އޯގްސްބާގުން ޗެމްޕިއަން ބަޔާން ބަލިކޮށްފި

ޖަރުމަން ލީގުގައި ހުކުރު ދުވަހުގެރޭ ކުޅުނު މެޗުން ރެލިގޭޝަން ޒޯނުގައި އޮތް އޯގްސްބާގުން އެންމެ ފަހުގެ ޗެމްޕިއަން ބަޔާން މިއުނިކް ބަލިކޮށްފިއެވެ.

އޯގްސްބާގުގެ ދަނޑުގައި ކުޅުނު މެޗުން އެ ޓީމު މޮޅުވީ 2-1 ގެ ނަތީޖާއަކުންނެވެ.

މި މެޗުގައި ދެ ޓީމުން ކާމިޔާބުކުރި ތިން ލަނޑުވެސް ފެނިގެންގޮސްފައިވަނީ ފުރަތަމަ ހާފުގައެވެ. އެގޮތުން މެޗުގައި އެންމެ ފުރަތަމަ ލަނޑު ޖަހައި ލީޑު ނެގީ އޯގްސްބާގުންނެވެ. މެޗުގެ 23 ވަނަ މިނެޓުގައި އޭރިއާ ތެރެއިން ފޮނުވާލި ހަމަލާއަކުން މި ލަނޑު އެ ޓީމަށް ކާމިޔާބުކޮށްދިނީ މެޑްސް ޕެޑާސަންއެވެ.

އަދި މެޗުގެ 36 ވަނަ މިނެޓުގައި އިއާގޯ ނަގައިދިން ހުރަހަކުން އަންދްރޭ ހާން ވަނީ ލަނޑެއް ޖަހައި އޯގްސްބާގަށް ލީޑު ފުޅާކޮށްދީފައެވެ. އެކަމަކު އޭގެ ދެ މިނެޓު ފަހުން ބަޔާނުން ފަރަގު ކުޑަކުރިއިރު، ތޯމަސް މުލާ ދިން ބޯޅައަކުން މި ލަނޑު އެ ޓީމަށް ކާމިޔާބުކޮށްދިނީ އިތުބާރު ފޯވާޑް ރޮބަޓް ލެވަންޑޯސްކީއެވެ. މި މެޗުގައި ލެވަންޑޯސްކީ ލަނޑު ޖެހިއިރު، މި ފަހަރުގެ ލީގުގައި ލެވަންޑޯސްކީ ވަނީ މިހާތަނަށް 14 ލަނޑު ހަމަކޮށްފައެވެ.

މި މެޗުން ބަޔާން ބަލިވިއިރު، މިއީ މި ސީޒަނުގެ ޖަރުމަން ލީގުގައި ބަޔާން ބަލިވި ދެވަނަ މެޗެވެ. މި ނަތީޖާއާއެކު ތާވަލުގެ އެއްވަނައިގައި ބަޔާން މި ވަގުތު އޮތީ ކުޅުނު 12 މެޗުން ލިބުނު 28 ޕޮއިންޓާއެކުއެވެ. ދެވަނައިގައި އޮތް ބޮރޫޝިއާ ޑޯޓްމުންޑަށް 11 މެޗުން 24 ޕޮއިންޓް ލިބިފައިވާއިރު، ހޮނިހިރު ދުވަހުގެރޭ ކުޅޭ މެޗުން ސްޓުޓްގާޓް ބަލިކޮށްގެން ޑޯޓްމުންޑަށް ބަޔާނާ އެއް ޕޮއިންޓަށް ގާތަށް ޖެހިލެވޭނެއެވެ.

މީގެ އިތުރުން ހުކުރު ދުވަހުގެރޭ ބަޔާން އަތުން ހޯދި މޮޅާއެކު އޯގްސްބާގް ވަނީ ރެލިގޭޝަން ޒޯނުން ދުރަށް ޖެހިލާފައެވެ. އެގޮތުން މެޗަށް ނުކުތްއިރު ތާވަލުގެ 16 ވަނައިގައި އޯގްސްބާގް އޮތްއިރު، އެ ޓީމު މިހާރު ވަނީ 12 މެޗުން 12 ޕޮއިންޓް ހަމަކޮށް ތާވަލުގެ 15 ވަނައަށް ކުރިއަށް ޖެހިލާފައެވެ.