ބެންފީކާއާ އެއްވަރުވެ ބާސާއަށް ޕްރެޝަރު

ޔުއެފާ ޗެމްޕިއަންސް ލީގުގައި އަންގާރަ ދުވަހުގެރޭ ކުޅުނު މެޗުން ބެންފީކާއާ އެއްވަރުވެ، ދެވަނަ ބުރުން ފުރުސަތު ހޯދަން ބާސެލޯނާއަށް ޕްރެޝަރު ބޮޑުވެއްޖެއެވެ.

ބާސާގެ ދަނޑުގައި ކުޅުނު މެޗު އެއްވަރުވީ ދެ ޓީމުން ކުރެ ޓީމަކަށް ލަނޑެއް ނުޖެހިއެވެ. މި މެޗަކީ ބާސާގެ އައު ކޯޗު ޒަވީ ހެނާންޑޭސްގެ އިރުޝާދުގެ ދަށުން ޗެމްޕިއަންސް ލީގުގައި އެ ޓީމުން ކުޅުނު ފުރަތަމަ މެޗެވެ.

އަންގާރަ ދުވަހުގެރޭ ކުޅުނު މެޗުގައި ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު، މި މެޗުގައި ލަނޑެއް ޖަހަން ދެ ޓީމަށްވެސް ރަނގަޅު ފުރުސަތުތަކެއް ލިބިގެންދިޔައިރު، ފުރަތަމަ ހާފުގައި ބާސާގެ ޖޯޑީ އަލްބާ ފޮނުވާލި ނުރައްކާތެރި ހަމަލާއެއް ބެންފީކާގެ ގޯލްކީޕަރު ވަނީ ދިފާއުކޮށްފައެވެ. އަދި އޭގެ އިރުކޮޅެއް ފަހުން ކޯނަރަކުން ރޯމަން ޔަރެމްޗަކް ފޮނުވާލި ހަމަލާއެއް ބާސާގެ ގޯލްކީޕަރު މާކް-އަންދްރޭ ޓާ ސެޓެގެން ވަނީ ހުއްޓުވާފައެވެ.

އޭގެ ފަހުން މި މެޗުގައި ބާސާގެ ޔޫސުފް ޑެމީރް ޖެހި ބޯޅައެއް ވަނީ ގޯލުގެ ހުރަސްދަނޑިއަށް އަމާޒުވެފައެވެ. އަދި އެ ޓީމުގެ މެމްފިސް ޑިޕާއިއަށްވެސް ވަނީ ލަނޑު ޖަހަން ރަނގަޅު ފުރުސަތުތަކެއް ލިބި ބޭކާރުވެފައެވެ.

ގްރޫޕް ސްޓޭޖުގައި ކޮންމެ ޓީމަކަށްވެސް ބާކީ އެއް މެޗު އޮތްއިރު، ގްރޫޕް އީގެ އެއްވަނައިގައި އޮތީ ކުޅުނު ފަސް މެޗުންވެސް މޮޅުވެ، 15 ޕޮއިންޓް ހޯދާފައިވާ ބަޔާން މިއުނިކެވެ. ދެވަނަ ބުރުގެ ޖާގައެއް މީގެ ކުރިން ކަށަވަރުކޮށްފައިވާ ބަޔާނުން ގްރޫޕް ސްޓޭޖުގައި އަންގާރަ ދުވަހުގެރޭ ކުޅުނު މެޗުން ވަނީ ރަށުން ބޭރުގައި ކުޅެ ޑީނަމީ ކިއޭވް އަތުން 2-1 ގެ ނަތީޖާއަކުން މޮޅުވެފައެވެ.

މި ގްރޫޕުގެ ދެވަނައިގައި ބާސާ އޮތީ ފަސް މެޗުން ހަތް ޕޮއިންޓާއެކުއެވެ. ތިންވަނައިގައި އޮތް ބެންފީކާއަށް ފަސް މެޗުން ޕޮއިންޓް ލިބިފައިވާއިރު، ފުލުގައި ކިއޭވް އޮތީ ފަސް މެޗުން އެންމެ ޕޮއިންޓަކާއެކުއެވެ. އެހެންކަމުން ބާސާއަށް ގަދަ 16 ގެ ޖާގައެއް ލިބޭނީ ގްރޫޕް ސްޓޭޖުގެ ފަހު މެޗުން ރަށުން ބޭރުގައި ބަޔާންގެ މައްޗަށް ކުރި ހޯދައިގެންނެވެ.