މެންޗެސްޓާ ޔުނައިޓެޑުގެ ކޯޗުގެ މަގާމުން ނޯވޭގެ އޮލެ ގުނަ ސޯލްޝެއާ ވަކިވެއްޖެއެވެ.

ޔުނައިޓެޑުގެ ކޯޗުކަމުން އުމުރުން 48 އަހަރުގެ ސޯލްޝެއާ ވަކިވިއިރު، އިނގިރޭސި ޕްރިމިއާ ލީގުގައި ހޮނިހިރު ދުވަހުގެރޭ ކުޅުނު މެޗުން ވަޓްފޯޑް އަތުން ހިތްދަތި ގޮތަކަށް މެންޗެސްޓާ ޔުނައިޓެޑް ވަނީ ބަލިވެފައެވެ. އެ މެޗުން ޔުނައިޓެޑް ބަލިވީ 4-1 ގެ ނަތީޖާއަކުންނެވެ.

އެއާއެކު ސޯލްޝެއާގެ ކުރިމަގާ މެދު ގޮތެއް ނިންމަން ހޮނިހިރު ދުވަހުގެރޭ ޔުނައިޓެޑުގެ ބޯޑު މެންބަރުންގެ ކުއްލި ބައްދަލުވުމެއް ބޭއްވިއިރު، އާދީއްތަ ދުވަހުގެ ވަގުތެއްގައި ޔުނައިޓެޑުން ވަނީ މަގާމުން ވަކިވާން ސޯލްޝެއާ ނިންމިކަން ރަސްމީކޮށް އިއުލާންކޮށްފައެވެ.

ސޯލްޝެއާއާއެކު މި ފަހުން ޔުނައިޓެޑުގެ ކުޅުން ވަރަށް ބޮޑަށް ދަށްވެފައިވާއިރު، އިނގިރޭސި ޕްރިމިއާ ލީގުގައި އެންމެ ފަހުން ކުޅުނު ހަތް މެޗުގެ ތެރެއިން އެ ޓީމު މޮޅުވެފައިވަނީ އެންމެ މެޗަކުންނެވެ. އަދި މި ފަހަރު ލީގުގައި ޔުނައިޓެޑް ކޮޅަށް 12 މެޗުން 29 ލަނޑު ވަދެފައިވާއިރު، ލީގުގެ އެންމެ ގިނައިން ލަނޑު ވަން ތިން ޓީމުގެ ތެރޭގައި ޔުނައިޓެޑް ހިމެނެއެވެ.

ޔުނައިޓެޑުގެ ކޯޗުކަން ސޯލްޝެއާ ދޫކޮށްލިއިރު، އޭނާ ޔުނައިޓެޑާ ހަވާލުވީ 2018 ވަނަ އަހަރުގެ ޑިސެމްބަރު މަހު އެ ޓީމުގެ ކޯޗުގެ މަގާމުން ޖޯސޭ މޮރީނިއޯ ވަކިކުރުމުން ވަގުތީ ކޯޗެއްގެ ގޮތުގައެވެ. އެކަމަކު ސޯލްޝެއާގެ ކޯޗުކަމުގައި ޔުނައިޓެޑުން ކުޅުނު ފުރަތަމަ ސީޒަނުގައި މޮޅު ކުޅުމެއް ދެއްކުމާއެކު، 2019 ވަނަ އަހަރުގެ މާޗު މަހު ވަނީ ސޯލްޝެއާގެ އެއްބަސްވުން ދާއިމީކޮށް، އިތުރު ތިން އަހަރަށް އޭނާ ބަހައްޓަން ނިންމާފައެވެ.

މި ފަހުން ނެރުނު ދަށް ނަތީޖާތަކާއެކު ސޯލްޝެއާއަށް ގިނަ ފާޑުކިޔުންތަކެއް އަމާޒުވިއިރު، ސޯލްޝެއާއަށް ޔުނައިޓެޑާއެކު އެއްވެސް ކާމިޔާބީއެއް ހޯދިފައެއް ނުވެއެވެ. އެގޮތުން ޔުނައިޓެޑުން އެންމެ ފަހުން ކާމިޔާބުކުރި މުބާރާތަކީ 2017 ވަނަ އަހަރުގެ ޔުއެފާ ޔޫރޮޕާ ލީގެވެ. އެ މުބާރާތް ޔުނައިޓެޑުން ކާމިޔާބުކޮށްފައިވަނީ މޮރީނިއޯގެ އިރުޝާދުގެ ދަށުންނެވެ.

ޔުނައިޓެޑުގެ ކޯޗުކަން ސޯލްޝެއާ ދޫކޮށްލިއިރު، ރިޕޯޓުތައް ބުނާ ގޮތުން ޔުނައިޓެޑުން ދެން ގެންނަން ބޭނުންވާ ކޯޗަކީ މިދިޔަ ސީޒަނަށްފަހު ރެއާލް މެޑްރިޑް ދޫކޮށްލި ފްރާންސްގެ ޒިނެދިން ޒިދާނެވެ. މިދިޔަ ސީޒަނަށްފަހު ރެއާލް ދޫކޮށްލި ފަހުން ޒިދާން އަދި މިހާތަނަށް ޓީމަކާ ހަވާލުވެފައެއް ނުވެއެވެ.