ހައިކޯޓުގެ 5 ފަނޑިޔާރެއްގެ މައްސަލަ ބަލަނީ
ބައެއް ފަނޑިޔާރުންނަށް ރިޓަޔާ ކުރުމަށް ޕްރެޝަރު ކުރިމަތި ކުރުވަމުން ދޭ
ޖުޑީޝަލް ސަރވިސް ކޮމިޝަން
ޖުޑީޝަލް ސާވިސް ކޮމިޝަން (ޖޭއެސްސީ) އިން ހައިކޯޓު ގެ ފަސް ފަނޑިޔާރެއް ގެ މައްސަލަ ބަލަން ފަށައިފި އެވެ.
11 މެމްބަރުން ގެ މައްޗަށް އެކުލެވޭ ހައިކޯޓު ގެ 5 ފަނޑިޔާރެއް ގެ މައްސަލަ ޖޭއެސްސީ އިން ބަލަން ފެށި ނަމަވެސް އެކަން ޖޭއެސްސީ އިން ރަސްމީކޮށް ހާމަ އެއް ނުކުރެ އެވެ. މި ކަމާއި ގުޅޭ ގޮތުން ޖޭއެސްސީ ގެ ބަހެއް ހޯދުމަށް މި ނޫހުން ކުރި މަސައްކަތް ވަނީ ކާމިޔާބު ވާ ގޮތް ނުވެފަ އެވެ.
އެހެންނަމަވެސް ރާއްޖެ އެމްވީ އިން ބެލި ބެލުމުން އެނގިފައިވާ ގޮތުގައި މައްސަލަ ބަލަމުންދާ ފަނޑިޔާރުން ގެ ތެރޭގައި ހިމެނެނީ ފަނޑިޔާރު މުހައްމަދު ފައިސަލް، ފަނޑިޔާރު ހުސައިން މަޒީ، ދުފާތިމަތު ފަރުހީޒާ، ފަނޑިޔާރު މުހައްމަދު ނިޔާޒު، އަދި ފަނޑިޔާރު ދީބާނާޒު ފަހުމީ އާއި ގުޅުން ހުރި މައްސަލަތަކެވެ.
ޖޭއެސްސީ އިން ވަނީ މި މައްސަލަތަކާއި ގުޅިގެން ފަނޑިޔާރުން އެ އިދާރާ އަށް ހާޒިރުކުރުމު ގެ އިތުރުން ބައެއް ފަނޑިޔާރުންނަށް އެ އިދާރާ އަށް ހާޒިރުވުމަށް ނޯޓިސް ވެސް ފޮނުވާފަ އެވެ.
މިފަދަ މައްސަލަތަކެއް ޖޭއެސްސީ އިން ބަލަން ފަށާފައި ވާއިރު މިއީ ފަނޑިޔާރު ގެ އަށް ނުފޫޒު ފޯރުވުން ކަމަށް ބައެއް ފަރާތްތަކުން ސިފަ ކުރެ އެވެ. މީގެ އިތުރުން ބައެއް ފަނޑިޔާރުންނަށް ރިޓަޔަރ ކުރުމަށް ބާރު އަޅަމުންދާ ކަމުގެ އަޑުތައް ވަނީ ފެތުރިފަ އެވެ.
ރިޓަޔަރކުރައްވަން ނިންމަވާފައިވާ ފަނޑިޔާރުންގެ ތެރޭގައި ހައި ކޯޓުގެ އެންމެ ތަޖުރިބާ ހުރި އެއް ފަނޑިޔާރު ކަމަށް ވާ މުހައްމަދު ނިޔާޒު ހިމެނޭ ކަމަށް ވަނީ އަޑު ފެތުރިފަ އެވެ. އޭނާ އަކީ ޖޭއެސްސީގެ މެންބަރުކަން ވެސް އަދާކުރައްވާ ބޭފުޅެކެވެ.
މީގެ ކުރިން ސުޕްރީމް ކޯޓުގެ ބައެއް ފަނޑިޔާރުންގެ މައްސަލަ ވެސް ބަލާ ޖޭއެސްސީ އިން ވަނީ އެ ފަނޑިޔާރުން ވަކިކޮށްފަ އެވެ. ސުޕްރީމް ކޯޓުގެ ބެންޗުގައި ތިއްބަވާ ހަތް ފަނޑިޔާރުންގެ ތެރެއިން ހަތަރުު ފަނޑިޔާރުން އައްޔަނު ކުރައްވާފައި ވަނީ މުއިއްޒު އެވެ.
