ކިހާދުއްފަރު އެއްބަސްވުން ބާތިލުކުރަން ސަރުކާރުން އުޅުމުން ކޯޓުން ހުއްޓުވައިފި

ބ. އަތޮޅު ކިހާދުއްފަރުގެ ހެޑް ލީސް ބާޠިލު ކުރުމަށް މިނިސްޓްރީ އޮފް ޓޫރިޒަމުން ނިންމި ނިންމުން ތަންފީޒު ކުރުން ހުއްޓާލުމަށް ސިވިލް ކޯޓުން ވަގުތީ އަމުރެއް ނެރެފިއެވެ.

މި އަމުރު ބުރާސްފަތި ދުވަހު ނެރެފައި ވަނީ އެ ރަށުގެ ހެޑް ލީސް އޮތް ފަރާތް ކަމުގައިވާ އަތަމާ މެރިން އިންޓަނޭޝަނަލް އިން ކޯޓަށް ހުށަހެޅި މައްސަލައަކާ ގުޅިގެންނެވެ.

ކިހާ މޯލްޑިވްސް ބްރޭންޑްގެ ދަށުން ހިންގަމުންދާ މި ރިސޯޓު ސަބްލީސް ކޮށްފައި ވަނީ ކޮރަލް އައިލެންޑްސް (މޯލްޑިވްސް) އަށެވެ.

މިނިސްޓްރީ އޮފް ޓޫރިޒަމުން އޯގަސްޓް ބުނެފައިވާ ގޮތުގައި، މި ރިސޯޓު ހިންގުމަށް ދޫކޮށްފައިވާ ލައިސަންސް ގެ މުއްދަތު 2019 ވަނަ އަހަރުގެ ސެޕްޓެމްބަރު މަހު 27 ގައި ވަނީ ހަމަވެފައެވެ. ނަމަވެސް ހުއްދަ ނެތި އެ ރިސޯޓުން ފަތުރުވެރިންނަށް ޚިދުމަތް ދެމުން ގެންގޮސްފައިވާ ކަމަށެވެ. އަދި ލައިސަންސް ނެތި ރިސޯޓު ހިންގުމުގެ ސަބަބުން އަތަމާ ދެ ފަހަރެއްގެ މަތިން ޖޫރިމަނާ ކޮށްފައިވާ ކަމަށާއި، "އިތުރު ފިޔަވަޅުތަކެއް" އަޅަމުންދާ ވަގުތެއްގައި ފަތުރުވެރިން އެ ރިސޯޓަށް ޒިޔާރަތް ކުރުމާ މެދު ސަމާލު ވުމަށް އިންޒާރު ދީފައިވާ ކަމަށެވެ.

ރިސޯޓުން ކަންކަން ރަނގަޅު ކުރުމަށް އެކަށީގެންވާ ގޮތެއްގައި މަސައްކަތް ކޮށްފައި ނުވާތީ، އޮކްޓޯބަރު 9 ގައި ރިސޯޓު އަނބުރާ ހޯދުމަށް ނޯޓިސްއެއް ދެވުނެވެ. މިނިސްޓްރީގެ ނޯޓިސްގައި ބުނެފައިވަނީ އޮކްޓޯބަރު 9 ގައި ނޯޓިސް ދިނުމަށްފަހު އެއް ހަފްތާ ފަހުން އެއްބަސްވުން ބާޠިލުވީ ކަމުގައި ބަލާނެ ކަމަށެވެ. ނަމަވެސް، އަތަމާ މެރީން އިންޓަރނޭޝަނަލް އިން ބުނެފައިވަނީ ނޯޓިސް ފޮނުވާފައިވަނީ އެއްބަސްވުމާ ޚިލާފަށް ކަމަށެވެ.

ކޯޓަށް ހުށަހެޅި ބަޔާނުގައި، އެ ރިސޯޓު ފަތުރުވެރިކަމުގެ މިންގަނޑުތަކާ އެއްގޮތްނުވާ ކަމަށް ކަމަށް އަތަމާ އިން އިއުތިރާފު ވެފައި ވެއެވެ. ނަމަވެސް ސަރުކާރުން މައްސަލަތައް ފާހަގަ ކުރުމުން އެކަންކަން ހައްލުކުރުމަށް މަސައްކަތް ކޮށްފައިވާ ކަމަށް ބުނެފައިވެއެވެ. ރަށުގެ ހިންގުމުގެ ފެންވަރު ދަށަށް ދިޔައީ ކޮވިޑް-19 ބަލިމަޑުކަމާ ގުޅިގެން ކަމަށް އަތަމާ އިން ބުނެފައިވެއެވެ. އަދި 2020 ވަނަ އަހަރުގެ ޑިސެމްބަރު މަހު އަލުން ހުޅުވުމުގެ ހުއްދަ ލިބުނު ނަމަވެސް، ރިސޯޓު ގައި ބޮޑެތި މަރާމާތުތަކެއް ކުރަންޖެހިފައިވާ ކަމަށް ބުނެފައިވެއެވެ. އަދި ކޮރަލް އައިލެންޑްސްގެ މާލީ ދަތިކަމުގެ ސަބަބުން ސަބްލީސްގެ ކުލި ދެއްކުމަށް ހުރަސްއެޅިފައިވާ ކަމަށް ވެސް ބުނެފައިވެއެވެ.

