ބ. ބަތަލާގައި އުސޫލާއި ޚިލާފަށް ގޮނޑުދޮށް ހިމާޔަތްކުރުމާއި އުމްރާނީ ބައެއް މަސައްކަތްތައް ކޮށްފައިވާތީ އެކަމާ ޒިންމާވާ ފަރާތްތަކާ މެދު ފިޔަވަޅުއަޅައި އަދި ރަށް އެއްކޮށް ގިރައިގެން ދިއުމުގެ ސަބަބުން ލިބުނު ގެއްލުމުގެ ބަދަލު ހޯދުމަށް އޮޑިޓަރ ޖެނެރަލްގެ އޮފީހުން ލަފާދީފިއެވެ.

އެފަދައިން އޮޑިޓަރޖެނެރަލްގެ އޮފީހުން ލަފާދީފައި ވަނީ އެ އޮފީހުން މި ހަފްތާގައި ނެރުނު "މާޅޮސްމަޑުލު ދެކުނު ބުރީގައިވާ ގުދުރަތީ ނުވަތަ ތަބީއީގޮތުގައި ރައްކާތެރިކޮށް ދަމަހައްޓާ ތަންތަން ހިންގުމުގެ ނިޒާމާއި ގުޅޭ އެންވަޔަރަމެންޓަލް އޮޑިޓް ރިޕޯޓް"ގައެވެ.

އެ ރިޕޯޓްގައި ފާހަގަކޮށްފައިވާ ގޮތުގައި ބ. ބަތަލާ ރަށުގައި ގޮނޑުދޮށް ހިމާޔަތްކުރުމާއި އުމްރާނީ ބައެއް މަސައްކަތްތައް ކޮށްފައި ވަނީ ނަގަން ޖެހޭ ހުއްދަތަށް ނުނަގައެވެ. އަދި އެ މަސައްކަތް ކޮށްފައި ވަނީ ތިމާވެއްޓަށް އަސަރު ކުރާނެ ގޮތަށެވެ. އެ ރަށް ގިރައިގެން ދިއުމަށް މަގުފަހިވި ސަބަބަކީ ވެސް އެކަށީގެންވާ ގޮތެއްގައި ދިރާސާ ނުކުރުން ކަމަށް އެ އޮޑިޓް ރިޕޯޓުގައި ފާހަގަކޮށްފައިވެއެވެ.

އެ ރިޕޯޓްގައި އިތުރަށް ފާހަގަކޮށްފައިވާ ކަން ކަމަށް ބަލާ އިރު 5 ޑިސެމްބަރ 2010ގައި އެ ރަށް ކުއްޔަށް ދިނުމަށް އެއްބަސްވެފައިވާ ކަމަށެވެ. އަދި 2011އިގައި ބަތަލާ ހިމެނޭ ސަރަހައްދު ހިމާޔަތް ކުރީ އެތަން ކުއްޔަށް ދިނުމުގެ އެއްބަސްވުން ބާތިލް ނުކޮށް ކަމަށް އޮޑިޓް އޮފީހުން ބުނެއެވެ.

ބަތަލާ ހިމާޔަތް ކުރުުމަށް ނިންމި ނިންމުން އެކަށީގެންވާ ގޮތެއްގައި ވިލަރެސް ނުކުރާކަން އެ ރިޕޯޓުން އެނގެއެވެ. 2013ވަނަ އަހަރު ފަތުރުވެރިކަމުގެ ވުޒާރާ އިން ވަނީ ބަތަލާ އަމިއްލަ ކުންފުންޏަކަށް 20 އަހަރު ދުވަހަށް ދީފައެވެ. އެ ކަމަށްޓަކާ ބޭނުންވާ އެއްބަސްވުން އެކުލަވާލާފައި ވަނީ ސަރުކާރުން އެ ރަށް ފަތުރުވެރިކަމުގެ ބޭނުމަށް ދޫކުރަން ނިންމުމުގެ ކުރިންނެވެ.

ރަށުގެ ކޮންމެ އަކަމީޓަރަކަށް ހަތަރު ޑޮލަރު ދައްކަންޖެހޭ ގޮތަށް އެ ރަށް ކުއްޔަށް ދިން ނަމަވެސް ބިމުގެ ސައިޒު ޓުއަރިޒަމް މިނިސްޓްރީން މީރާ އާއި ހިއްސާ ނުކުރާތީ އެ ރަށުގެ ކުލި ހިސާބުކޮށްފަ އެއް ނުވެއެވެ. އޮޑިޓް ރިޕޯޓުން އެނގޭ ގޮތުގައި ބަތަލާގެ އެއްބަސްވުމުގެ މައުލޫމާތު މީރާއަށް ހިއްސާކޮށްފައިވަނީ ޖުލައި، 2016 ގައެވެ.