އަކީ އަބްދުﷲ ޒިޔަތުގެ ބޮޑުބޭބެގެ ކުންފުންޏެކެވެ.
އެމް.އެޗް.އާރް ޓްރޭޑިންގެ ފަރާތުން އައު ހެކީގެ ގޮތުގައި އޭސީސީގެ ތަހުގީގު ރިޕޯޓުގެ ބައެއް ސަފްހާ ހުށަހެޅިއެވެ. އެ ރިޕޯޓުގައި ޒިޔަތު ފާހަގަކޮށްފައިވާ ބައެއް ކަންކަން ވަނީ ހުށަހަޅާފައެވެ. އދ.ފުށިދިއްގާއާ ގުޅިގެން އެ ރިޕޯރޓުގައިވާ މައިގަނޑު ނުކުތާގެ ދަށުން ފާހަގަކޮށްފައިވާ ހުރި ވާހަކަތަކަށް ބަލާއިރުވެސް އެ ޗެކްގެ ފައިސާ އެމް.އެޗް.އާރު އަށް ހައްގުވާ ގޮތެއް އެނގޭފަދަ މުއާމަލާތަކާ ގުޅޭ އެއްވެސް ވާހަކައެއް ނެތް ކަމަށް ހުކުމުގައި ވެއެވެ.
ޒިޔަތު ވަނީ ފުށިދިއްގާއާ ގުޅޭ މުއާމަލާތްތަކުގެ ސައްހަކަމާމެދު ސުވާލު އުފައްދާފައެވެ. ނަމަވެސް އެ ބަޔާނުގައި ޗެކްގައި އެމް.އެޗް.އާރް ޖެހީ ކީއްވެކަން ނޭނގޭ ކަމާއި އެ ޗެކާ ހަވާލުވި ހަނދާނެއް ނެތް ކަމަށް ޒިޔަތު ބުނެފައިވެއެވެ.
އެ ކުންފުންޏަކީ ޒިޔަތުގެ ބޮޑުބޭބެއެއްގެ އާއިލާ މީހެއްގެ ކުންފުންޏެއްކަން އޭނާގެ ބަހުން ވެސް އެނގެން އޮތްއިރު, މުއާމަލާތް ހިނގާފައިވާ ގޮތް ކަމަށް ދައުލަތުން ބުނަމުން އަންނަ ބުނުމުގެ ތެދު ކަމަށް އިތުރު ބުރަދަނެއް ލިބޭ ކަމަށް ހުކުމްގައިވެއެވެ.
އެ ޗެކް އެމް.އެޗް.އާރުގެ އެކައުންޓަށް ޖަމާވެފައިވާކަން ނަފީވެގެންދާފަދަ ކަމެއްވެސް ނެތެ ކަމަށް ބުނެފައިވެއެވެ.
އެމް.އެޗް.އާރުން މަސައްކަތް ކޮށްފައިވަނީ އެ ޗެކަކީ ޑޮލަރު މާރުކުރުމުގެ މުއާމަލާތެއްގެ ތެރެއިން ލިބުނު ޗެކެއްކަން ސާބިތުކޮށްދިނުމަށެވެ. ނަމަވެސް, އެކަން އެ ކުންފުނިން ހުށަހެޅި ލިޔުންތަކުން ސާބިތު ކޮށްދެވިފައެއް ނުވެއެވެ..
މި މައްސަލަ ބެއްލެވީ ފަނޑިޔާރު ހުސެއިން މަޒީދާއި ފަނޑިޔާރު އަބްދުالله ހަމީދު އަދި ފަނޑިޔާރު އަލީ ސަމީރެވެ.
