އަމިއްލައަށް ޓެސްޓުކޮށް 15 މިނިޓު ތެރޭގައި ކޮވިޑްގެ ނަތީޖާ ލިބޭ ކިޓެއް ރާއްޖޭގައި
މިކިޓު ބޭނުން ކޮށްގެން އަމިއްލަ ގޭގައި ކޮވިޑަށް ޓެސްޓު ކުރެވޭނެ
އެންޓިޖެން ރެޕިޑް ޓެސްޓު ކިޓު
ކޮވިޑް-19ގެ ބަލި ހުރިތޯ އަމިއްލައަށް ޓެސްޓުކޮށް 15 މިނެޓު ތެރޭގައި ނަތީޖާ ލިބޭ ކިޓެއް ރާއްޖެއަށް ތައާރަފް ކޮށްފިއެވެ.
އެންޓިޖެން ރެޕިޑް ޓެސްޓު ކިޓު ރާއްޖެއަށް ތައާރަފްކޮށްފައި ވަނީ އެމްވީ މޮޓޯސް އިންނެވެ. ދަނބުރު މަގުގައި ހުންނަ އެމްވީ މޮޓޯސްގެ ފިހާރައިގެ އިތުރުން އެމްވީ މޮޓޯސްގެ ފޭސްބުކް އަދި އިންސްޓަގްރާމް ޕޭޖަށް މެސެޖު ކޮށްގެންވެސް ކިޓު ލިބެން ހުންނާނެއެވެ.
މިކިޓަކީ ދުނިޔޭގެ ކުރިއަރާފައިވާ ގިނަ ގައުމުތަކެއްގައި މިހާރު ބޭނުން ކުރަމުން އަންނަ ކިޓެކެވެ. އެގޮތުން އިޓަލީ، ކްރޮއޭޝިޔާ، އޮސްޓްރިއާ، ޕޯޗުގަލް، ޕޮލެންޑް، ސްޕެރިން އަދި ޖާމަނީގެ އިތުރުން ބެލްޖިއަމްގައިވެސް މިހާރު އަންނަނީ މިކިޓު ބޭނުން ކުރަމުންނެވެ.
ރާއްޖޭގައި މިހާރު ކޮވިޑަށް ޓެސްޓު ކުރުމަށް ބޭނުންކުރާ ޕީސީއާރު ޓެސްޓާ އަޅާބަލާއިރު، މިކިޓަކީ 97 އިންސައްތަ ސީދާ ނަތީޖާ ނެރޭ ކިޓެއް ކަމަށް އެމްވީ މޮޓޯސްއިން މައުލޫމާތުދެއެވެ. އަދި މިކިޓުގެ ނަތީޖާ ޕޮޒިޓިވް ކަމަށް ދައްކައިފި ނަމަ ޕީސީއާރު ޓެސްޓެއް ހަދަން މުހިންމު ކަމަށް އެމްވީ މޮޓޯސްއިން ބުނެއެވެ.
މިކިޓު ބޭނުން ކުރުމަށްޓަކައި އެންމެ ފުރަތަމަ ޖެހޭނީ ތިނެއް ނުވަތަ ފަސް ފަހަރު ގަދަޔަށް ކެއްސާލާށެވެ. އެއަށްފަހު އޭގައި އޮންނަ ޓިއުބަށް ކުޅު ޖަހައި 'ބަފަ' އާއި އެއްކޮށްލުމަށްފަހު ކިޓަށް އޭގެން ދެތިކި ޖައްސާނީއެވެ.
މިޓެސްޓު ހެދުމަށްފަހު 15 މިނެޓު ތެރޭގައި ކިޓުން ދެރޮނގު ދައްކައިފި ނަމަ އޭގެ މާނައަކީ އެމީހާ ވަނީ ކޮވިޑަށް ޕޮޒިޓިވްވެފައެވެ. ނަތީޖާ ނެގެޓިވްވެއްޖެ ނަމަ ކިޓުގައި އިންނަ 'ސީ' އަކުރާ ދިމާލުން ރޮނގެއް އަރާނެއެވެ. އަދި ނުބައިކޮށް ޓެސްޓު ހެދިއްޖެ ނަމަ ކިޓުގައި އިންނަ 'ޓީ' އަކުރާ ދިމާލުން ރޮނގެއް ފެންނާނެއެވެ.
