ބަންގްލަދޭޝްގެ ވެރިރަށް ޑާކާގައި މިހާރު ކުރިއަށްދާ "ހަވަނަ ސައުތު އޭޝިއަން ބާސްކެޓްބޯޅަ ޗެމްޕިއަންޝިޕް (ސާބާ ޗެމްޕިއަންޝިޕް)" ގައި ކުޅުނު ފުރަތަމަ މެޗުން ސަރަހައްދުގެ ގަދަ ބާރު އިންޑިއާ އަތުން ރާއްޖެ ބަލިވެއްޖެއެވެ.

އަންގާރަ ދުވަހުގެ ހެނދުނު ކުޅުނު މެޗުން މި މުބާރާތުގެ އެންމެ ކާމިޔާބު ޓީމު ކަމަށްވާ އިންޑިއާ އަތުން ރާއްޖެ ބަލިވީ 88-31 ޕޮއިންޓުންނެވެ.

މި މެޗުގައި އިންޑިއާއިން މޮޅު ކުޅުމެއް ދެއްކިއިރު، މެޗުގެ ފުރަތަމަ ކުއަރޓާ އިންޑިއާއިން ކާމިޔާބުކޮށްފައިވަނީ 26-4 ޕޮއިންޓުންނެވެ. އަދި ދެވަނަ ކުއާޓަރު ނިންމާލިއިރު އިންޑިއާ ކުރީގައި އޮތީ 54-11 އިންނެވެ. އޭގެ ފަހުން ރާއްޖޭން މި މެޗުގައި ގިނަ ބަދަލުތަކެއް ގެނައި ނަމަވެސް، އިންޑިއާއިން ވަނީ އަނެއް ދެ ކުއާޓަރުގައިވެސް ލީޑު ދަމަހައްޓާފައެވެ. އެގޮތުން 71-22 އިން އިންޑިއާ ކުރީގައި އޮވެ ތިންވަނަ ކުއާޓަރު ނިންމާލިއިރު، ފަހު ކުއާޓަރު ނިމުނުއިރު އިންޑިއާ ކުރީގައި އޮތީ 88-31 ޕޮއިންޓުންނެވެ.

މި ފަހަރު ސާބާ ޗެމްޕިއަންޝިޕާ ކުރިމަތިލިއިރު ގައުމީ ޓީމަށް ވަނީ އަނިޔާގެ މައްސަލަތަކެއް ކުރިމަތިވެފައެވެ. އެގޮތުން އަނިޔާގެ ސަބަބުން ރިޝްފާން ރަޝީދު (ކޮކީ) އާއި އަހުމަދު ފިރާޝްއަށް ވަނީ މި މުބާރާތް ގެއްލިފައެވެ. އެކަމަކު އަނިޔާގެ ސަބަބުން ގައުމީ ޓީމުގެ ކެޕްޓަން އަހުމަދު ޒަބީރު (ޒަބީ) އަށް މި މެޗުގައި ނުކުޅެވޭނެ ކަމަށް ކުރިން ބެލެވުނު ނަމަވެސް، އޭނާ ވަނީ ރިކަވާވެގެން މި މެޗުގައި ކުޅެފައެވެ.

މި ފަހަރުގެ މުބާރާތާ ރާއްޖެ ކުރިމަތިލާފައިވަނީ މުޅިން ދިވެހި ކޯޗުންގެ ޓީމަކާއެކުއެވެ. އެގޮތުން ގައުމީ ޓީމުގެ ކޯޗުގެ މަގާމު ފަހަކަށް އައިސް ބާސްކެޓުބޯޅައިގައި ވިދަމުން އަންނަ ކޯޗު އިލްޔާސް އިބްރާހިމް (އިއްލެ) ފުރަމުން އަންނައިރު، އިއްލެ އާއެކު އެސިސްޓަންޓް ކޯޗުންގެ ގޮތުގައި ހަރަކާތްތެރިވަނީ ގައުމީ ބާސްކެޓްބޯޅަ ޓީމުގެ ކުރީގެ ކެޕްޓަން މުޙައްމަދު ޒިލާލް (ޒިލާ) އާއި، ކުރީގެ ބާސްކެޓްބޯޅަ ތަރި އަލީ ފަޒްލީ އަދި މުޙައްމަދު ނަސީރެވެ.

ރާއްޖޭން ސާބާ ޗެމްޕިއަންޝިޕްގައި ކުޅޭ ދެވަނަ މެޗުގައި ބުދަ ދުވަހު ނުކުންނާނީ ބަންގްލަދޭޝާ ދެކޮޅަށެވެ. އަދި ތިންވަނަ މެޗުގައި ސްރީ ލަންކާއާ ދެކޮޅަށް ކުޅޭނީ ބުރާސްފަތި ދުވަހެވެ. މި މުބާރާތުގައި ހޯމަ ދުވަހު ކުޅުނު ފުރަތަމަ މެޗުން ލަންކާއިން ވަނީ 67-56 އިން ބަންގްލަދޭޝް ބަލިކޮށްފައެވެ.