2023 ވަނަ އަހަރުގެ ޑިސެމްބަރު މަހު ސަރުކާރުން ހެދި އެ ރިސޯޓުގެ އިންސްޕެކްޝަނު ގައި މުސާރަ ނުދިނުމާއި، ޓެކްސް ނުދެއްކުމާއި، މަރާމާތު ނުކުރުމާއި، އަދި ފެސިލިޓީތަކުގެ ރަޖިސްޓްރޭޝަން މުއްދަތު ހަމަވެފައިވުމުގެ މައްސަލަ ހިމެނެއެވެ. އަތަމާ އިން ކޯޓުގައި ބުނެފައި ވަނީ މިނިސްޓްރީގެ ނޯޓިސް ލިބުމާއެކު ވަގުތުން ހިންގުން ހުއްޓާލި ކަމަށާއި، އޭގެ ފަހުން ކުރެވުނު މަސައްކަތްތައް އަމާޒު ކުރެވިފައި ވަނީ ބޭނުންވާ ހުއްދަތައް ހޯދުމަށާއި ޤަވާއިދާ އެއްގޮތްވުމުގެ މައްސަލަތައް ހައްލުކުރުމަށް ކަމަށެވެ.

ޓޫރިޒަމް މިނިސްޓްރީގެ ފަރާތުން ހާޒިރު ނުވާ އަޑުއެހުމެއް ގައި ސިވިލް ކޯޓުން ވަގުތީ އަމުރު ނެރުނު އިރު، މި މައްސަލަ އަކީ އަވަސް މައްސަލައެއް ކަމަށާއި، މިނިސްޓްރީގެ ނިންމުން ތަންފީޒު ކޮށްފި ނަމަ އަތަމާއަށް އިއާދަ ނުކުރެވޭ ވަރުގެ ގެއްލުމެއް ލިބިދާނެ ކަމަށް ކޯޓުން ކަނޑައަޅާފައިވެއެވެ.

މި އަމުރުގެ ދަށުން މިނިސްޓްރީން ދީފައިވާ އެއްބަސްވުން ބާޠިލު ކުރުމުގެ ނޯޓިސް 2 އޮކްޓޯބަރު 2025 އާ ހަމައަށް ވަނީ ފަސްކޮށްފައެވެ. އަދި ތިންވަނަ ފަރާތެއްގެ ޙައްޤުތަކަށް އަސަރު ކޮށްފާނެ އެއްވެސް ތަންފީޒީ ފިޔަވަޅެއް އެޅުން މަނާ ކޮށްފައި ވެއެވެ. އަދި ކޯޓުން އަތަމާ އަށް އަންގާފައިވަނީ 14 ދުވަހުގެ ތެރޭގައި މައުޟޫޢީ މައްސަލަ ހުށަހަޅަން ޖެހޭނެ ކަމަށެވެ.

އަތަމާ މެރިން އިންޓަނޭޝަނަލް އިން ކިހާދުއްފަރުގެ ލީސް އެގްރީމެންޓުގައި ސޮއި ކޮށްފައިވަނީ 1997 ވަނަ އަހަރުގެ އޯގަސްޓް މަހުއެވެ. ކޯޓުގައި ބުނެފައިވާ ގޮތުގައި ވޭތުވެދިޔަ 28 އަހަރުގެ ތެރޭގައި އެ ރަށުގައި 56 މިލިއަން އެމެރިކާ ޑޮލަރު ވަނީ އިންވެސްޓް ކޮށްފައެވެ.

ސަރުކާރުން މީގެ ކުރިންވެސް ކިހާދުއްފަރު އަތުލަން މަސައްކަތް ކުރިއެވެ. އެ ދުވަސްވަރު، ރިސޯޓު ހިންގަމުންދިޔަ ކުންފުންޏަށް ސިވިލް ކޯޓާއި ކްރިމިނަލް ކޯޓުން ޙުކުމްކޮށްފައި ވަނީ އެތަން ހުސްކޮށް، ކުލީގެ ގޮތުގަ އާއި ޖޫރިމަނާގެ ގޮތުގައި 1.4 މިލިއަން އެމެރިކާ ޑޮލަރު ދެއްކުމަށެވެ. ނަމަވެސް، ސުޕްރީމް ކޯޓުން ޙުކުމް ތަންފީޒު ކުރުން ފަސް ކުރުމުގެ އަމުރެއް ނެރުނެވެ.