އެކައުންޓިންގ ދާއިރާއިން މީހުން ބިނާކުރުމަކީ، މިވަގުތު ކުރަން ޖެހިފައިވާ ވަރަށް މުހިންމު މަސައްކަތެއް ކަމަށާއި، މި ޕްރޮފެޝަން ތަރައްޤީ ކުރުމަށްޓަކައި، އިންސްޓިޓިއުޓް އޮފް ޗާޓަޑް އެކައުންޓެންޓްސް އޮފް ދަ މޯލްޑިވްސްއަށް ބޭނުންވާ ހުރިހާ އެހީތެރިކަމެއް ސަރުކާރުން ފޯރުކޮށްދެއްވާނެކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވިދާޅުވެއްޖެއެވެ.

ރައީސް މިހެން ވިދާޅުވީ މޯލްޑިވްސް އެކައުންޓްސް ފޯރަމް ފެށުމުގެ ރަސްމިއްޔާތު ޝަރަފްވެރިކޮށްދެއްވައި ވާހަކަފުޅުދައްކަވަމުންނެވެ. ރައީސް ވިދާޅުވީ މި ޕްރޮފެޝަން ތަރައްގީކުރުމަށްޓަކައި، އިންސްޓިޓިއުޓް އޮފް ޗާޓަޑް އެކައުންޓެންޓްސް އޮފް ދަ މޯލްޑިވްސްއަށް ބޭނުންވާ ހުރިހާ އެހީތެރިކަމެއް ފޯރުކޮށްދިނުމުގެ އިތުރުން، އެކައުންޓެންޓުން ތަމްރީނުކޮށް، ފަންނީ ގާބިލުކަން އިތުރުކުރުމަށް ފުރުސަތުތައްވެސް ތަނަވަސްކޮށްދެއްވާނެ ކަމަށެވެ.

ރައީސް ވިދާޅުވީ ކޮވިޑް-19ގެ ބަލިމަޑުކަން ފެނުނީ، ގައުމުތަކުގެ އިޤްތިޞާދު އިނދަޖައްސައިލި ވަބާއެއްގެ ގޮތުގައި ކަމަށެވެ. ނަމަވެސް ދޮޅު އަހަރަށްފަހު، މިހާރު ފެންނަނީ ދުނިޔޭގެ އިޤްތިޞާދު އަނެއްކާވެސް މަޑުމަޑުން ހަށިފޮޅާލާފައި ތެދުވަމުން އަންނަ މަންޒަރު ކަމަށާއި، ރާއްޖޭގެ އިޤްތިޞާދު ވެސް ހަމަ މިމޭރުމުން ހިންދެމިލާ މަންޒަރު މިއަދު ފެންނަމުންދާ ކަމަށެވެ. އަދި މި ފޯރަމަކީ އިޤްތިޞާދީ ބަދަލުތަކާ ވަރަށް ބޮޑަށް ގުޅިފައިވާ ކަމެއް ފެށުން ކަމަށާއި، މި ފޯރަމް އިންތިޒާމު ކުރެއްވި ކަމަށްޓަކައި، އިންސްޓިޓިއުޓް އޮފް ޗާޓަޑް އެކައުންޓެންޓްސް އޮފް ދަ މޯލްޑިވްސްގެ ރައީސް، ޙުސައިން ނިޔާޒީއަށާއި އެ އިންސްޓިޓިއުޓްގެ އިންތިޤާލީ ކައުންސިލްގެ މެންބަރުންނަށް ވަރަށް އިޚްލާޞްތެރިކަމާއެކު މަރުޙަބާއާއި ޝުކުރު ދަންނަވާ ކަމަށެވެ.

ރައީސް ވިދާޅުވީ ރާއްޖޭގައި ކުރެވޭ މާލީ މުޢާމަލާތްތައް، ޚާއްޞަކޮށް، ދައުލަތުގެ މާލީ މުޢާމަލާތްތައް، އޮޑިޓްކޮށް ބެލެހެއްޓުމުގެ މަސައްކަތް ފެށިފައި ވަނީ، މީގެ ގާތްގަނޑަކަށް 67 އަހަރު ކުރިން ކަމަށެވެ. މިއަދާ ހަމައަށް އައިއިރު، އޮޑިޓިންގއާއި އެކައުންޓެންސީގެ ދާއިރާ މިއޮތީ ވަރަށް ބޮޑަށް ބަދަލުވެފައި ކަމަށާއި، ކޮންމެވެސް ވަރަކަށް ތަރައްޤީވެސް ވެފައި ކަމަށެވެ.

