ސާބާ ވިމަންސް ޗެމްޕިއަންޝިޕްގައި އެންމެ ފަހުގެ ޗެމްޕިއަން ސްރީ ލަންކާ ބަލިކޮށް، ނޭޕާލުން އުންމީދެއް ހޯދައިފިއެވެ.

ނޭޕާލްގެ ފުރަތަމަ މެޗުގައި އެ ޓީމު ވަނީ ރާއްޖެ އަތުން ބަލިވެފައެވެ. ލަންކާ އިން ވަނީ ފުރަތަމަ މެޗުގައި ބޫޓާން ބަލިކޮށްފައެވެ. އަންގާރަ ދުވަހުގެ ރޭ ޒުވާނުންގެ މަރުކަޒުގެ އެތެރޭ ހޯލުގައި ކުޅުނު މެޗުގައި ނޭޕާލުން ވަނީ ރަނގަޅު ކުޅުމެއް ދައްކައި ލަންކާ ބަލިކޮށް، މުބާރާތުގައި ކުރިއަށް ދިޔުމަށް އުންމީދެއް ހޯދާފައެވެ.

ނޭޕާލުން ލަންކާ މައްޗަށް ކުރި ހޯދީ 49-55 އިންނެވެ. މެޗުގެ ފުރަތަމަ ދެ ކުއާޓަރު ނިންމާލިއިރު ވެސް ލީޑު ކުރަމުން ދިޔައީ ނޭޕާލުންނެވެ. އެއީ 21-33 އިންނެވެ. ތިން ވަނަ ކުއާޓަރުގައި ވެސް ނޭޕާލުން ވަނީ މޮޅަށް ކުޅެފައެވެ. މެޗުގައި ލަންކާގެ ކުޅުންތެރިން ފަރާތުން ވަނީ ވަރުބަލިކަން ފެނިފައެވެ. ނޭޕާލުން ތިން ވަނަ ކުއާޓަރު ނިންމާލީ 10 ޕޮއިންޓުގެ ލީޑަކުންނެވެ. އެއީ 33-43 އިންނެވެ.

މުބާރާތުގައި ނޭޕާލާއި ލަންކާ ވަނީ ދެ މެޗު ކުޅެފައެވެ. ދެ ޓީމަށް ވެސް ލިބެނީ އެއް މޮޅާއި އެއް ބައްޔެެވެ. ރާއްޖެއިން މިހާތަނަށް ކުޅެފައިވަނީ އެންމެ މެޗެކެވެ. އެއީ ނޭޕާލް އަތުން މޮޅުވި މެޗެވެ. ރާއްޖޭގެ ދެ ވަނަ މެޗުގައި ބުދަ ދުވަހުގެ ރޭ ނުކުންނާނީ ލަންކާއާ ދެކޮޅަށެވެ. ނޭޕާލްގެ ތިން ވަނަ މެޗު އޮންނާނީ ބުދަ ދުވަހުގެ ހަވީރު ބޫޓާނާ ދެކޮޅަށެވެ.