އިންގްލެންޑް ކޮލިފައިވިއިރު، އިޓަލީ ޕްލޭއޮފަށް

ފީފާ ވޯލްޑް ކަޕުގެ ޔޫރަޕް ކޮލިފައިންގައި ހޯމަ ދުވަހުގެރޭ ކުޅުނު މެޗުން މޮޅުވެ އަންނަ އަހަރު ގަތަރުގައި ބޭއްވުމަށް ހަމަޖެހިފައިވާ ވޯލްޑް ކަޕަށް އިންގްލެންޑް ކޮލިފައިވިއިރު، ނޮދަން އަޔަލެންޑާ އެއްވަރުވެ ޔޫރަޕުގެ ޗެމްޕިއަނުން ކަމަށްވާ އިޓަލީ ޕްލޭއޮފް ބުރުގައި ކުޅެން ޖެހިއްޖެއެވެ.

ކޮލިފައިންގެ ގްރޫޕް އައިގައި ހިމެނޭ އިންގްލެންޑުން ވޯލްޑް ކަޕުގެ ޖާގައެއް ހޯދީ ސެން މެރީނޯ އަތުން 10-0 ގެ ތަފާތު ބޮޑު ނަތީޖާއަކުން މޮޅުވެގެންނެވެ. މިއީ 1964 ވަނަ އަހަރަށްފަހު މެޗެއްގައި އިންގްލެންޑުން 10 ލަނޑު ޖެހި ފުރަތަމަ ފަހަރެވެ.

ސެން މެރީނޯގައި ކުޅުނު މެޗުގައި އިންގްލެންޑުން ތަފާތު މޮޅު ކުޅުމެއް ދެއްކިއިރު، މި މެޗުގެ ފުރަތަމަ ހާފުގައި އިންގްލެންޑުގެ ކެޕްޓަން ހެރީ ކޭން ވަނީ ހަތަރު ލަނޑު ޖަހާފައެވެ. މި މެޗު ފަށައިގެން ހަވަނަ މިނެޓުގައި ހެރީ މެގުއާ އިންގްލެންޑަށް ލީޑު ނަގައިދިންއިރު، ފުރަތަމަ ހާފުގައި ދެން ފެނުނު ލަނޑަކީ ސެން މެރީނޯގެ ފިލީޕޯ ފަބްރީ އަތުން ބައިކޮޅަށް ވަން ލަނޑެކެވެ.

މި މެޗުގެ ދެވަނަ ހާފުގައި އިންގްލެންޑުގެ ލަނޑުތައް ޖަހައިދިނީ އެމީލް ސްމިތު ރޯވް އާއި، ޓައިރަން މިންގްސް އާއި، ޓެމީ އަބްރަަހަމް އަދި ބުކާޔޯ ސަކާއެވެ. މި މެޗުގައި ޒުވާން ތަރި ސްމިތު ރޯވް ލަނޑު ޖެހިއިރު، މި މެޗަކީ އޭނާ އިންގްލެންޑުގެ ޖާޒީގައި ކުޅުނު ފުރަތަމަ މެޗެވެ.

މި މޮޅާއެކު ގްރޫޕް އައިގެ އެއްވަނަ އިންގްލެންޑުން ހޯދީ ކޮލިފައިންގައި ކުޅުނު އެއްވެސް މެޗަކުން ބަލިނުވެއެވެ. އަދި އިންގްލެންޑް މިހާރު ވަނީ ވޯލްޑް ކަޕް ކޮލިފައިންތަކުގައި ބަލިނުވެ 30 މެޗު ހަމަކޮށްފައެވެ. މި ފަހަރުގެ ކޮލިފައިންގައި ކުޅުނު 10 މެޗުން އިންގްލެންޑަށް 26 ޕޮއިންޓް ލިބުނުއިރު، ދެވަނައިގައި އޮތް ޕޮލެންޑަށް 10 މެޗުން ލިބިފައިވަނީ 20 ޕޮއިންޓެވެ. އެއާއެކު ޕޮލެންޑް ވާދަކުރާނީ ޕްލޭއޮފް ބުރުގައެވެ.