އެހެން ނަމަވެސް، މި ދާއިރާގައިވެސް ދިވެހިންނަށްވުރެ ގިނަކަމަށް ފާހަގަކުރެވެނީ، ބިދޭސީ އެކައުންޓެންޓުން ކަމަށް ރައީސް ވިދާޅުވިއެވެ. އަދި މިހާރުގެ ތަފާސްހިސާބުތަކަށް ބަލާއިރު، ރާއްޖޭގެ ޕްރައިވެޓް ސެކްޓަރގައި ގާތްގަނޑަކަށް 4500 އަށްވުރެ ގިނަ ބިދޭސީން އެބަ މަސައްކަތް ކުރައްވާ ކަމަށާއި، ރާއްޖޭގައި އިންކަމް ޓެކްސް ދައްކާ މީހުންގެ 15 އިންސައްތައަކީ، އެކައުންޓިންގ ދާއިރާގެ މީހުން ކަމަށް ރައީސް ވިދާޅުވިއެވެ.

ރައީސް ވިދާޅުވީ މި ވަޒީފާތަކަށް ސަރުކާރުވެސް އަދި މި އިންޑަސްޓްރީވެސް ބޭނުންވަނީ، ކޮލިފައިޑް ޤާބިލް އެކައުންޓެންޓުން ކަމަށާއި، އެހެންކަމުން، މި ދާއިރާއިން މީހުން ބިނާކުރުމަކީ، މިވަގުތު ކުރަން ޖެހިފައިވާ ވަރަށް މުހިންމު މަސައްކަތެއް ކަމަށެވެ. މި ޕްރޮފެޝަން ތަރައްޤީ ކުރުމަށްޓަކައި، އެ އިންސްޓިޓިއުޓަށް ބޭނުންވާ ހުރިހާ އެހީތެރިކަމެއް ސަރުކާރުން ފޯރުކޮށްދެއްވާނެ ކަމަށާއި، އެކައުންޓެންޓުން ތަމްރީނުކޮށް، ފަންނީ ޤާބިލުކަން އިތުރުކުރުމަށް ފުރުޞަތުތައްވެސް ތަނަވަސްކޮށްދެއްވާނެ ކަމަށް ރައީސް ވިދާޅުވިއެވެ.

ރައީސް ވިދާޅުވީ އެކައުންޓިންގ ދާއިރާއަކީ، ހެޔޮ ވެރިކަމުގެ ނިޒާމާވެސް ވަރަށް ބޮޑަށް ގުޅިފައިވާ ދާއިރާއެއް ކަމަށެވެ. މި ދާއިރާ ހަރުދަނާވެ ފުޅާވިވަރަކަށް، ޕްރައިވެޓް އަދި ޕަބްލިކް ސެކްޓަރގެ ދެފުށް ފެންނަ މިންވަރު އިތުރުވެގެންދާނެ ކަމަށެވެ. އަދި ދައުލަތް ހިންގުމުގެ ނިޒާމުގެ ތެރެއިން، ކޮރަޕްޝަނަށް މަގުފަހިވާ ދޮރުތައް ހަނިކުރެވި، ނަޒާހަތްތެރިކަމުގެ ސިފަ އަށަގަތުމަށް ވަރަށް ބޮޑު ބާރަކަށް ވެގެންދާނެ ކަމަށެވެ.

ދިވެހިރާއްޖޭގެ ޗާޓަޑް އެކައުންޓެންޓުންގެ ޤާނޫނުގެ ނަމުގައި، މިދިޔަ އަހަރު ޤާނޫނެއް ހަދައި ޢަމަލުކުރަން ފެށީވެސް މިދިޔަ އަހަރުއެވެ.