ވޯލްޑް ކަޕަށް އިޓަލީ ކޮލިފައިވާނެކަމުގެ ޔަގީންކަން އެބައޮތް: މަންޗިނީ

އަންނަ އަހަރު ގަތަރުގައި ބޭއްވުމަށް ހަމަޖެހިފައިވާ ފީފާ ވޯލްޑް ކަޕަށް އިޓަލީ ކޮލިފައިވާނެކަމުގެ ޔަގީންކަން އެބައޮތް ކަމަށް އެ ޓީމުގެ ކޯޗު ރޮބާޓޯ މަންޗިނީ ބުނެފިއެވެ.

އުމުރުން 56 އަހަރުގެ މަންޗިނީގެ އިރުޝާދުގެ ދަށުން އިޓަލީން ވަނީ މި އަހަރުގެ ހޫނު މޫސުމުގައި ބޭއްވި ޔޫރޯ ފުޓްބޯޅަ މުބާރާތުގެ ޗެމްޕިއަންކަން ހޯދާފައެވެ. އެކަމަކު ވޯލްޑް ކަޕުގެ ޔޫރަޕް ކޮލިފައިންގައި ހޯމަ ދުވަހުގެރޭ ކުޅުނު މެޗުން ނޮދަން އަޔަލެންޑާ އެއްވަރު އިޓަލީއަށް ވަނީ އަންނަ އަހަރުގެ މުބާރާތުގެ ސީދާ ޖާގައެއް ގެއްލިފައެވެ.

އިޓަލީގެ ކޯޗުގެ މަގާމާ 2018 ވަނަ އަހަރު މަންޗިނީ ހަވާލުވީ، 1958 ވަނަ އަހަރުގެ ފަހުން ފުރަތަމަ ފަހަރަށް އެ ގައުމަށް ވޯލްޑް ކަޕުގެ ޖާގައެއް ގެއްލުމާ ގުޅިގެން، އޭރު ކޯޗުގެ މަގާމުގައި ހުރި ޖިއަން ޕިއެރޯ ވެންޗޫރާ މަގާމުން ވަކިކުރުމުންނެވެ. ރަޝިއާގައި ބޭއްވި ވޯލްޑް ކަޕަށް ކޮލިފައިވުމަށްވެސް އިޓަލީ ޕްލޭއޮފް ކުޅުނު ނަމަވެސް، ޕްލޭއޮފް މެޗުން އެ ފަހަރު އިޓަލީ ވަނީ ސްވިޑެން އަތުން ބަލިވެފައެވެ.

ހޯމަ ދުވަހުގެރޭ ނޮދަން އަޔަލެންޑާ ދެކޮޅަށް ކުޅުނު މެޗަށްފަހު ދިން އިންޓަވިއުއެއްގައި މަންޗިނީ ބުނީ މާޗު މަހު ކުޅޭ ޕްލޭއޮފުން ވޯލްޑް ކަޕަށް ކޮލިފައިވާނެކަމުގެ ޔަގީންކަން އެބައޮތް ކަމަށެވެ. އަދި ވޯލްޑް ކަޕަށް ކޮލިފައިވެ، އިޓަލީން އެ މުބާރާތް ކާމިޔާބުވެސް ކޮށްފާނެ ކަމަށާއި، އެކަމުގެ ފުރިހަމަ އިތުބާރު އެބައޮތް ކަމަށްވެސް މަންޗިނީ ވަނީ ބުނެފައެވެ.

އިޓަލީއަށް ޕްލޭއޮފް ބުރުގައި ކުޅެން ޖެހިފައިވާއިރު، މި ފަހަރުގެ ކޮލިފައިންގައި އެންމެ ފަހުން ކުޅުނު ދެ މެޗުންވެސް އެ ޓީމު ވަނީ އެއްވަރުވެފައެވެ. އެގޮތުން މިދިޔަ ހުކުރު ދުވަހުގެރޭ ކުޅުނު މެޗުން އިޓަލީ ވަނީ ސްވިޓްޒަލެންޑާ 1-1 ގެ ނަތީޖާއަކުން އެއްވަރުވެފައެވެ. އެ މެޗުގެ ފަހު މިނެޓުގައި އިޓަލީއަށް ޕެނަލްޓީއެއް ލިބުނު ނަމަވެސް، އެ ޓީމުގެ ޖޯޖީނިއޯ ފޮނުވާލި ޕެނަލްޓީ ދިޔައީ ގޯލާ އަމާޒުނުވެއެވެ.

މަންޗިނީ ބުނީ އިޓަލީއަށް މެޗުތައް ކޮންޓުރޯލް ކުރެވުނު ނަމަވެސް، ލަނޑު ޖެހުމުގައި މައްސަލަތަކެއް ދިމާވާ ކަމަށެވެ. އެހެންކަމުން ލިބޭ ފުރުސަތުތަކުގެ ބޭނުން ރަނގަޅަށް ހިފަންޖެހޭ ކަމަށާއި، އެކަމަކު ކޮލިފައިންގައި ދިމާވި މައްސަލަތައް ރަނގަޅުކޮށް، ޕްލޭއޮފަށް އިޓަލީ ކުރިމަތިލާނީ ވަރުގަދަކޮށް ކަމަށްވެސް ވަނީ ބުނެފައެވެ.

މި ފަހަކަށް އައިސް ތަފާތު މޮޅު ކުޅުމެއް ދެއްކި އިޓަލީއަށް ވޯލްޑް ކަޕުގެ ސީދާ ޖާގައެއް ގެއްލުނުއިރު، މި އަހަރުގެ މެއި މަހުގެ ތެރޭގައި އިޓަލީން ވަނީ މަންޗިނީގެ އެއްބަސްވުން އާކޮށްފައެވެ. އެހެންކަމުން އައު އެއްބަސްވުމާއެކު 2026 ވަނަ އަހަރުގެ ޔޫރޯއަށް އިޓަލީ ޓީމު ތައްޔާރުކުރުމުގެ ޒިންމާވެސް ވަނީ މަންޗިނީއާ ހަވާލުކޮށްފައެވެ.