ފަތުރުވެރިކަން ތަރައްގީ ކުރައްވަން މިނިސްޓަރ ފައިސަލް އާއި އިންޑިއާގެ ހައިކޮމިޝަނަރު ބަރެސްދުއަށާއި ގާދޫއަށް
ގާދޫ އަކީ 23 ޑިސެމްބަރު 2021ން ފެށިގެން ރާއްޖޭގެ ތިމާވެށި ރައްކައުތެރިކޮށް ދެމެހެއްޓުމާބެހޭ ގާނޫނުގެ ދަށުން ހިމާޔަތް ކޮށްފައިވާ ރަށެކެވެ. ބަރެސްދޫ އަކީ ރައީސް ޔާމީންގެ ވެރިކަމުގައި އިންޓަރގްރޭޓެޑް ޓޫރިޒަމް ޑިވެލޮޕްމަންޓަށް ތަރައްގީ ކުރަން މަސައްކަތްކޮށް ކަރަޕްޝަންގެ ސަބަބުން މަސައްކަތް ހުއްޓިފައި އޮތް ރަށެކެވެ.
އިންޑިއާގެ ހައިކޮމިޝަނަރ މުނު މަހާވަރު އާއި ޓޫރިޒަމް މިނިސްޓަރ އިބްރާހިމް ފައިސަލް ބަރެސްދޫގައި
ޓޫރިޒަމް މިނިސްޓަރ އިބްރާހީމް ފައިޞަލް އާއި ދިވެހިރާއްޖެއަށް ކަނޑައަޅުއްވާފައި ހުންނަވާ އިންޑިއާގެ ހައިކޮމިޝަނަރ މުނު މަހާވަރު ފަތުރުވެރިކަން ތަރައްޤީކުރުމުގެ ފުރުޞަތުތައް ބެއްލެވުމަށް ލ. އަތޮޅުގެ ބަރެސްދޫ އާއި ގާދޫއަށް ޒިޔާރަތްކުރައްވައިފިއެވެ.
މިނިސްޓަރ ފައިޞަލް ސޯޝަލް މީޑިއާގައި ކުރެއްވި ޕޯސްޓެއް ގައި ވިދާޅުވެފައިވަނީ ހައިކޮމިޝަނަރ އަރިހުގައި ބަރެސްދުއަށާއި ގާދޫއަށް ޒިޔާރަތް ކުރައްވާ މި ރަށްތަކުގެ ޤުދުރަތީ ރީތިކަމާއި ތަރިކަ ހިމާޔަތްކުރުމާއެކު އިޤްތިޞާދީ ކުރިއެރުން ހޯދުމަށްޓަކައި ޓޫރިޒަމް ތަރައްޤީކުރުމުގެ ފުރުޞަތުތަކާ ބެހޭ ގޮތުން މަޝްވަރާކުރެއްވި ކަމުގައެވެ.
މީގެ ތެރެއިން ގާދޫ އަކީ ކުރިން މީހުން ދިރިއުޅުނު ރަށެކެވެ. ނަމަވެސް އެރަށުގެ މީހުން އެހެން ރަށަކަށް ހިޖުރަކުރުމާއެކު 2016 ވަނަ އަހަރުން ފެށިގެން އެއީ ފަޅުރަށެއްގެ ގޮތުގައި ކަނޑައަޅާފައިވާ ރަށެކެވެ. މިހާރު އެ ރަށަކީ 23 ޑިސެމްބަރު 2021ން ފެށިގެން ރާއްޖޭގެ ތިމާވެށި ރައްކައުތެރިކޮށް ދެމެހެއްޓުމާބެހޭ ގާނޫނުގެ ދަށުން ހިމާޔަތް ކޮށްފައިވާ ރަށެކެވެ.
ބަރެސްދޫ އަކި ރައީސް ޔާމީންގެ ވެރިކަމުގައި އިންޓަރގްރޭޓެޑް ޓޫރިޒަމް ޑިވެލޮޕްމަންޓަށް ތަރައްގީ ކުރުމަށް ޕްލޭންތަކެއް ހަދާ ބައެއް ފަރާތްތަކަށް ބިންތައް ދޫކޮށް އެޑްވާންސް ފައިސާވެސް ސަރުކާރަށް ނަގާފައިވާ ރަށެކެވެ. އެހެން ނަމަވެސް ކަރަޕްޝަންގެ މައްސަލަތައް ކުރިމަތިވެ އެ މަޝްރޫއު ރައީސް ޔާމީންގެ ވެރިކަން ނިމުނު އިރުވެސް އެކަށީގެންވާ ގޮތެއްގައި ކުރިއަށްދާ ގޮތް އޮތީ ނުވެފައެވެ.
