މި ސަރުކާރުން ވަނީ، ޖަލުތަކަށް 250 ޖާގަ އިތުރުކޮށްފައި: ސީޕީ އަހުމަދު
މި އަހަރު ނިމޭއިރު މި އަދަދު 266އަށް އިތުރުވާނެ
ކޮމިޝަނަރ އޮފް ޕްރިޒަންސް އަހުމަދު މުހައްމަދު ފުޅު
ޖަލުގެ ހާލަތު ރަނގަޅުކޮށް ޖަލުތަކުގެ ޖާގަ އިތުރުކުރުމުގެ މަސައްކަތުގެ ތެރެއިން, 250 ޖާގައެއް ޖަލުތަކަށް އިތުރުކުރެވިފައިވާކަމަށް ކޮމިޝަނަރ އޮފް ޕްރިޒަންސް އަހުމަދު މުހައްމަދު ފުޅު ވިދާޅުވެއްޖެއެވެ.
ސީޕީ މިފަދައިން ވިދާޅުވީ, ފުލުހުންނާއި، ހޯމް މިނިސްޓްރީއާއި ފްރިޒަންސްއިން ގުޅިގެން ބޭއްވި ނޫސްވެރިންގެ ބައްދަލުވުމެއްގައި ބައިވެރިވެވަޑައިގެން ވާހަކަދައްކަވަމުންނެވެ. އޭނާ ވިދާޅުވީ ރާއްޖޭގެ ޖަލުތަކަށް ދިމާވެފައިވާ އެންމެ ބޮޑު މައްސަލައަކީ ޖަލުތަކުގައި ޖާގަ ނެތުމުގެ މައްސަލަ ކަމަށެވެ. އެހެންކަމުން މި މައްސަލައަށް ހައްލެއް ހޯދައިދީ، ޖަލުގެ އާބާދީއާއި ޖަލުގެ ޖާގަ އެއްހަމަ ކުރުމުގެ ގޮތުން 250 ޖާގަ އިތުރުކުރެވިފައިވާކަމަށް އޭނާ ވިދާޅުވިއެވެ.
މިގޮތުން މާލޭ ޖަލު ޒަމާނީ ފެންވަރަށް ބަދަލުކުރެވި، 50 މީހުން ބަންދުކުރެވޭގޮތަށް އެތަން ފަރުމާކުރެވި، މީހުން ބަންދުކުރުމުގެ މަސައްކަތް ފަށާފައިވާކަމަށް ސީޕީ ވިދާޅުވިއެވެ. ހުޅުމާލޭ ޖަލުގައި، ގާނޫނާ ޚިލާފުވާ ބިދޭސީން ބަންދުކުރަމުންދިޔައީ އެންމެ ގޮޅިއެއްގައި ކަމަށާއި، އެހެންނަމަވެސް 2019 ވަނަ އަހަރު މިތަނަށް 100 ޖާގަ އިތުރުކުރެވިފައިވާކަމަށް އޭނާ ވިދާޅުވިއެވެ. އަދި މާފުށީ ޖަލުގައި ސްޕެޝަލް މެނޭޖްމެންޓް ޔުނިޓެއްގެ ގޮތުގައި 100 މީހުންގެ ޖާގައިގެ ޔުނިޓެއް ގާއިމުކުރެވިފައިވާކަމަށް ސީޕީ ވިދާޅުވިއެވެ.
މީގެ އިތުރުން މިއަހަރުގެ ޑިސެމްބަރު މަހުގެ ނިޔަލަށް، ކުޑަކުދިން ބައިތިއްބާ މަރުކަޒެއްގެ ގޮތުގައި ކ. ހިންމަފުށީފައި ޚާއްސަ މަރުކަޒެއް ގާއިމުކުރެވިގެންދާނެ ކަމަށް އޭނާ ވިދާޅުވިއެވެ. އަދި އެތަނުގައި ޖުމްލަ 16 ކުދިން ބަންދުކުރުމުގެ އިންތިޒާމު ހަމަޖެހިގެންދާނެކަމަށް ވިދާޅުވިއެވެ. އަދި މިއަހަރު ނިމުމުގެ ކުރިން، ޖަލަށް އިތުރުކުރެވުނު ޖާގައިގެ އަދަދު 266އަށް އިތުރުވެގެންދާނެ ކަމަށް ސީޕީ ވިދާޅުވިއެވެ.
ގައިދީން ޖަލަށް ލުމަށްފަހު ރިހެބިލިޓޭޓް ކުރުމުގެ މަސައްކަތް ހަރުދަނާގޮތެއްގައި ކުރުމަށްޓަކައި ކަރެކްޝަންސްގެ އިދާރީ އޮނިގަނޑު ބަދަލުކުރެވި، "ރިހެބިލިޓޭޝަން އެންޑް ރީ އިންޓެގްރޭޝަން"ގެ ނަމުގައި ޚާއްސަ ކޮމާންޑެއް އެކުލަވާލެވިފައިވާކަމަށް ސީޕީ ވިދާޅުވިއެވެ. މީގެ ތެރެއިން ގައިދީން ރިހެބިލިޓޭޓް ކުރުމުގެ މަސައްކަތްތަކެއް ދެ ރަށެއްގައި ކުރިއަށްދާކަން އޭނާ ފާހަގަކުރެއްވިއެވެ.
ސީޕީ ވިދާޅުވީ މި މަސައްކަތްތައް ނިމުމުން، ޖަލުގެ އާބާދީގެ 50 އިންސައްތަ ރިހެލިބިޓޭޓް ކުރެވިގެންދާނެ ކަމަށެވެ.
