ލަންކާ އާއި ބަންގްލަދޭޝް އަތުންވެސް ރާއްޖެއަށް ނާކާމިޔާބު

ބަންގްލަދޭޝްގެ ވެރިރަށް ޑާކާގައި މިހާރު ކުރިއަށްދާ "ހަވަނަ ސައުތު އޭޝިއަން ބާސްކެޓްބޯޅަ ޗެމްޕިއަންޝިޕް (ސާބާ ޗެމްޕިއަންޝިޕް)" ގައި ސްރީ ލަންކާ އާއި ބަންގްލަދޭޝާ ދެކޮޅަށް ކުޅުނު މެޗުތަކުންވެސް ރާއްޖޭގެ ގައުމީ ބާސްކެޓްބޯޅަ ޓީމު ބަލިވެއްޖެއެވެ.

މި މުބާރާތުގައި ރާއްޖޭން ކުޅުނު ފަހު މެޗުގައި ލަންކާ އަތުން ބަލިވީ 77-45 ޕޮއިންޓުންނެވެ. ބުރާސްފަތި ދުވަހު ކުޅުނު މެޗުގެ ފުރަތަމަ ކުއާޓަރު ލަންކާއިން ކާމިޔާބުކޮށްފައިވަނީ 21-8 ޕޮއިންޓުންނެވެ. އަދި ދެވަނަ ކުއާޓަރު ނިންމާލިއިރު ލަންކާ ކުރީގައި އޮތީ 43-23 އިންނެވެ. އޭގެ ފަހުން 60-32 އިން ލަންކާ ކުރީގައި އޮވެ ތިންވަނަ ކުއާޓަރު ނިންމާލިއިރު، ފަހު ކުއާޓަރު ނިމުނުއިރު ލަންކާ ކުރީގައި އޮތީ 77-45 ޕޮއިންޓުންނެވެ.

މި މުބާރާތުގައި ކުޅުނު ތިން މެޗުންވެސް ރާއްޖެ ބަލިވިއިރު، ބުދަ ދުވަހު ކުޅުނު މެޗުން ވަނީ 56-65 ޕޮއިންޓުން ބަންގްލަދޭޝް އަތުން ބަލިވެފައެވެ. އަދި ފުރަތަމަ މެޗުން ބަލިވީ ސަރަހައްދުގެ ގަދަ ބާރު އަދި މި މުބާރާތުގެ އެންމެ ކާމިޔާބު ޓީމު ކަމަށްވާ އިންޑިއާ އަތުން 88-31 ޕޮއިންޓުންނެވެ.

މި ފަހަރު ސާބާ ޗެމްޕިއަންޝިޕާ ކުރިމަތިލިއިރު ގައުމީ ޓީމަށް ވަނީ އަނިޔާގެ މައްސަލަތަކެއް ކުރިމަތިވެފައެވެ. އެގޮތުން އަނިޔާގެ ސަބަބުން ރިޝްފާން ރަޝީދު (ކޮކީ) އާއި އަހުމަދު ފިރާޝަށް ވަނީ މި މުބާރާތުން ފުރުސަތު ގެއްލުނެވެ.

މި ފަހަރުގެ މުބާރާތާ ރާއްޖެ ކުރިމަތިލާފައިވަނީ މުޅިން ދިވެހި ކޯޗިން ޓީމަކާއެކުއެވެ. އެގޮތުން ފަހަކަށް އައިސް ބާސްކެޓުގައި ވިދަމުން އަންނަ ކޯޗު އިލްޔާސް އިބްރާހިމް (އިއްލެ) ގައުމީ ޓީމުގެ ކޯޗުގެ މަގާމު އަދާކުރިއިރު، އިއްލެ އާއެކު އެސިސްޓަންޓް ކޯޗުންގެ ގޮތުގައި ހަރަކާތްތެރިވީ ގައުމީ ބާސްކެޓްބޯޅަ ޓީމުގެ ކުރީގެ ކެޕްޓަން މުޙައްމަދު ޒިލާލް (ޒިލާ) އާއި، ކުރީގެ ބާސްކެޓްބޯޅަ ތަރި އަލީ ފަޒްލީ އަދި މުޙައްމަދު ނަސީރެވެ.