ގާސިމް ބަންދު ކުރި މައްސަލައާ މެދު ގޮތެއް ނިންމުން މާދަމާ
ގާސިމް ބަންދުގެ މައްސަލާގައި ހުކުމް ކުރުން ތާވަލް ކޮށްފައި ވަނީ މާދަމާ މެދުރު ފަހު 1:30 އަށް
ޖޭޕީގެ ލީޑަރު ގާސިމް އިބްރާހީމް
ޖުމްހޫރީ ޕާޓީގެ ލީޑަރު އަދި މާމިގިލީ ދާއިރާގެ މެމްބަރު ގާސިމް އިބްރާހިމް ބަންދުކުރި މައްސަލައިގައި ހުކުމް ކުރުން މާދަމާ އަށް ހައިކޯޓުގައި ތާވަލް ކޮށްފިއެވެ.
ކްރިމިނަލް ކޯޓުން ގާސިމްގެ ބަންދަށް 15 ދުވަސް ޖެހި މައްސަލައިގެ އިސްތިއުނާފުގެ އަޑުއެހުން ހައިކޯޓުގައި އެންމެ ފަހުން ބާއްވާފައި ވަނީ އާދީއްތަ ދުވަހު މެންދުރު 1:45 ގައެވެ. އަދި އެ ދުވަހުގެ އަޑުއެހުމަށް ފަހު ފަނޑިޔާރުންގެ ބެންޗުން ބުނެފައި ވަނީ މައްސަލައިގެ ހުކުމް ކުރުން ބާއްވާނެ ތާރީހެއް އިއުލާން ކުރައްވާނެ ކަމަށެވެ. އެގޮތުން ގާސިމް ބަންދު ކުރި މައްސަލައާ މެދު ހުކުމް ކުރުން ހައިކޯޓުފައި ތާވަލް ކޮށްފައި ވަނީ ހޯމަ ދުވަހު މެންދު 1:30 އަށެވެ.
ގާސިމް ހައްޔަރުކުރަން ކްރިމިނަލް ކޯޓުގެ އިސް ގާޒީ ނެރުއްވި އަމުރުގައި ވަނީ ރައްޔިތުންގެ މަޖިލިހުގެ ރައީސާއި ނައިބު ރައީސްގެ އިތުބާރު ނެތްކަމަށް ހުށަހެޅޭނީ 42 މެމްބަރުންގެ ސޮޔާއެކު ކަމަށް މި މަހުގެ 10 ގައި ފާސްކުރުމާ ގުޅިގެން، މަޖިލިހުގެ ރައީސް އަބްދުﷲ މަސީހުގެ އިތުބާރު ނެތް ކަމަށް ހުށަހެޅުމަށްޓަކައި 42 މެމްބަރުންގެ ސޮއި ހޯއްދެވުމަށް މެމްބަރުންނަށް ގާސިމް އެކި ގޮތްގޮތުން ނުފޫޒު ފޯރުވަމުންދާ ކަމަށެވެ. އަދި ސަލާމަތީ ބާރުތަކުގައި މަސައްކަތް ކުރާ ފަރާތްތަކާއި ފަނޑިޔާރުންނަށް ނުފޫޒު ފޯރުވަން މަސައްކަތް ކޮށް އަދި ރައްޔިތުންގެ މެދުގައި ފިތުނަ އާއި ބިރުވެރިކަން އުފެއްދުމަށް ގާސިމް މަސައްކަތް ކުރާ ކަމުގެ ތުހުމަތު ވެސް ކޯޓު އަމުރުގައި ކޮށްފައި ވެއެވެ.
ގާސިމް ބަންދުގެ ކުރި މައްސަލަިއގެ އިސްތިއުނާފްހެ ޝަރީއަތަށް ފަހު، ނޫސްވެރިންނަށް މައުލޫމާތުދެއްވަމުން ހިސާން ވިދާޅުވެފައި ވަނީ އާދިއްތަ ދުވަހުގެ އޮތް ޝަރީއަތުގެ އަޑު އެހުމުގައި ގިނަ ކަންތައްތަކެއް ގާނޫނީ ވަކީލުންގެ ޓީމުން ފާހަގަކޮށްފައިވާ ކަމަށެވެ. އެގޮތުން އަމުރުގެ ސައްހަކަމާ މެދު ގޮތެއް ނިންމެވުމަށް އިންނެވި ގާޒީ އަކީ އަމުރު ނެރުއްވި ފަރާތަށް ވާތީ އެކަން ފާހަގަކުރެއްވި ކަމަށް ހިސާން ވިދާޅުވި އެވެ.
