9 ރަށެއް ފިޔަވައި ހުރިހާ ރަށަކުން 90 އިންސައްތައަށްވުރެ އިތުރަށް ވެކްސިން ފުރިހަމަކޮށްފި
2 ވަނަ ޑޯޒް ޖެހިތާ 6 މަސް ވެފައިވާ މީހުން ބޫސްޓަރ ޑޯޒް ވީ އެންމެ އަވަހަކަށް ޖެހުމަށް އިލްތިމާސްކުރޭ
ވެކްސިން ޖެހުމުގެ ގައުމީ ކެމްޕޭންގެ ތެރެއިން ޓްރީ ޓޮޕް ހޮސްޕިޓަލުގައި ވެކްސިން ދިނުމުގެ މަސައްކަތް ކުރިއަށް ދަނީ
ކޮވިޑް-19 އާއި ދެކޮޅަށް ފެށި ވެކްސިން ކެމްޕޭންގެ ތެރެއިން، ރާއްޖޭގެ 9 ރަށެއް ފިޔަވައި ހުރިހާ ރަށެއްގައި ވެސް 90 އިންސައްތައަށްވުރެ މަތިން ވެކްސިން ފުރިހަމަކޮށްފައިވާ ކަމަށް ހެލްތް އިމަރޖެންސީ އޮޕަރޭޝަން ސެންޓަރ (އެޗްއީއޯސީ) އިން ބުނެފިއެވެ.
ގިނަ ދުވަސްތަކަކަށް ފަހު އެޗްއީއޯސީން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެޗްއީއޯސީގެ އިމިއުނައިޒޭޝަން ޕްރޮގްރާމުގެ ފަރާތުން ހައްވާ ގުރައިޝާ ވިދާޅުވީ ރާއްޖޭގެ ވެކްސިން ކަވަރޭޖަށް ބަލާއިރު، ރާއްޖޭގެ 9 ރަށެއް ފިޔަވައި ހުރިހާ ރަށަކުން 90 އިންސައްރައަށްވުރެ އިތުރަށް ކަވަރޭޖް ހަމަކޮށްފައިވާ ކަމަށެވެ. އެހެންކަމުން މިހާތަނަށް 178 ރަށަކުން ވަނީ ވެކްސިންގެ 90 އިންސައްތައަށްވުރެ މަތިން ކަވަރޭޖް ހަމަކޮށްފައެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ) ގެ ތަފާސް ހިސާބުތައް ދައްކާގޮތުން، މިހާތަނަށް ފުރަތަމަ ޑޯޒް 395،000ށް ވުރެ ގިނަ މީހުން ވަނީ ޖަހާފައެވެ. އަދި މީގެ ތެރެއިން 362،000ށް ވުރެ ގިނަ މީހުން ވެކްސިން ވަނީ ފުރިހަމަކޮށްފައެވެ. ގުރައިޝާ ވިދާޅުވީ ރާއްޖޭގައި މިހާތަނަށް 7200ށް ވުރެ ގިނަ މީހުން ބޫސްޓަރ ޑޯޒް ޖަހާފައިވާ ކަމަށެވެ.
ރާއްޖޭގައި ބޫސްޓަރ ޑޯޒްގެ ގޮތުގައި ދެނީ ފައިޒާ ވެކްސިނެވެ. އެއީ ރާއްޖޭގައި ދޭ ވެކްސިންތަކުގެ ތެރެއިން ކޮވިޝީލްޑް، އެސްޓްރަޒްނިކާ، ސިނޮފާމް އަދި ފައިޒާ ވެކްސިންގެ ތެރެއިން ވެކްސިނެއް ޖަހާފައިވީ ނަމަވެސް، ދެވަނަ ޑޯޒް ޖަހާފައިވާ ފަހުން 6 މަސް ވެފައިވާ މީހުންނަށެވެ.
ގުރައިޝާ ވިދާޅުވީ މިހާރު ބޫސްޓަރ ޑޯޒް ދެމުން އަންނަ މީހުންގެ އިތުރުން އިތުރު ކެޓަގަރީތަށް ކުރިއަށް އޮތްތަނުގައި ހުޅުވާލާނެ ކަމަށެވެ. އަދި ބޫސްޓަރ ޑޯޒްގެ މުހިންމުކަން ތަފާސް ހިސާބުތަކުން ފެންނަ އެބަހުރި ކަމަށާއި، ކޮވިޑް ބައްޔަށް ފަރުވާ ހޯދަމުންދާ މީހުންގެ ތެރެއިން، އުމުރުން 60 އަހަރުގެ މީހުންގެ ތެރެއިން 2 ޑޯޒް ޖަހާފައިވާ މީހުންގެ ސިވިއަރިޓީ ބޫސްޓަރ ޑޯޒް ޖަހާފައިވާ މީހުންގެ ސިވިއަރިޓީ ދަށް ކަމަށެވެ.
ރަށްރަށުގައި ތިބި، ކޮވިޑް-19 ވެކްސިންގެ ބޫސްޓަރ ޑޯޒް ޖެހުމަށް ޝަރުތު ހަމަވާ މީހުން އެރަށެއްގެ ހެލްތް ސެންޓަރ ނުވަތަ ހޮސްޕިޓަލް މެދުވެރިކޮށް ވެކްސިން ޖެހުމަށް އެޕޮއިންޓްމެންޓް ހެއްދޭނެ ކަމަށް އެޗްޕީއޭއިން ބުނެއެވެ. މާލެ ސަރަހައްދުގައި ބޫސްޓަރ ޑޯޒް ޖަހަމުން ދަނީ އައިޖީއެމްއެޗް، ހުޅުމާލެ ހޮސްޕިޓަލް އަދި އޭޑީކޭއިންނެވެ.
