ނާޕޮލީ އަތުން އިންޓައަށް މުހިންމު މޮޅެއް

އިޓާލިއަން ލީގުގައި އާދީއްތަ ދުވަހުގެރޭ ކުޅުނު މެޗުން ތާވަލުގެ އެއްވަނައިގައި އޮތް ނާޕޮލީ އަތުން އެންމެ ފަހުގެ ޗެމްޕިއަން އިންޓަ މިލާނުން މުހިންމު މޮޅެއް ހޯދައިފިއެވެ.

އަމިއްލަ ދަނޑުގައި ކުޅުނު މެޗުން އިންޓަ މޮޅުވީ ފަހަތުން އަރައި 3-2 ގެ ނަތީޖާއަކުންނެވެ.

ފޯރިގަދަ ކުޅުމެއް ފެނިގެންދިޔަ މި މެޗުގައި އެންމެ ފުރަތަމަ ލަނޑު ޖަހައި ލީޑު ނަގާފައިވަނީ ނާޕޮލީންނެވެ. މެޗުގެ 17 ވަނަ މިނެޓުގައި ލޮރެންޒޯ އިންސީނިއޭ ދިން ބޯޅައަކުން މި ލަނޑު އެ ޓީމަށް ކާމިޔާބުކޮށްދިނީ ޕިއޮޓްރޭ ޒިއެލިންސްކީއެވެ.

އެކަމަކު މެޗުގެ 25 ވަނަ މިނެޓުގައި ލިބުނު ޕެނަލްޓީއަކުން ހަކަން ޗަޅަނޯލޫ ވަނީ އިންޓައަށް ނަތީޖާ އެއްވަރުކޮށްދީފައެވެ. މިއީ އޭރިއާ ތެރެއިން ނާޕޮލީގެ ކަލިދޫ ކުލިބާލީގެ އަތުުގައި ބޯޅަ ޖެހުމުން، ވީޑިއޯ އެސިސްޓަންޓް ރެފުރީ (ވީއޭއާރް) ގެ އެހީ ހޯދުމަށްފަހު ރެފުރީ ދިން ޕެނަލްޓީއެކެވެ. އަދި މި މެޗުގެ ފުރަތަމަ ހާފު ނިމުމުގެ ކުރިން އިންޓައިން ލީޑު ނެގިއިރު، މި ހާފު ނިމެން މިނެޓަކަށް ވެފައި ވަނިކޮށް ޗަޅަނޯލޫ ނަގައިދިން ކޯނަރަކުން މި ލަނޑު އެ ޓީމަށް ކާމިޔާބުކޮށްދިނީ އިވާން ޕެރިސިޗެވެ.

މި މެޗުގައި އިންޓައިން ލީޑު ފުޅާކޮށްފައިވަނީ މެޗުގެ 61 ވަނަ މިނެޓުގައެވެ. އޭރިއާ ތެރެއިން ފޮނުވާލި ހަމަލާއަކުން މި ލަނޑު އެ ޓީމަށް ކާމިޔާބުކޮށްދިނީ ލަޓާރޯ މާޓިނޭޒެވެ. އެކަމަކު މެޗުގެ 79 ވަނަ މިނެޓުގައި ބަދަލު ކުޅުންތެރިއެއްގެ ގޮތުގައި ކުޅެން އެރި ޑްރީސް މާޓެންސް ވަނީ ލަނޑެއް ޖަހައި، ނާޕޮލީއަށް ފަރަގު ކުޑަކޮށްދީފައެވެ.

މި މެޗުން ބަލިވުމާއެކު ނާޕޮލީއަށް ވަނީ ތާވަލުގެ އެއްވަނައިގައި ލީޑު ނަގަން ލިބުނު ފުރުސަތު ގެއްލިފައެވެ. ލީގުގައި ހޮނިހިރު ދުވަހުގެރޭ ކުޅުނު މެޗުން ތާވަލުގެ ދެވަނައިގައި އޮތް އޭސީ މިލާން ވަނީ ފިއޮރެންޓީނާ އަތުން 4-3 ގެ ނަތީޖާއަކުން ބަލިވެފައެވެ. އެއާއެކު ނާޕޮލީ އާއި މިލާނަށް ކުޅުނު 13 މެޗުން ލިބިފައިވަނީ 32 ޕޮއިންޓެވެ. އަދި ތާވަލުގެ ތިންވަނައިގައި އިންޓަ އޮތީ 12 މެޗުން 28 ޕޮއިންޓާއެކުއެވެ.