ގައިދީންގެ ރިހެބިލިޓޭޝަނަކީ ހަމައެކަނި ކަރެކްޝަނުން ކޮށްނިންމޭނެ މަސައްކަތެއް ނޫން - ސީޕީ
ގައިދީންގެ ރިހެބިލިޓޭޝަންއަކީ އެންމެން ގުޅިގެން ކުރަންޖެހޭ މަސައްކަތެއް
ކޮމިޝަނަރ އޮފް ޕްރިޒަންސް އަހުމަދު މުހައްމަދު ފުޅު
ޤައިދީންގެ ރިހެބިލިޓޭޝަންއަކީ ހަމައެކަނި އެމްސީއެސްއިން ކޮށްނިންމޭނެ މަސައްކަތެއް ނޫން ކަމަށް ކޮމިޝަނަރ އޮފް ޕްރިޒަންސް އަހުމަދު މުހައްމަދު ފުޅު ވިދާޅުވެއްޖެއެވެ.
އިންމޭޓްސް ކްރިއޭޓިވިޓީ ފެއަރ 2023 ހުޅުވުމުގެ ރަސްމިއްޔާތުގައި ވާހަކަ ދައްކަވަމުން ކޮމިޝަނަރ އޮފް ޕްރިޒަންސް އަހުމަދު މުޙައްމަދު ފުޅު ވިދާޅުވީ ގައިދީންގެ ރިހެބިލިޓޭޝަންއަކީ ހަމައެކަނި އެމްސީއެސްއިން ކޮށްނިންމޭނެ މަސައްކަތެއް ނޫން ކަމަށާއި އެއީ އެންމެން ގުޅިގެން ކުރަންޖެހޭ މަސައްކަތެއް ކަމުގައެވެ. ދުނިޔޭގެ ހޯދުންތަކުގެ ޢަލީގައި ޖަލުތަކުގެ ރިހެބިލިޓޭޝަން ޕްރޮގްރާމްތައް ބައްޓަންކުރެވޭތޯ ބަލަމުންގެންދަނީ އިސްލާމްދީނުގެ އަޤީދާއާއި ދިވެހިންގެ އާދަކާދައާއި ތަޢުލީމާއި ސިއްޙަތާއި ޤައިދީންގެ ނަފްސާނީ ދުޅަހެޔޮކަމާއި ތަފާތު ފަންނުތައް އެކުލަވާލައިގެން ކަމަށް ކޮމިޝަނަރ ވިދާޅުވިއެވެ.
އަދި ޤައިދީން މުޖްތަމަޢުއަށް ރީއިންޓެގްރޭޓް ކުރުމުގައި ގުޅުންހުރި ދާއިރާތަކާއި ޤައިދީންގެ ޢާއިލާތަކާއި ރަހްމަތްތެރިންނާއި ޖަމިއްޔާތަކާއި ޖަމާއަތްތަކުގެ އެހީތެރިކަން ބޭނުންވާ ކަމަށް ފާހަގަކުރެއްވިފައިވާ ކަމަށް ކޮމިޝަނަރ ވިދާޅުވިއެވެ.
އެގޮތުން މިދިޔަ އަހަރު ހިންގުނު ފުރަތަމަ ޕްރިޒަން-ބޭސްޑް ޑްރަގް ރިހެބިލިޓޭޝަން ޕްރޮގްރާމްކޮށް މުޖްތަމަޢުއަށް ދޫކުރި ފަރާތްތައް މުޖްތަމަޢުގައި މޮނިޓަރކުރަމުންދާއިރު މިކަން ފާހަގަވެފައިވާކަމަށް ކޮމިޝަނަރ ވިދާޅުވިއެވެ. އޭގެ ތެރެއިން ގިނަ މީހުން މުޖްތަމަޢުގައި ކާމިޔާބުކަމާއެކު ދިރިއުޅެމުންދާއިރު، މަދު ބަޔަކު އަނބުރާ ޖަލަށް ގެނެވިފައިވާކަން ފާހަގަކުރައްވަމުން ކޮމިޝަނަރ ވިދާޅުވީ އެކަމުން ދޭހަވާ ކަމަކީ ޖަލުގައި ކިތަންމެ ފުރިހަމައަށް ރިހެބިލިޓޭޝަން ޕްރޮގްރާމް ހިންގިކަމުގައިވީނަމަވެސް، އެމީހުންނަށް މުޖްތަމަޢުއިން ލިބެންޖެހޭ އެހީތެރިކަމާއި އެއްބާރުލުން ފުރިހަމައަށް ލިބިގެން ނޫނީ ރިހެބިލިޓޭޝަން ކާމިޔާބު ނުވާނޭކަމެވެ.
އިންމޭޓްސް ކްރިއޭޓިވިޓީ ފެއަރގެ ވާހަކަ ދައްކަވަމުން ކޮމިޝަނަރ ފާހަގަކުރެއްވީ ދިރިއުޅުމުގެ ޙާލަތަކަށް އަންނަ ބަދަލާ ގުޅިގެން މިވަގުތު ޖަލުގައި ތިބެންޖެހުނަސް، އޭގެތެރޭގައި ވަރަށް ހުނަރުވެރި ޒުވާނުން ތިބިކަމެވެ. އަދި އެއީ ޤައުމު ބިނާކުރުމުގައި ހީވާގިކަމާއެކު މަސައްކަތްކުރެވިދާނެ ޒުވާނުންތަކެއް ކަމަށް އެމީހުންގެ ހުނަރާއި ޤާބިލްކަމުން ފެންނަކަމަށާއި އެމީހުންނަށް ހިތްވަރާއެކު މަސައްކަތްކުރެވޭނޭ ފުރުޞަތު ފަހިކޮށްދިނުން ކަމުގައި ކޮމިޝަނަރ ވިދާޅުވިއެވެ.
މި ފެއަރގައި ސާޅީހަށްވުރެ ގިނަ ގައިދީންގެ މަސައްކަތްތައް ހިމަނާފައިވެއެވެ. މިގޮތުން މީގެ ތެރޭގައި އަތްތެރި މަސައްކަތުން ތައްޔާރުކޮށްފައިވާ 800 އުފެއްދުމާއި ކުރެހުންތަކާއި 2400 ގަސްގަހާގެއްސާއި ތަރުކާރީގެ ބާވަތްތައް ހިމެނެއެވެ. މިފެއަރ ހުޅުވައިދެއްވުމަށްފަހު ރައީސުލްޖުމްހޫރިއްޔާގެ ނައިބު އާއި ދައުވަތު އެރުވުނު މެހެމާނުން ވަނީ ފެއަރގެ އުފެއްދުންތައް ބައްލަވާލައްވާފައެވެ.
މޯލްޑިވްސް ކަރެކްޝަނަލް ސަރވިސްގެ ރިހެބިލިޓޭޝަން ޕްރޮގްރާމްތަކުގެ އެއް އަމާޒަކީ ޤައިދީން އިސްލާހުކޮށް، ޖަލުން ނިކުމެ މުޖްތަމައުގައި ދިރިއުޅޭއިރު އާމްދަނީއެއް ލިބޭނޭ ފަދަ މަސައްކަތެއް ދަސްކޮށްދިނުމެވެ. އަދި މި ފެއަރ ބޭއްވުމުގެ މައިގަނޑު އެއް މަޤްޞަދަކީ ޤައިދީންގެ ހުނަރުތަކާއި މަސައްކަތްތަކާއި އުފެއްދުންތައް އާންމުންނަށް ދައްކާލުމާއި، އެތަކެތި ވިއްކުމުގެ ފުރުޞަތު ފަހިކޮށްދިނުމެވެ.
