ޖަލަށް މަސްތުވާތަކެތި އެތެރެކުރަން އުޅުނު މޯލްޑިވްސް ކަރެކްޝަނަލް ސާވިސްގެ އޮފިސަރަކު ހައްޔަރުކޮށްފިއެވެ.
މިކަން ހާމަކުރައްވައި ކޮމިޝަނަރ އޮފް ޕްރިޒަންސް އަހުމަދު މުޙައްމަދުފުޅު ވަނީ ހޯމަ ދުވަހުގެ ރޭ ޓްވީޓެއް ކުރައްވާފައެވެ. އެ ޓްވީޓުގައި ކޮމިޝަނަރު ވިދާޅުވި އެ އޮފިސަރު ހައްޔަރު ކުރީ ޖަލަށް މަނާ ތަކެތި ވައްދާ ކަމަށް ޝައްކު ކުރެެވިގެން ދިވެހި ފުލުހުންނާ ގުޅިގެން ހިންގި ހާއްސަ އޮޕަރޭޝަނެއްގައި ކަމަށެވެ.
އެ އޮފިސަރު މިހާރު ފުލުހުންގެ ބެލުމުގެ ދަށަށް ގެންގޮސްފައިވާއިރު އޭނާއާ މެދު ވަނީ ވަގުތުން ފިޔަވަޅު ވެސް އަޅާފައެވެ. އެގޮތުން، އޭނާ ވަޒީފާއިން ސަސްޕެންޑު ކޮށްފައިވާ ކަމަށް ކޮމިޝަނަރު ވިދާޅުވިއެވެ.
ޖަލަށް މަސްތުވާތަކެއްޗާއި ފޯނު ފަދަ މަނާ ތަކެތި ވައްދާ މައްސަލަ ބޮޑުވެފައިވާއިރު އެކަން ހުއްޓުވުމަށް ހާއްސަ އިސްކަމެއް ދީގެން މަސައްކަތް ކުރަމުން އަންނަ ކަމަށް ކޮމިޝަނަރު އަހުމަދު މުޙައްމަދުފުޅު ވަނީ މީގެ ކުރިން ވެސް ވިދާޅުވެފައެވެ. އަދި މިފަދަ ކަންކަމުގައި ފާހަގަކުރެވޭ ފަރާތްތަކާ މެދު ފިޔަވަޅު އަޅަމުން އަންނަކަން ވެސް އޭނާ ފާހަގަކުރެއްވިއެވެ.
