ރާއްޖޭގެ އަތޮޅުތަކުގައި ކުރިއަށްގެންދާ ވޮލީބޯޅަ ކޭމްޕުތަކަށް ކޯޗުން ތައްޔާރުކުރުމުގެ ގޮތުން "ނެޝަނަލް ސެޓިފިކެޓް ލެވެލް އެކެއް ކޯޗިން ވޮލީބޯލް" ކޯސް، ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އިން ފަށައިފިއެވެ.

އާދީއްތަ ދުވަހުގެރޭ ފެށި މި ކޯސް ވީއޭއެމުން ކުރިއަށްގެންދަނީ މޯލްޑިވްސް ނެޝަނަލް އިންސްޓިޓިއުޓް އޮފް ސްޕޯޓްސް އަދި ޕޮލިސް ކުލަބާ ގުޅިގެންނެވެ. މި ކޯހުގެ ހަވީރު ދަންފަޅީގައި ތިއަރީ ބައި ކުރިއަށްދާއިރު، ރޭގަނޑު ކުރިއަށްދާނީ ޕްރެކްޓިކަލް ސެޝަންތަކެވެ. އަދި މި ކޯހުގައި ވޮލީބޯޅައިގެ ބޭސިކް ގަވާއިދުތަކާއި ހުނަރުތައް ކޯޗުންނަށް ދަސްކޮށްދިނުމަށް ހަމަޖެހިފައިވާ ކަމަށް ވީއޭއެމުން މައުލޫމާތުދެއެވެ.

އާދީއްތަ ދުވަހުގެރޭ ފެށި މި ކޯހުގައި ރާއްޖޭގެ އެކި އަތޮޅުތަކުން ޖުމްލަ 34 ކޯޗުން ވަނީ ބައިވެރިވެފައެވެ. އަންނަ ޑިސެމްބަރު މަހުގެ ހަތަރުވަނަ ދުވަހުގެ ނިޔަލަށް ކޯޗުން ތަމްރީނުކުރުމުގެ ކޯސް ކުރިއަށްގެންދާއިރު، މި ކޯހަށްފަހު ރެފުރީން ތަމްރީނުކުރުމުގެ ކޯސް ފެށިގެންދާނެ ކަމަށްވެސް ވީއޭއެމުން މައުލޫމާތުދެއެވެ.

ރާއްޖޭގެ އެކި އަތޮޅުތަކުން ވޮލީބޯޅަ ކޯޗުން ތަމްރީނުކުރުމުގެ ކޯސް ފެށިއިރު، ދާދި ފަހުން ވީއޭއެމުގެ ރައީސް މުޙައްމަދު ރަނޭޝް (ރަނޭ) ވަނީ ރާއްޖެ ހަތް ޒޯނަކަށް ބަހާލައި، ހުރިހާ ރަށަކަށް ބައިވެރުވުމުގެ ފުރުސަތު އޮންނާނެހެން "ރާއްޖެ ވޮލީބޯޅަ ޗެމްޕިއަންޝިޕް" އަންނަ އަހަރު ބާއްވާނެކަން އިއުލާންކުރައްވާފައެވެ.

މިއީ މުޅި ރާއްޖެއަށް ހުޅުވާލައިގެން ވޮލީބޯޅައިގެ މިފަދަ ބޮޑު މުބާރާތެއް ބާއްވާނެ ފުރަތަމަ ފަހަރެވެ. އެގޮތުން އަންނަ އަހަރު މުޅި ރާއްޖޭގައި ބާއްވާ ރާއްޖެ ވޮލީބޯޅަ ޗެމްޕިއަންޝިޕް ކުރިއަށްދާނީ ހަތް ޒޯނެއްގެ މެދުގައެވެ. އަދި އެ ޒޯނުތަކުގެ ޗެމްޕިއަނުންގެ މެދުގައިވެސް މުބާރާތެއް ބޭއްވުމަށް ވީއޭއެމުން އަންނަނީ މަސައްކަތްކުރަމުންނެވެ.

މީގެ ކުރިން ރާއްޖެޓީވީގެ "ކުޅިވަރު ފައިލް" ޕްރޮގްރާމުގައި ވާހަކަ ދައްކަވަމުން ރަނޭ ވިދާޅުވީ އަންނަ އަހަރު އެންމެ ބޮޑަށް ފޯކަސް ކުރަން ނިންމާފައިވާ މުބާރާތަކީ ރާއްޖެ ވޮލީބޯޅަ ޗެމްޕިއަންޝިޕް ކަމަށާއި އަދި އެ މުބާރާތަކީ އަތޮޅުތެރެއިން ހުނަރުވެރި ކުޅުންތެރިން އުފެއްދުމަށް ކުރެވޭނެ މުހިންމު މަސައްކަތެއް ކަމަށެވެ.

އަދި އަތޮޅުތެރޭގެ މުބާރާތަށް ޓީމުތައް ފައްކާކުރުމަށް މިހާރުވެސް ވޮލީބޯޅައިގެ ކޭމްޕުތަކެއް އަތޮޅު ތެރޭގައިވެސް ކުރިއަށްގެންދާކަން ރަނޭ ވަނީ ފާހަގަކުރައްވާފައެވެ. އަދި ވިދާޅުވީ ވޮލީ ކޭމްޕުތަކަށް ރާއްޖެއިން ބޭރުން ކޯޗުން ގެންނަން މަސައްކަތް ކުރަމުން އަންނަ ކަމަށާއި، އަދި އިތުރު ކޯޗުންނާއެކު ރިސޯޓުތަކުގައިވެސް ކޭމްޕުތައް ވަރަށް އަވަހަށް ފެށިގެންދާނެ ކަމަށެވެ.

އެހެންކަމުން އާދީއްތަ ދުވަހުގެރޭ ފެށި ވޮލީބޯޅަ ކޯޗުން ތަމްރީނުކުރުމުގެ ކޯހާއެކު، އެ ކޭމްޕުތައް ބޭއްވުމަށް ބޮޑު ލުޔެއް ލިބިގެންދާނެ ކަމަށް ވީއޭއެމުން ވަނީ ބުނެފައެވެ.