އިތުރު 240 މީހުން ވެކްސިންގެ ބޫސްޓަރ ޑޯޒު ޖަހައިފި
ބޫސްޓަރ ޑޯޒު ޖަހާފައިވާ މީހުންގެ ޖުމްލަ އަދަދު ވަނީ 2،630ށް އަރާފައި
ރާއްޖޭގައި ކުރިއަށް ގެންދާ ވެކްސިނޭޝަން ޕްރޮގްރާމް
އިތުރު 240 މީހުން ވެކްސިންގެ ބޫސްޓަރ ޑޯޒް ޖަހައިފިއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ބުނީ، ބުރާސްފަތި ދުވަހު 240 މީހުން ބޫސްޓަރ ޑޯޒް ޖަހާފައިވާ ކަމަށެވެ. އެއީ މާލެ ސަރަހައްދުން 89 މީހުންނާއި އަތޮޅުތެރޭގެ ރަށްރަށުން 151 މީހުން ކަމަށެވެ.
ބުރާސްފަތި ދުވަހު 38 މީހުން ވެކްސިންގެ ފުރަތަމަ ޑޯޒް ޖަހާފައިވާއިރު، މީގެ ތެރޭގައި ހިމެނެނީ މާލެ ސަރަހައްދުން ވެކްސިން ޖެހި 30 މީހުންނާއި އަތޮޅުތެރެއިން ވެކްސިން ޖެހި 8 މީހުންނެވެ. މިއާއެކު ވެކްސިންގެ ފުރަތަމަ ޑޯޒް ޖެހި މީހުންގެ ޖުމްލަ 395،233ށް ވަނީ އަރާފައެވެ.
ވެކްސިންގެ ބުރާސްފަތި ދެވަނަ ޑޯޒް ޖަހާފައިވަނީ 244 މީހުންނެވެ. އެއީ މާލެ ސަރަހައްދުން ވެކްސިން ފުރިހަމަކުރި 139 މީހުންނާއި އަތޮޅުތެރެއިން ވެކްސިން ފުރިހަމަކުރި 105 މީހުންނެވެ. މިއާއެކު މުޅި ރާއްޖެއިން ވެކްސިން ފުރިހަމަކުރި މީހުންގެ ޖުމްލަ ވަނީ 361،635ށް އަރާފައެވެ.
މާލެ ސަރަހައްދުގައި 6 ސެންޓަރަކުން ގެންދަނީ ވެކްސިން ޖަހައިދެމުންނެވެ. އަދި 3 މޮބައިލް ޓީމް ހަރަކާތްތެރިވަމުންދެއެވެ. އަތޮޅުތެރޭގައި 176 ސެންޓަރަކުން ވެކްސިން ޖަހައި ދެމުންދެއެވެ. ކޮވިޑް-19ން ރައްކާތެރިވުމަށް ރާއްޖޭގައި ކުރިއަށް ގެންދާ ވެކްސިނޭޝަން ކެމްޕެއިނުގެ ތެރެއިން، ވެކްސިންގެ ތިންވަނަ ޑޯޒު (ބޫސްޓަރ ޑޯޒު) ޖަހަން ބޭނުންވާ ފަރާތްތަކަށް އެ ފުރުސަތު ވަނީ ހުޅުވާލާފައެވެ.
ވެކްސިންގެ ތިންވަނަ ޑޯޒް ޖެހޭނީ އޭޑީކޭއާއި ހުޅުމާލެ ހޮސްޕިޓަލުން، ކޮންމެ ހޮނިހިރު ދުވަހަކުން ބުރާސްފަތި ދުވަހަށެވެ. މިހާރު ރާއްޖޭގައި ތިންވަނަ ޑޯޒު ޖެހޭނީ ހަމައެކަނި ފައިޒަރ ވެކްސިންގެއެވެ.
އެޗްޕީއޭއިން އާންމުކޮށްފައިވާ މައުލޫމާތުގައިވާ ގޮތުން، މާލެ ސަރަހައްދުގައި ފައިޒަރގެ 3 ވަނަ ޑޯޒް ޖެހުމަށް ދާން ޖެހޭނީ އޭޑީކޭ، ހުޅުމާލޭ ހޮސްޕިޓަލް އަދި އައިޖީއެމްއެޗްއަށެވެ.
