ނޭޕާލުގެ ކީޕަރު ކިރަން މާޒިޔާއަށް

ރާއްޖޭގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަނުން ނޭޕާލް ގައުމީ ފުޓްބޯޅަ ޓީމުގެ އެއްވަނަ ގޯލްކީޕަރު ކިރަން ކުމާރް ލިމްބޫ ގެނެސްފިއެވެ.

އުމުރުން 31 އަހަރުގެ ކިރަން އަކީ މީގެ ކުރިން ރާއްޖޭގެ ޓީސީ ސްޕޯޓްސް ކުލަބަށް ކުޅެފައިވާ ގޯލްކީޕަރެކެވެ. އެގޮތުން ކިރަން އެންމެ ފުރަތަމަ ޓީސީއާ ގުޅުނީ 2017 ވަނަ އަހަރެވެ. އެ ފަހަރު ޓީސީއާ ގުޅުމަށް ފަހު އޭނާ ވަނީ އެ ޓީމުން އެ އަހަރު ބަންގްލަދޭޝްގައި އޮތް ޝެއިޚް ކަމާލް އިންޓަނޭޝަނަލް ކަޕް ކާމިޔާބުކުރިއިރު، މޮޅު ކުޅުމެއް ދައްކާފައެވެ.

އަދި އޭގެ ފަހުން 2018 ވަނަ އަހަރުގެ ޖޫން މަހުގެ ޓްރާންސްފާގައި ކިރަން އަލުން ޓީސީއާ ގުޅުނުއިރު، އެ ފަހަރު އޭނާ ދެއްކި މޮޅު ކުޅުމާއެކު ޓީސީން ވަނީ ފުރަތަމަ ފަހަރަށް ދިވެހި ޕްރިމިއާ ލީގު ކާމިޔާބުކޮށްފައެވެ. އެ ސީޒަނުގައި ކިރަން އެންމެ ފުރަތަމަ ކުޅެފައިވަނީ އިންޑިއާގެ އައި ލީގުގެ މިނެރްވާ ޕަންޖާބަށެވެ. އަދި އެ ޓީމާއެކު އޭނާ ވަނީ އިންޑިއާގެ އައި ލީގުވެސް ކާމިޔާބުކޮށްފައެވެ. އެއާއެކު ކިރަން ވެފައިވަނީ އެއް އަހަރު ތެރޭގައި ސަރަހައްދުގެ ދެ ގައުމުގެ ލީގު ކާމިޔާބުކުރި ފުރަތަމަ ކުޅުންތެރިޔާއަށެވެ.

އޭގެ ފަހުން 2019 ވަނަ އަހަރު ސީޒަނުގައިވެސް ޓީސީގެ ގޯލު ބެލެހެއްޓުމުގެ ޒިންމާ ކިރަންއާ އެންމެ ފުރަތަމަ ހަވާލުކުރި ނަމަވެސް، އެ އަހަރުގެ މެއި މަހުގެ ތެރޭގައި ޓީސީން ވަނީ ކިރަން ދޫކޮށްލައި، ގައުމީ ޓީމުގެ ގޯލު ކުރިން ބެލެހެއްޓި ތަޖުރިބާކާރު ގޯލްކީޕަރު އިމްރާން މުޙައްމަދު އެ ޓީމަށް ގެެނެސްފައެވެ.

