ޒުވާން ޑިފެންޑަރު ހައިޝަމް ހަސަން (ބިޑި) ރާއްޖޭގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަނަށް ސޮއިކޮށްފިއެވެ.
އުމުރުން 22 އަހަރުގެ ހައިޝަމް މީގެ ކުރިން ކުޅެމުން އައީ ކުލަބު އީގަލްސްއަށެވެ. އެކަމަކު ހޯމަ ދުވަހު މާޒިޔާއިން ހައިޝަމްގެ ސޮއި ހޯދިކަން އިއުލާންކުރިއިރު، އޭނާ ވަނީ މާޒިޔާއާއެކު ތިން އަހަރުގެ އެއްބަސްވުމެއް ހަދާފައެވެ.
މި ފަހަރުގެ ސާފް ޗެމްޕިއަންޝިޕުގައި ވިދާލި ހައިޝަމް އެންމެ ފުރަތަމަ 2017 ވަނަ އަހަރު އީގަލްސްގެ ޒުވާން ޓީމާ ގުޅުނީ އެ އަހަރުގެ ޔޫތު މުބާރާތް ކުޅުމަށެވެ. އެ ފަހަރު ހައިޝަމް ވަނީ އީގަލްސްއާއެކު އެ މުބާރާތް ކާމިޔާބުކޮށްފައެވެ. އެއާއެކު 2018 ވަނަ އަހަރު އީގަލްސްގެ ސީނިއާ ޓީމުން ހައިޝަމަށް ފުރުސަތު ލިބިގެންދިޔައިރު، އީގަލްސްގެ ސީނިއާ ޓީމަށް ހައިޝަމް ކުޅެދިން ފުރަތަމަ މެޗަކީ އެ އަހަރުގެ ފެބްރުއަރީ މަހުގެ 25 ވަނަ ދުވަހު މާލޭ ލީގުގައި ވިކްޓަރީ ސްޕޯޓްސް ކުލަބާ ދެކޮޅަށް ކުޅުނު މެޗެވެ. އޭގެ ފަހުން އީގަލްސްގެ ފުރަތަމަ އެގާރައިން ބަރާބަރަށް ފުރުސަތު ހޯދަމުން އައި ހައިޝަމް ވަނީ 2019 ވަނަ އަހަރުވެސް އީގަލްސްއާއެކު ޔޫތު މުބާރާތް ކާމިޔާބުކޮށްފައެވެ.
ގައުމީ ޓީމުން ހައިޝަމަށް އެންމެ ފުރަތަމަ ފުރުސަތު ލިބިގެންދިޔައީ 2019 ވަނަ އަހަރުގެ ޖުލައި މަހުގެ ތެރޭގައެވެ. އޭގެ ފަހުން ގައުމީ ޓީމުން ކުޅުނު ގިނަ މެޗުތަކެއްގައި ހައިޝަމް ވަނީ ފުރަތަމަ އެގާރައިގައި ހިމެނިގެން ކުޅެފައެވެ. އަދި ހައިޝަމަކީ 23 އަހަރުން ދަށުގެ ގައުމީ ޓީމުގެ އެންމެ ފަހުގެ ކެޕްޓަނެވެ. އެގޮތުން އޭނާގެ ކެޕްޓަންކަމުގެ ދަށުގައި ޒުވާން ގައުމީ ޓީމުން ވަނީ ދާދި ފަހުން 23 އަހަރުން ދަށުގެ އޭއެފްސީ އޭޝިއަން ކަޕް ކޮލިފައިންގައި ކުޅެފައެވެ.
ކުރިއަށް އޮތް ސީޒަނަށް ސްކޮޑު ވަރުގަދަކުރުމުގެ ގޮތުން މާޒިޔާއިން ހައިޝަމްގެ ސޮއި ހޯދިއިރު، ދާދި ފަހުން އެ ޓީމުން ވަނީ ގައުމީ ފުޓްބޯޅަ ޓީމުގެ ކެޕްޓަން އަކުރަމް އަބްދުލް ޣަނީ (އަކޫ) އާއި ނޭޕާލުގެ ގައުމީ ފުޓްބޯޅަ ޓީމުގެ އެއްވަނަ ގޯލްކީޕަރު ކިރަން ކުމާރް ލިމްބޫގެ ސޮއިވެސް ހޯދާފައެވެ.
މަޝްހޫރު ފުޓްބޯޅަ ކޯޗު މުޙައްމަދު ޝިޔާޒް (މޯހަން) ގެ އިރުޝާދުގެ ދަށުން އަންނަ ސީޒަނާ މާޒިޔާ ކުރިމަތިލާއިރު، ރާއްޖޭގެ ފުޓްބޯޅަ ސީޒަން ފަށާނީ އަންނަ ޑިސެމްބަރު މަހުގެ 15 ވަނަ ދުވަހު ޗެރިޓީ ޝީލްޑް މެޗުންނެވެ. އަދި އެއަށްފަހު އެ މަހު ޕްރެޒިޑެންޓްސް ލީގު ފަށާއިރު، ކުރިއަށް އޮތް ސީޒަނުގެ ދިވެހި ޕްރިމިއާ ލީގު ފެށުމަށް ތާވަލުކޮށްފައިވަނީ އަންނަ އަހަރުގެ ފެބްރުއަރީ މަހުގެ ތެރޭގައެވެ. މާޒިޔާއަކީ އެންމެ ފަހުގެ ދެ ސީޒަނުގެވެސް ލީގު ޗެމްޕިއަނުންނެވެ.
