ޕްރަސަންނަގެ ތައުރީފު ލަންކާ ކުޅުންތެރިންނަށް

ސާބާ ވިމަންސް ބާސްކެޓްބޯޅަ ޗެމްޕިއަންޝިޕްގައި ދިވެހިރާއްޖެ ބަލިކޮށް، ސްރީ ލަންކާ އިން މުބާރާތުގެ ރަން މެޑަލް ހޯދުމުން އެ ޓީމުގެ ކޯޗު ލިޔާނަގޭ ޕްރަސަންނަ ކުޅުންތެރިންނަށް ތައުރީފުކޮށްފިއެވެ.

ރާއްޖެއާ ދެކޮޅަށް ނުކުތްއިރު، ރަން މެޑަލް ބޭނުންނަމަ ލަންކާ އަަށް ޖެހުނީ ރާއްޖެ ބަލިކުރާށެވެ. އެއީ ދެ ވަނަ މެޗުގައި ނޭޕާލް އަތުން އެ ޤައުމު ބަލިވެފައި އޮތުމުންނެވެ. ލަންކާ އިން ވަނީ ރާއްޖެއާ ދެކޮޅަށް މޮޅު ކުޅުމެއް ދައްކައި މެޗުން މޮޅުވެފައެވެ.

މެޗަށްފަހު ވާހަކަ ދައްކަމުން ޕްރަސަންނަ ބުނީ ކުޅުންތެރިންގެ ފަރާތުން އޭނާ ބޭނުންވި ކުޅުން ފެނުނު ކަމަށެވެ. އަދި އޭނާ ބުނީ ނޭޕާލް އަތުން ބަލިވުމާއެކު، ހުރިހާ ވެސް މަސައްކަތެއް ކުރީ ރާއްޖެ އަތުން މޮޅުވާން ކަމަށެވެ. ޕްރަސަންނަ ބުނީ ނޭޕާލް މެޗުގައި ހެދުނު ގޯސްތައް ކުޅުންތެރިން ވަރަށް ބޮޑަށް ރަނގަޅު ކުރި ކަމަށެވެ.

މީގެ އިތުރުން ޕްރަސަންނަ ބުނީ ރަން މެޑަލް ދިފާއުކުރުމަކީ ވަރަށް އުނދަގޫ ކަމެއް ކަމަށެވެ. ޚާއްސަކޮށް ލަންކާ ޓީމަށް ކަންތައް ދިމާވި ގޮތުން، ބުރަ މަސައްކަތެއް ކުރަން ޖެހުނު ކަމަށެވެ. އޭނާ ބުނީ މެޗުން މޮޅުވެވުނީ ކުޅުންތެރިންގެ ހިތްވަރުން ކަމަށާއި، ހުރިހާ ކްރެޑިޓެއް އޭނާ ދޭން ބޭނުންވަނީ ވެސް ކުޅުންތެރިންނަށް ކަމަށެވެ.

ލަންކާ އިން ވަނީ މީގެ ކުރިން 2016 ވަނަ އަހަރު ބޭއްވި ސާބާ މުބާރާތުގައި ވެސް ރަން މެޑަލް ހޯދާފައެވެ. އެއަހަރުގެ މުބާރާތް އެ ޤައުމުން ކާމިޔާބުކުރީ އެއްވެސް މެޗަކުން ބަލިނުވެއެވެ.