"އޮޅުމެއް އަރާ ކޮންމެ ފަހަރަކު ހަތިޔާރު އުފުލުމަކީ ތަހުޒީބީ ޒަމާން ދަންނަ ސިފައެއް ނޫން"

އޮޅުމެއް އަރާ ކޮންމެ ފަހަރަކު ހަތިޔާރު އުފުލުމަކީ ތަހުޒީބީ ޒަމާން ދަންނަ ސިފައެއް ނޫން ކަމަށް ވިދާޅުވެ, އެމެރިކާގެ ކަންބޮޑުވުންތަކަށް ޗައިނާގެ ރައީސް ޝީ ޖިން ޕިން ރައްދު ދެއްވައިފިއެވެ.

ޝީ މިގޮތަށް ވިދާޅުވީ އެމެރިކާގެ ރައީސް ޖޯ ބައިޑަންއާއެކު އޮންލައިންކޮށް ކުރިއަށް ގެންދެވި 3 ގަޑި އިރުގެ ބައްދަލުވުމުގައެވެ. މި ބައްދަލުވުމުގައި އިންސާނީ ހައްގުތަކުގެ މައްސަލައިގައި ބައިޑަން ވަނީ ވާހަކަ ދައްކަވާފައެވެ. ޝީ ވަނީ ޓައިވާންގެ މައްސަލައިގައި ހަރުކަށި ފިޔަވަޅުތަކެއް އަޅުއްވާނެކަމަށް ވިދާޅުވެފައެވެ.

3 ގަޑި އިރަށް ކުރިއަށް ގެންދިޔަ މި ބައްދަލުމުގައި، ދުނިޔޭގެ އެންމެ ބޮޑު ދެ އިގުތިސާދުގެ ވެރިން ވަނީ ކަންކަން އިތުރަށް ގޯސްވިޔަ ނުދީ ސުލްހަވެރިކަމާއެކު ބައްދަލުވުން ކުރިއަށް ގެންދެވުމަށް މަސައްކަތް ކުރައްވާފައެވެ.

ހޯމަ ދުވަހު ފެށި މި ބައްދަލުވުމުގައި އެއްވެސް ނިންމުމެއް ނިންމާފައި ނުވާކަމަށް ބޭރުގެ މީޑިއާތަކުން ވަނީ ރިޕޯޓްކޮށްފައެވެ. އެހެންނަމަވެސް ދެ ލީޑަރުންގެ މެދުގައި އޮތް ނުތަނަވަސްކަން އިތުރަށް ގޯސްވިޔަނުދީ ކުރިއަށް ގެންދިއުމަށް މަގުފަހިވިކަމަށް ރިޕޯޓްތައް ބުނެއެވެ.

ދެ ބޭފުޅުންގެ ކުރި މަޝްވަރާތަކުގެ ތެރޭގައި ނޯތު ކޮރެއާ، އަފްޣާނިސްތާން އަދި އީރާންގެ މައްސަލައާއި، ބައިނަލްއަގުވާމީ ހަކަތައިގެ ވިޔަފާރިއާއި، ވިޔަފާރިއާއި ވާދަވެރިކަމާއި، މޫސުމާއި، އަސްކަރީ މައްސަލަތަކާއި، ކޮވިޑްގެ އާލަމީ ވަބާގެ އިތުރުން، ދެ ލީޑަރުން މީގެ ކުރިން ދެބަސްވި ބައެއް ކަންކަމާއި ގުޅޭ ގޮތުން މަޝްވަރާކުރައްވާފައިވެއެވެ.

މި ބައްދަލުވުމުގައި ޝީ ވަނީ، ދެގައުމަކީ ކަނޑުގައި ދަތުރުކުރަމުންދާ ބޮޑު ދެ އުޅަނދުކަމަށް ސިފަކުރައްވައި، ދެ އުޅަނދުގެ މިސްރާބުވެސް ހިފަހައްޓައި މުޑި ނާރާނެ ގޮތަކަށް ދަތުރުކުރުމަށް އެދިވަޑައިގެންފައެވެ. ޝީ ވަނީ މަޝްވަރާއަށް ގޮވާލައްވާފައެވެ. ޝީ އަބަދުވެސް ވިދާޅުވަނީ އޮޅުމެއް އަރާ ނަމަ ގުޅުން ރަނގަޅު ކުރަން އޮތް އެންމެ ރަނގަޅު ގޮތަކީ އަހައިގެން އޮޅުންފިލުވުން ކަމަށެވެ.

އަދި އިހުތިރާމް ކުރުމަކީ ދަސްކުރަން ޖެހޭ ކަމެއް ކަމަށާއި، ދެ ގައުމުގައި ވެސް ކަންކަން ނިންމަން ތިބީ އިންސާނުން ކަމަށެވެ. އަދި އޮޅުން އަރާ ކޮންމެ ފަހަރަކު ހަތިޔާރު އުފުލުމަކީ ތަހުޒީބީ ޒަމާން ދަންނަ ސިފައެއް ނޫން ކަމަށެވެ.

މި ބައްދަލުވުމުގައި ބައިޑަން ވިދާޅުވީ، ގަސްދުގައި ނަމަވެސް އަދި ނޫން ނަމަވެސް، ދެގައުމުގެ ދޭތެރޭގައި އުފެދިފައިވާ ނުތަނަވަސްކަން ގޯސްވާކަން ބޭނުންފުޅު ނުވާކަމަށެވެ.

ޓައިވާންއާ ޗައިނާއާ ދެމެދު އޮތް މައްސަލައާ ބެހޭ ގޮތުން ވެސް ދެ ރައީސުން މަޝްވަރާ ކުރެއްވިއެވެ. ބައިޑަން ވިދާޅުވީ ޗައިނާ-އެމެރިކާގެ ގުޅުމަކީ ވެރިންނާ ހިސާބުން ނިމެން އޮތް ކަމެއް ނޫން ކަމަށާއި، ދެ ގައުމުގެ ރައްޔިތުންނަކީ ވެސް ގުޅުމުގެ ބައެއް ކަމަށެވެ. ޝީ ވެސް ވިދާޅުވީ ޗައިނާއާ އެމެރިކާއަށް އޮތީ ހަމައެކަނި ދެ ގައުމުގެ މަސްލަހަތެއް ނޫން ކަމަށާއި މުޅި ދުނިޔެއަށް ޓަކައި ހެޔޮ ގޮތް ވިސްނާ ބަޔަކަށް ވުމަކީ ވެސް ދެ ގައުމަަށް ލާޒިމު ކަމެއް ކަމަށެވެ.

އެމެރިކާގެ އިސް އޮފިޝަލަކު ވިދާޅުވީ، ދެ ލީޑަރުންގެ ބައްދަލުވުމަކީ ނަތީޖާތަކެއް ނެރެވުނު ބައްދަލުވުމެއް ކަމަށެވެ.