ކޮވިޑްގެ އައު ސަރޖާއެކު އަޅަމުންދާ ފިޔަވަޅުތަކާއި ގުޅިގެން ޔޫރަޕްގެ އެކި ހިސާބުތަކުގައި މުޒާހަރާތައް
އޮސްޓްރިއާ، ސްވިޒެލެންޑް، ކްރޮއޯޝިޔާ، އިޓަލީ، ނޮދަރން އައިލެންޑް އަދި ނެދަރލެންޑްގައި އަންނަނީ މުޒާހަރާތައް ކުރަމުން
އޮސްޓްރިއާ ގައި ކުރިޔަށްދާ މުޒާހަރާގެ ތެރެއިން
ޔޫރަޕަށް މިވަގުތު ކުރިމަތިވެފައިވަ ކޮވިޑް-19ގެ އައު ސަރޖާއެކު ކޮވިޑް ކޮންޓްރޯލްކުރުމަށް އަޅަމުންދާ ފިޔަވަޅުތަކުގެ ސަބަބުން ހިތްހަމަނުޖެހި ޔޫރަޕްގެ އެކި ގައުމުތަކުގައި މުޒާހަރާކުރަން ފަށައިފިއެވެ.
އެގޮތުން އޮސްޓްރިއާ އިން ލޮކްޑައުންކުރާނެ ކަން އިއުލާންކުރުމުން އެގައުމުގެ ކަނާތު ފިޔައިގެ ގިނަ ގްރޫޕްތަކަކުން ވަނީ މަގުތަކަށް ނިކުމެ އެކަމާއި ދެކޮޅަށް އަޑުއުފާލާފައެވެ. މީގެއިތުރުން ސްވިޒެލެންޑް، ކްރޮއޯޝިޔާ، އިޓަލީ، ނޮދަރން އައިލެންޑް އަދި ނެދަރލެންޑްގައިވެސް ވަނީ ކޮވިޑް ކޮންޓްރޯލްކުރުމަށް އަޅާފައިވާ ފިޔަވަޅުތަކާ ދެކޮޅަށް މުޒާހަރާތައް ކޮށްފައެވެ.
މީގެތެރެއިން ބައެއް މުޒާހަރާތައް ކޮންޓްރޯލްކުރުމަށް ފުލުހުން ގެންދަނީ ބާރުގެ ބޭނުންވެސް ހިފަމުންނެވެ. މުޒާހަރާކުރާ މީހުން ދެކޮޅު ހަދަމުންދަނީ ވައިރަސް ފެތުރުން ކޮންޓްރޯލްކުރުމަށް އަޅާފައިވާ ފިޔަވަޅުތަކާއި ރެސްޓޯރެންޓްތަކާއި، ކްރިސްމަސް މާރުކޭޓް އަދި ކުޅިވަރު މުބާރާތްތައް ހިންގާ ތަންތަނަށް ވަނުމުގެ ކުރިން ކޮވިޑް ވެކްސިން ޖަހާފައިވާކަން އަންގައިދޭ ޕާސް ދައްކަން މަޖުބޫރުކުރުމާއެވެ.
ޔޫރަޕްގެ ބައެއް ގައުމުތަކުގައި މިހާރު ވަނީ ހުރިހާ ރައްޔިތުން ވެކްސިން ޖެހުމަށް މަޖުބޫރުކޮށްފައެވެ. އަދި އެކަމާމެދު އަނެއް ބައި ގައުމުތަކުން ވިސްނަމުންދާކަން ވަނީ ހާމަކޮށްފައެވެ. ޔޫރަޕްގެ ގައުމުތަކުގައި ކޮވިޑްގެ ކޭސްތައް އިތުރުވާން ފެށުމުން އެންމެ ފުރަތަމަ ލޮކްޑައުންގެ ފިޔަވަޅުތައް އަޅަންފެށީ ވެކްސިން ނުޖަހާ ތިބި މީހުންނަށެވެ. ނަމަވެސް ހާލަތު ގޯސްވާން ފެށުމުން ބައެއް ގައުމުތަކުގައި ވެކްސިން ޖަހާފައި ތިބި މީހުންނަށްވެސް އެފިޔަވަޅުތައް ގެންދަނީ ތަންފީޒުކުރަމުންނެވެ.
ހުޅަނގު ޔޫރަޕްގެ ގައުމެއްކަމުގައިވާ އޮސްޓްރިއާ ވަނީ ހަތަރު ވަނަ ފަހަރަށް ލޮކްޑައުންކޮށްފައެވެ. އޮސްޓްރިއާ ސަރުކާރުން ބުނެފައިވަނީ ލޮކްޑައުން ކޮށްފައިވަނީ 10 ދުވަހުގެ މުއްދަތަށްކަމަށެވެ.