އިމްތިޔާޒް ގާނޫނުގެ 13 ވަނަ މާއްދާގައި ބަޔާންކޮށްފައިވާ ގޮތާ ހިލާފަށް ގާސިމްގެ ބަންދުގެ މުއްދަތު އިތުރުކުރުމުގައި އަމަލުކޮށްފައިވާ ކަން ވެސް ފާހަގަކުރެއްވި ކަމަށް ހިސާން ވިދާޅުވި އެވެ. އޭނާ ވިދާޅުވީ، އިމްތިޔާޒު ގާނޫނުގައި ބަންދާ މެދު ގޮތެއް ނިންމެވުމަށް ވެސް ކޯޓަށް ހުށަހަޅަން ޖެހެނީ ޕްރޮސެކިއުޓަރ ޖެނެރަލްގެ އޮފީހުން ކަމަށްވާ އިރު ބަންދުގެ މުއްދަތު އިތުރު ކުރުމަށް ހުށަހަޅާފައި ވަނީ ފުލުހުން ކަމަށެވެ. މީގެ އިތުރުން ގާސިމް ބަންދުގައި ބަހައްޓާފައިވަނީ އެއްވެސް ހެއްކެތް ނެތި ކަމަށް ހިސާން ވިދާޅުވި އެވެ.
"ބަންދުގެ މުއްދަތުގެ މަޖިލީސް ބަންދުކުރެވިގެން ސިއްރުކުރެވިގެން ހިންގިފައި ވަނީ ގާނޫނީ އިޖުރާއަތްތަކާއި ހިލާފަށް. ދެން ޕްރޮސެކިއުޓަރ ޖެނެރަލްގެ ފަރާތްޕުޅުން ދެއްކެވި ވާހަކަފުޅުގައި، ފާހަގަކޮށްލަން ބޭނުން އެބޭފުޅުންވެސް ފާހަގަކޮށްފައިވޭ، މޯލްޑިވްސް ޕޮލިސް ސަރވިސް އިންކަން ފޯމް ހުށަހެޅީ ކްރިމިނަލް ކޯޓަށް، ގާސިމްގެ ބަންދުގެ މުއްދަތު އިތުރު ކުރުމަށް އެދި. އެއްވެސް ލިޔެކިއުމެއް ޕްރޮސެކިއުޓަރ ޖެނެރަލްގެ އޮފީހުން ކްރިމިނަލް ކޯޓަށް އެކަމާ ގުޅިގެން ފޮނުވާފައިނުވާނެ ކަމައި ހަމައެކަނި އަނގަބަހުން ކަމަށް އެދިފައިވާ އެދުމެއް އެދިފައި ވަނީ." ހިސާން ވިދާޅުވި އެވެ.
ޕީޖީ އޮފީހުން އަނގަބަހުން ކޯޓު އަމުރު ނެރުމަށް އެންގި ކަމަށް ބުނެފައިވާ އިރު، އާއްމުގޮތެއްގައި ކޯޓު އަމުރު ނެރުމަށާއި މުއްދަތު އިތުރު ކުރަނީ ލިޔުމުން ހުށަހަޅާއިގެންނެވެ. މީގެ އިތުރުން މީހަކު ހައްޔަރު ކުރުމަށް ނެރޭ އަމުރެއްގެ ސައްހަކަމާއި މެދު ގޮތެއް ނިންމުމަށް އިނުމަކީ މައްސަލައެއް ނޫން ކަމަށް ޕީޖީ އޮފީހުގެ ގާނޫނީ ވަކީލުން ހާމަކޮށްފައިވާ ކަމަށް ހިސާން ވިދާޅުވި އެވެ.
" ދުނިޔޭގައި ކުރިއަރާފައިވާ މުޖުތަމައުތަކުގަ އާއި އަދި އަޅުގަނޑުމެންގެ ކޯޓުތަކުގައި އާއްމުކޮށް އަމަލުކުރާ އުސޫލުތަކަށްބަލާ އިރު، މިސާލަކަށް ދަންނަވާނަމަ ހައިކޯޓުގައިވެސް އެއް މައްސަލައެއް ނިންމަވާ ފަނޑިޔާރަކު އެމައްސަލައާއި ގުޅިގެން ހުށަހެޅޭ އެހެން މައްސަލަތަކުގައިވެސް ބެންޗުގައި ބައިވެރިވެވަޑައި ނުގަންނަވާކަން ފާހަގަކުރިން." ހިސާން ވިދާޅުވި އެވެ
އޭޕްރީލް 6 ގައި ގާސިމް ބަންދުކުރި މައްސަލައިގައި ހައިކޯޓުން ވަނީ އިމްތިޔާޒުގެ ގާނޫނާ ހިލާފަށް ބަންދުކޮށްފައިވާ ކަމަށް ކަނޑައަޅާފަ އެވެ. އެއާއެކު އެފަހަރު ގާސިމް ދޫކޮށްލުމަށް ފަހު، އޭޕްރީލް 20 ވަނަ ދުވަހު އަލުން ހައްޔަރުކުރި އެވެ. އެއަށް ފަހު، ކޯޓުން ވަނީ ގާސިމްގެ ބަންދަށް 15 ދުވަހުގެ މުއްދަތު ޖަހައިދީފަ އެވެ.
