އިނގިރޭސި ޕްރިމިއާ ލީގުގައި ހޮނިހިރު ދުވަހުގެ ހަވީރު ކުޅުނު މެޗުން ލެސްޓާ ސިޓީ ބަލިކޮށް ތާވަލުގެ އެއްވަނައިގައި ޗެލްސީން ހަ ޕޮއިންޓުގެ ލީޑެއް ނަގައިފިއެވެ.

ރަށުން ބޭރުގައި ކުޅުނު މެޗުން ޗެލްސީ މޮޅުވީ 3-0 ގެ ނަތީޖާއަކުންނެވެ.

މި މެޗު ފަށައިގެން ޗެލްސީން މޮޅު ކުޅުމެއް ދެއްކިއިރު، މެޗުގެ 14 ވަނަ މިނެޓުގައި އެ ޓީމުން ވަނީ ލީޑު ނަގާފައެވެ. ބެން ޗިލްވެލް ނަގައިދިން ކޯނަރަކުން މި ލަނޑު އެ ޓީމަށް ކާމިޔާބުކޮށްދިނީ އެންޓޯނިއޯ ރުޑިގާއެވެ. އަދި އޭގެ ތިން މިނެޓު ފަހުން ޗެލްސީގެ އެންގޯލޯ ކާންޓޭއަށް ވަނީ ލީޑު ފުޅާކުރަން ރަނގަޅު ފުރުސަތެއް ލިބި ބޭކާރުވެފައެވެ. އެކަމަކު މެޗުގެ 28 ވަނަ މިނެޓުގައި ކާންޓޭ ވަނީ ހިތްގައިމު ލަނޑެއް ކާމިޔާބުކޮށް، ޗެލްސީއަށް ލީޑު ފުޅާކޮށްދީފައެވެ. އޭނާ މި ލަނޑު ކާމިޔާބުކޮށްފައިވަނީ ރީސް ޖޭމްސް ދިން ބޯޅައަކުންނެވެ.

މި މެޗުގެ ދެވަނަ ހާފުގައިވެސް ޗެލްސީން ރަނގަޅު ކުޅުމެއް ދެއްކިއިރު، މި ހާފުގެ ކުރީކޮޅު އޭރިއާ ތެރެއިން ޗިލްވެލް ފޮނުވާލި ނުރައްކާތެރި ހަމަލާއެއް ލެސްޓާގެ ގޯލްކީޕަރު ކެސްޕަ ޝްމައިކަލް ވަނީ ދިފާއުކޮށްފައެވެ. އަދި މެޗުގެ 63 ވަނަ މިނެޓުގައި އޭރިއާ ބޭރުން ލެސްޓާގެ ޑަނިއެލް އަމާޓޭ ނުރައްކާތެރި ހަމަލާއެއް ފޮނުވާލިއިރު، އެ ހަމަލާގެ ހުރަހަކަށްވީ ޗެލްސީގެ ގޯލްކީޕަރު އެޑޮއާޑް މެންޑީއެވެ.

މި މެޗުގައި ޗެލްސީން ތިންވަނަ ލަނޑު ޖަހާފައިވަނީ މެޗުގެ 71 ވަނަ މިނެޓުގައެވެ. ހަކީމް ޒިޔެކް ތަނަވަސްކޮށްދިން ފުރުސަތަކުން މި ލަނޑު އެ ޓީމަށް ކާމިޔާބުކޮށްދިނީ ކްރިސްޓިއަން ޕުލިސެކެވެ. މި ދެ ކުޅުންތެރިންނަކީވެސް ދެވަނަ ހާފުގައި ކުޅެން އެރި ދެ ކުޅުންތެރިންނެވެ. އަދި އޭގެ ފަހުން މެޗު ނިމެން އަށް މިނެޓަށް ވެފައި ވަނިކޮށް ލެސްޓާގެ ޖޭމްސް މެޑިސަން ނުރައްކާތެރި ހަމަލާއެއް ފޮނުވާލިއިރު، މެޗުގައި މޮޅު ކުޅުމެއް ދެއްކި މެންޑީ ވަނީ އެ ހަމަލާ ދިފާއުކޮށްފައެވެ.

މި މޮޅާއެކު ތާވަލުގެ އެއްވަނައިގައި ޗެލްސީން ހަ ޕޮއިންޓުގެ ލީޑެއް ނެގިއިރު، އެ ޓީމަށް ވަނީ ކުޅުނު 12 މެޗުން 29 ޕޮއިންޓް ލިބިފައެވެ. ދެވަނައިގައި އޮތް އެންމެ ފަހުގެ ޗެމްޕިއަން މެންޗެސްޓާ ސިޓީ އާއި ތިންވަނައިގައި އޮތް ވެސްޓް ހޭމް ޔުނައިޓެޑަށް 11 މެޗުން 23 ޕޮއިންޓް ލިބިފައިވާއިރު، ހަތަރުވަނައިގައި އޮތް ލިވަޕޫލަށް 11 މެޗުން ވަނީ 22 ޕޮއިންޓް ލިބިފައެވެ. އެހެންކަމުން ލީގުގައި ހޮނިހިރު ދުވަހު ކުޅޭ މެޗުތަކުގެ ނަތީޖާ ނުކުންނަ ގޮތަކުން ޗެލްސީގެ ލީޑު ހަނިވުމުގެ ފުރުސަތު އެބައޮތެވެ.