ދިއްފުށީ ފަޅުގައި ރިސޯޓް ތަރައްގީކުރުން މަޑުޖައްސާލަން އެންގި އެންގުމަށް ހައިކޯޓުން ތާއީދު!
ސަރުކާރުން ދިއްފުށި ފަޅު އަތުލިކަމަށް ބުނެ، ހާމިދު ދައުލަތާ ދެކޮޅަށް ދައުވާ ކޮށްފައިވަނީ 2017 ވަނަ އަހަރު
ކ. ދިއްފުށި
ދިއްފުށީ ފަޅުގައި ރިސޯޓު ތަރައްގީކުރުމުގެ މަސައްކަތް މަޑުޖައްސާލުމަށް ސިވިލް ކޯޓުން, ވިޔަފާރިވެރިޔާ ހާމިދު އިސްމާއީލްގެ މައްޗަށް ނެރުނު އަމުރަށް ތާއީދުކޮށް ހައިކޯޓުން އިއްޔެ ހުކުމް ކޮށްފިއެވެ.
މިފަދައިން ސިވިލް ކޯޓުން އަމުރު ކޮށްފައިވަނީ، ހާމިދަށް 2015 ވަނަ އަހަރު ދިއްފުށީ ފަޅު ކުއްޔަށް ދީފައި ވަނިކޮށް 2017ގައި ސަރުކާރުން އެތަން އަތުލި މައްސަލައިގައި އޭނާ ދައުލަތާއި ދެކޮޅަށް ދައުވާ ކުރުމުންނެވެ. އަދި އެ މައްސަލަ ނިމެންދެން، އެތަނުގެ މަސައްކަތްތައް ހުއްޓާލުމުގެ އަމުރަކަށް ސިވިލް ކޯޓުގައި ހާމިދުގެ ފަރާތުން އެދުމުން، އެ ކޯޓުން މިދިޔަ އަހަރު އެންގީ ދިއްފުށި ފަޅުގައި އެއްވެސް މަސައްކަތެއް ނުކުރުމަށެވެ.
ދައުލަތުން އިސްތިއުނާފުކޮށްފައިވާ މި މައްސަލައާ ގުޅިގެން، ހައިކޯޓުން އިއްޔެ ކުރި ހުކުމުގައިވަނީ، މި އެއްބަސްވުން ބާތިލުކުރިއިރު ދިއްފުށީ ފަޅުގައި ހާމިދު ޚަރަދުކޮށްގެން ފަސް ހެކްޓަރުގެ ބިން ހިއްކާފައިވާކަމަށް ބުނާ ބުނުމަށް ދައުލަތުން އިންކާރުކޮށްފައި ނުވާކަމަށެވެ. އަދި އެހެން ބަޔަކަށް މިހާރު އެތަން ކުއްޔަށް ދީފައިވާކަމަށް ދައުލަތުން ބުނި ނަމަވެސް، އެމީހުން އެތަނުގައި އެއްވެސް މަސައްކަތެއް ކުރާކަން ދައުލަތުގެ ބަހުން އެނގެން ނެތް ކަމަށްވެސް އެ ހުކުމުގައި ބުނެފައި ވެއެވެ.
އެހެންކަމުން މިދިޔަ އަހަރު، ވިޔަފާރިވެރިޔާ ހާމިދު އިސްމާއީލްގެ މައްޗަށް ކޮށްފައިވާ ސިވިލް ކޯޓުގެ އަމުރު ބާތިލުކުރަން ޖެހޭ ސަބަބެއް ނެތްކަމަށް ހައިކޯޓުން ފަނޑިޔާރު އަބްދުﷲ ހަމީދާއި، ފަނޑިޔާރު މުހަންމަދު ފައިސަލް އަދި ފަނޑިޔާރު ޝުއައިބު ހުސައިން ޒަކަރިއްޔާގެ އިއްތިފާގުން ކުރެއްވި ހުކުމުގައި ބުނެފައި ވެއެވެ.
