ފާއިތުވި 24 ގަޑިއިރު ކޮވިޑް-19ށް ޕޮޒިޓިވްވި މީހުންގެ އަދަދު 124ށް
16 މީހުންނަށް އަންނަނީ ހޮސްޕިޓަލްތަކުގައި އެޑްމިޓްކޮށްގެން ފަރުވާދެމުން
ކޮވިޑަށް ޓެސްޓު ކުރުމަށް ސާމްޕަލް ނެގުން
ފާއިތުވި 24 ގަޑިއިރު ރާއްޖެއިން ކޮވިޑް-19ށް 124 މީހުން ޕޮޒިޓިވްވެއްޖެއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ)ން އާންމުކޮށްފައިވާ ތަފާސްހިސާބުތަކަށް ބަލާއިރު މާލެއިން 20 މީހުން ވަނީ ކޮވިޑަށް ޕޮޒިޓިވްވެފައެވެ. އަތޮޅުތަކުން 87 މީހުން ކޮވިޑަށް ޕޮޒިޓިވްވީއިރު، ހިނގަމުންދާ ރިސޯޓްތަކުން 17 މީހުން ވަނީ ކޮވިޑަށް ޕޮޒިޓިވްވެފައެވެ. މިއާއެކު ރާއްޖެއިން ކޮވިޑަށް ޕޮޒިޓިވްވީ މީހުންގެ ޖުމްލަ އަދަދު ވަނީ 90،464ށް އަރާފައެވެ. މީގެތެރެއިން 88،119 މީހުން ވަނީ ބަލިން ރަނގަޅުވެފައެވެ.
ރާއްޖޭގައި މިވަގުތު ކޮވިޑް-19ށް ފަރުވާ ހޯދަމުން އަންނަނީ 2084 މީހުންނެވެ. މީގެތެރެއިން 16 މީހުންނަށް އަންނަނީ ހޮސްޕިޓަލްތަކުގައި އެޑްމިޓްކޮށްގެން ފަރުވާދެމުންނެވެ.
ރާއްޖެއިން މިހާތަނަށް މިބަލީގައި 248 މީހުން ވަނީ ބަލީގައި ނިޔާވެފައެވެ.
ރާއްޖޭގައި މިފަހަކަށް އައިސް، ކޮވިޑް-19 ޖެހޭ މީހުންގެ އަދަދު ވަކި މިންވަރެއްގައި ހިފެހެއްޓިފައި ހުރިނަމަވެސް އަތޮޅުތަކުގައި ކޮވިޑް ޖެހޭ މީހުންގެ އަދަދު އަންނަނީ އިތުރުވަމުންނެވެ.
ކޮވިޑްގެ ކޭސްތައް މަދުވެފައިވީނަމަވެސް ބަލިން ރައްކާތެރިވުމަށް އަޅަންޖެހޭ ފިޔަވަޅުތަކަށް ސަމާލުކަންދިނުމަށް ކަމާބެހޭ ފަރާތްތަކުން އަންނަނީ އިލްތިމާސްކުރަމުންނެވެ.