މީގެ އިތުރުން ކޮލިފައިންގެ ގްރޫޕް ސީގައި ހިމެނޭ އިޓަލީއަށް ޕްލޭއޮފް ބުރުުގައި ކުޅެން ޖެހުނީ ހޯމަ ދުވަހުގެރޭ ކުޅުނު މެޗުން ނޮދަން އަޔަލެންޑާ ލަނޑެއް ނުޖެހި އެއްވަރުވުމުންނެވެ.

ނޮދަން އަޔަލެންޑުގައި ކުޅުނު މި މެޗުގައި އިޓަލީން ގިނަ ހަމަލާތަކެއް އުފެއްދި ނަމަވެސް، ނޮދަން އަޔަލެންޑުގެ ޑިފެންޑަރުންނާއި ގޯލްކީޕަރު ވަނީ އެ ހަމަލާތައް ހުއްޓުވުމުގައި މުހިންމު ދައުރެއް އަދާކޮށްފައެވެ. އަދި މި މެޗުގައި ނޮދަން އަޔަލެންޑުން ފޮނުވާލި ނުރައްކާތެރި ހަމަލާއެއް އިޓަލީގެ ގޯލްކީޕަރު ޖިއަންލުއީޖީ ޑޮންނަރުންމާ ދިފާއުކުރިއިރު، މެޗުގެ އިތުރު ވަގުތުގައި ނޮދަން އަޔަލެންޑުގެ ކޯނޯ ވޮޝިންޓަން ފޮނުވާލި ހަމަލާއެއް ގޯލު ރޮނގުމަތިން ސަލާމަތްކުރީ އިޓަލީގެ ޑިފެންޑަރު ލެއޮނާޑޯ ބޮނޫޗީއެވެ.

މި މެޗުން އިޓަލީ އެއްވަރުވުމާއެކު، ގްރޫޕް ސީގެ އެއްވަނަ ހޯދައި ވޯލްޑް ކަޕަށް ކޮލިފައިވީ ސްވިޓްޒަލެންޑެވެ. ކޮލިފައިންގައި ހޯމަ ދުވަހުގެރޭ ކުޅުނު މެޗުން ސްވިޓްޒަލެންޑް ވަނީ ބަލްގޭރިއާ އަތުން 4-0 ގެ ނަތީޖާއަކުން މޮޅުވެފައެވެ. އެއާއެކު ސްވިޓްޒަލެންޑަށް ގްރޫޕް ސީގެ އެއްވަނަ ލިބުނީ އަށް މެޗުން 18 ޕޮއިންޓާއެކުއެވެ. އަދި ދެވަނައިގައި އިޓަލީ އޮތީ އަށް މެޗުން 16 ޕޮއިންޓާއެކުއެވެ.

މި ނަތީޖާތަކާއެކު އިންގްލެންޑާއި ސްވިޓްޒަލެންޑް ވޯލްޑް ކަޕަށް ކޮލިފައިވިއިރު، މިހާތަނަށް ޖުމްލަ 11 ގައުމެއް ވަނީ މި މުބާރާތަށް ކޮލިފައިވެފައެވެ. އެއީ އެ ދެ ގައުމުގެ އިތުރުން ޔޫރަޕުގެ ނުވަ ގައުމު ކަމަށްވާ އެންމެ ފަހުގެ ޗެމްޕިއަން ފްރާންސް، ބެލްޖިއަމް، ޖަރުމަން، ޑެންމާކް، ސްޕެއިން، ސާބިއާ އަދި ކްރޮއޭޝިއާ އިތުރުން ދެކުނު އެމެރިކާ ބައްރުން ބްރެޒިލެވެ. އަދި ވޯލްޑް ކަޕް ބާއްވާ ގައުމުގެ ގޮތުން މީގެ ކުރިން ގަތަރަށް ވަނީ މި މުބާރާތުގެ ޖާގައެއް ލިބިފައެވެ.