ތަމްރީނު ކޭމްޕަށް މާޒިޔާ ޓީމު ކެނދިކުޅުދޫއަށް

ކުރިއަށް އޮތް ފުޓްބޯޅަ ސީޒަނަށް ތައްޔާރުވުމުގެ ގޮތުން އެންމެ ފަހުގެ ލީގު ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަނުން ތަމްރީނު ކޭމްޕަކަށް ނ. ކެނދިކުޅުދޫއަށް ގޮސްފިއެވެ.

ކުރިއަށް އޮތް ސީޒަނަށް މާޒިޔާއިން ވަނީ އެ ޓީމުގެ އައު ކޯޗުގެ މަގާމަށް ޕްރޯ ލައިސަންސް ކޯޗު މުޙައްމަދު ޝިޔާޒް (މޯހަން) ހަމަޖައްސާފައެވެ. މޯހަން އާއެކު މި މަހުގެ އެއްވަނަ ދުވަހު މާޒިޔާއިން ފަރިތަކުރުންތައް ފެށި ނަމަވެސް، އެ ފަހަރުގެ ފަރިތަކުރުންތަކުގައި ގައުމީ ޓީމުގައި ހިމެނޭ ކުޅުންތެރިން ބައިވެރިވެފައެއް ނުވެއެވެ. އެކަމަކު ސްރީ ލަންކާގައި ނިމުނު މަހިންދަ ރާޖަޕަކްސަ ޓްރޮފީ (ފޯ ނޭޝަންސް ކަޕް) އަށްފަހު ދާދި ފަހުން ގައުމީ ފުޓްބޯޅަ ޓީމުގެ ކުޅުންތެރިން ވަނީ މާޒިޔާގެ ފަރިތަކުރުންތަކަށް ނުކުމެފައެވެ.

އެއާއެކު އަންގާރަ ދުވަހުގެ ވަގުތެއްގައި މާޒިޔާއިން ވަނީ 10 ދުވަހުގެ ތަމްރީނު ކޭމްޕަކަށް ކެނދިކުޅުދޫއަށް ގޮސްފައެވެ. ކެނދިކުޅުދޫގައި މާޒިޔާގެ އެކެޑަމީގެ މަސައްކަތްތައް ފަށަންވެސް ދާދި ފަހުން އެއްބަސްވެފައިވާއިރު، މާޒިޔާ އާއި ކެނދިކުޅުދޫ ކައުންސިލުން ގުޅިގެން ކުރިއަށްގެންދާ އެ އެކެޑަމީގެ ކަންކަން މި ކޭމްޕުގެ ތެރެއިން ރަސްމީކޮށް ފެށިގެންދާނެ ކަމަށް މައުލޫމާތުލިބެއެވެ.

މާޒިޔާއިން ކެނދިކުޅުދޫގައި ކޭމްޕުކުރާއިރު، ކުރިއަށް އޮތް ސީޒަނަށް ސްކޮޑު ވަރުގަދަކުރުމުގެ ގޮތުން މާޒިޔާއިން ދާދި ފަހުން ވަނީ ގައުމީ ފުޓްބޯޅަ ޓީމުގެ ކެޕްޓަން އަކުރަމް އަބްދުލް ޣަނީ (އަކޫ) އާއި، ޒުވާން ޑިފެންޑަރު ހައިޝަމް ހަސަން (ބިޑި) އަދި ނޭޕާލުގެ ގައުމީ ފުޓްބޯޅަ ޓީމުގެ އެއްވަނަ ގޯލްކީޕަރު ކިރަން ކުމާރް ލިމްބޫގެ ސޮއިވެސް ހޯދާފައެވެ.

އަންނަ ޑިސެމްބަރު މަހުގެ 15 ވަނަ ދުވަހު ރާއްޖޭގެ ފުޓްބޯޅަ ސީޒަން ފަށާއިރު، ސީޒަން ފެށުމަށް ކުޅޭ ޗެރިޓީ ޝީލްޑް މެޗުގައި ބައްދަލުކުރާނީ މާޒިޔާ އާއި މިދިޔަ ސީޒަނުގެ ލީގުގެ ދެވަނަ ހޯދި ކުލަބު ވެލެންސިއާއެވެ. މިދިޔަ ސީޒަނުގެ ޗެރިޓީ ޝީލްޑް މެޗުގައިވެސް މާޒިޔާ ވާދަކުރިއިރު، އެ މެޗުން ކުލަބު އީގަލްސް ވަނީ މާޒިޔާ ބަލިކޮށް މުޅިން އަލަށް ޗެރިޓީ ޝީލްޑް އުފުލާލާފައެވެ. އޭރު އީގަލްސްގެ ކޯޗަކަށް ހުރީ މިހާރު މާޒިޔާގެ ކޯޗު މޯހަންއެވެ.

ޗެރިޓީ ޝީލްޑް މެޗަށްފަހު ޑިސެމްބަރު މަހު ޕްރެޒިޑެންޓްސް ލީގު ފަށާއިރު، ކުރިއަށް އޮތް ސީޒަނުގެ ދިވެހި ޕްރިމިއާ ލީގު ފެށުމަށް ތާވަލުކޮށްފައިވަނީ އަންނަ އަހަރުގެ ފެބްރުއަރީ މަހުގެ ތެރޭގައެވެ. މާޒިޔާއަކީ އެންމެ ފަހުގެ ދެ ސީޒަނުގެވެސް ލީގު ޗެމްޕިއަނުންނެވެ.