ނޭޕާލު ގައުމީ ޓީމަށް 79 މެޗު ކުޅެދީފައިވާ ކިރަން ވަނީ މިދިޔަ މަހު މާލޭގައި ބޭއްވި "އުރީދޫ ސާފް ޗެމްޕިއަންޝިޕް2021" ގައި ނޭޕާލް ޓީމުގައިވެސް މޮޅު ކުޅުމެއް ދައްކާފައެވެ. އެގޮތުން ކިރަންގެ ކެޕްޓަންކަމުގެ ދަށުން ނޭޕާލުން ވަނީ މި ފަހަރުގެ މުބާރާތުގެ ރަނަރަޕްކަން ހޯދާފައެވެ. މި ފަހަރުގެ މުބާރާތުގެ ފައިނަލުގައި ނޭޕާލް ވާދަކުރިއިރު، މިއީ ސާފް ޗެމްފިއަންޝިޕުގެ ތާރީޚުގައި މި މުބާރާތުގެ ފައިނަލެއްގައި ނޭޕާލް ވާދަކުރި ފުރަތަމަ ފަހަރެވެ.

މިދިޔަ ސީޒަނުގައި މާޒިޔާގެ ގޯލު އެންމެ ފުރަތަމަ ބެލެހެއްޓީ ސާބިއާގެ ގޯލްކީޕަރު ނިކޮލާ ވުޔަނަކެވެ. އޭގެ ފަހުން ނިކޮލާ ފޮނުވާލުމަށްފަހު ޒުވާން ގޯލްކީޕަރު ހުސެއިން ޝަރީފް (ހުސެން) މާޒިޔާ ބާކީ މެޗުތަކުގައި އެ ޓީމުގެ ގޯލު ބެލެހެއްޓިއިރު، ސީޒަނުގެ މެދުތެރެއިން މާޒިޔާއިން ވަނީ ކުރިންވެސް އެ ޓީމަށް ކުޅުނު ސީރިއާގެ ގޯލްކީޕަރު މަހުމޫދު އަލް ޔޫސުފް ގެނެސްފައެވެ. އެކަމަކު ކަކުލަށް ދިމާވި އަނިޔާއެއްގެ ސަބަބުން މަހުމޫދު ވަނީ ފޮނުވާލާފައެވެ.

އެއަށްފަހު މި އަހަރުގެ އޯގަސްޓް މަހުގެ ތެރޭގައި މާލޭގައި ކުރިއަށްދިޔަ އޭއެފްސީ ކަޕުގެ މެޗުތަކުގައި މާޒިޔާގެ ގޯލް ބަލަހައްޓާފައިވަނީ މިދިޔަ ސީޒަނުގައި ސުޕަ ޔުނައިޓެޑް ސްޕޯޓްސް (ސަސް) ގެ ގޯލު ބެލެހެއްޓި އުޒްބެކިސްތާންގެ ގޯލްކީޕަރު މިރްޒޮހިދު މަމަކްތޯނޯފެވެ.

ކުރިއަށް އޮތް ސީޒަނަށް މާޒިޔާއިން ކިރަންގެ ސޮއި ހޯދިއިރު، އެ ޓީމުން ވަނީ ކުރިއަށް އޮތް ސީޒަނަށް އައު ކޯޗުގެ މަގާމަށް މަޝްހޫރު ފުޓްބޯޅަ ކޯޗު މުޙައްމަދު ޝިޔާޒް (މޯހަން) ހަމަޖައްސާފައެވެ. މޯހަންގެ އިރުޝާދުގެ ދަށުން އަންނަ ސީޒަނާ މާޒިޔާ ކުރިމަތިލާއިރު، ރާއްޖޭގެ ފުޓްބޯޅަ ސީޒަން ފަށާނީ އަންނަ ޑިސެމްބަރު މަހުގެ ތެރޭގައި ޕްރެޒިޑެންޓްސް ކަޕުންނެވެ. އަދި އެއަށްފަހު ކުރިއަށް އޮތް ސީޒަނުގެ ދިވެހި ޕްރިމިއާ ލީގު ފެށުމަށް ތާވަލުކޮށްފައިވަނީ އަންނަ އަހަރުގެ ފެބްރުއަރީ މަހުގެ ތެރޭގައެވެ. މާޒިޔާއަކީ އެންމެ ފަހުގެ ދެ ސީޒަނުގެވެސް ލީގު ޗެމްޕިއަނުންނެވެ.