ޓްރަމްޕްގެ ގަރާރަކީ ގާނޫނު އަސާސީއާ ހިލާފު ގަރާރެއް، އެއަށް އަމަލުކުރެވޭކަށް ނެތް: ކޯޓް

މުސްލިމް ހަ ގައުމަކުން ރެފިއުޖީންނަށް އެެތެރެވުން ހުއްޓުވުމަށް އެމެރިކާގެ ރައީސް ޑޮނަލްޑް ޓްރަމްޕް ސޮއިކުރައްވާ ނެރުއްވާފައިވާ ގަރާރަކީ އެގައުމުގެ ގާނޫނު އަސާސީ އާ ހިލާފު އެއްޗެއް ކަމަށާއި އެއީ އެހެން ދީންތަކަށް އަމަލުކުރާ ފަރާތްތަކަށް ދިން ހަަމަލާއެއްކަމަށް އެގައުމުގެ އިސްތިއުނާފީ ކޯޓަކުން ސިފަކޮށްފި އެވެ.

އެމެރިކާގެ ވަރޖިނިއާ ސްޓޭޓްގެ ސަރކަޓް ކޯޓް އޮފް އެޕީލްސް އަށް ގަރާރު ތަންފީޒުކޮށްދިނުމަށް އެދި ހުށަހަޅާފައިވާ ގަރާރު ބަލިކޮށްފައިވަނީ 10 ގާޒީންގެ ވޯޓުންނެވެ. ތިން ގާޒީއަކު ވަނީ ގަރާރު ތަންފީޒުކުރުމަށް ވޯޓު ދެއްވާފަ އެވެ.

ކޯޓުން ނެރެފައިވާ ހުކުމްގައި އިސް ގާޒީ ރޮޖަރ ގްރެގަރީ ވިދާޅުވީ ޓްރަމްޕްގެ ގަރާރަކީ ގައުމީ ސަލާމަތުގެ ނަމުގައި ނެރެފަައިވީ ގަރާރެއް ނަމަވެސް، އެގަރާރަކީ ދީނީ މިނިވަންކަން ނަގާލާ، އާންމުންގެ މެދުގައި ނުތަނަވަސްކަން އުފައްދާ ތަފާތުކުރުން އިތުރުކުރުމުގެ ގޮތުން ނެރުނު ގަރާރެއް ކަމަށެވެ. މި ހުކުމްގައި ގާޒީ ގްރެގަރީ ވަނީ ޓްރަމްޕް ރިޔާސީ އިންތިހާބުގެ ކެމްޕޭންގައި މުސްލިމުން އެމެރިކާއަށް އެތެރެވިޔަ ނުދޭކަމަށް ވިދާޅުވި ވިދާޅުވުމަށް އިޝާރާތްކުރައްވާފަ އެވެ. ގްރެގަރީ ވިދާޅުވީ މިހުރިހާ ކަމަކަށް ބެލުމަށްފަހު، މިގަރާރަކީ ހަމައެކަނި މުސްލިމުންނަށް އަމާޒުކޮށްފައިވާ ގަރާރެއް ކަމަށް ހަމަ ބުއްދީގައި ހުރި ކޮންމެ މީހަކަށްވެސް ގަބޫލުކުރެވޭނެ ކަމަށެވެ.

ވައިޓްހައުސް އިން ވަނީ މި ހުކުމަށް ފާޑުކިޔާފަ އެވެ. އެޓާރނީ ޖެނެރަލް ޖެފް ސެޝަންސް ވިދާޅުވީ ކޯޓުން ހުކުމެއް ކުރާއިރު، ގަރާރުގައިވާ ބަސްތަކަށް ވިސްނުމުގެ އިތުރުން، ހާލަތަށް ރިޢާޔަތް ކުރަންޖެހޭ ކަމަށެވެ. އެގޮތުން، ހަ ގައުމަކަށް ގަރާރުގައި އިޝާރާތްކޮށްފައިވަނީ އެގައުމުތަކަކީ ޓެރަރިޒަމްގެ ނުރައްކާ އޮތް ގައުމުތަކަށް ވާތީ ކަމަށް ސެޝަންސް ވިދާޅުވި އެވެ. އަދި، ރައީސްގެ ހައިސިއްޔަތުން، ގައުމުގެ ސަލާމަތާއި އަމާންކަމަކީ ޓްރަމްޕް އެންމެ ބޮޑަށް އިސްކަންދެއްވާ ކަންކަން ކަމަށް އޭނާ ފާހަގަކުރެެއްވި އެވެ. އެހެންކަމުން މިފަދަ ގަރާރެއް އެކުލަވާލާ، އެ ތަންފީޒުކުރުމަކީ ޓްރަމްޕަށް ލިބިގެންވާ ހައްގެއް ކަމަށްވެސް ސެޝަންސް ވިދާޅުވި އެވެ.

ލީބިޔާ، އިރާން، ސޯމާލިޔާ، ސޫދާން، ސީރިޔާ އަދި ޔަމަނުން އެމެރިކާއަށް ހިޖުރަކުރާ މީހުންނާއި ރެފިއުޖީން އެތެރެވިޔަ ނުދިނުމަށް ޓްރަމްޕް އެންމެ ފުރަތަމަ ގަރާރެއް ހުށަހެޅުއްވީ ޖެނުއަރީ 27ގައެވެ. މިގަރާރުގައި ސޮއިކުރެއްވުމާއި ގުޅިގެން އެމެރިކާގެ ގިނަ ސަރަހައްދުތަކުގައި ވަނީ ޓްރަމްޕްގެ ސަރުކާރާއި ދެކޮޅަށް މުޒާހަރާކޮށްފައެެވެ. މިގަރާރު ވަނީ ނިއު ޔޯކްގެ ކޯޓަކުން ހުއްޓުވާފައެވެ.

ޓްރަމްޕްގެ ޓްރެވަލް ގަރާރު ހަވާއީ ސްޓޭޓްގެ ކޯޓަކުންވެސް ވަނީ ހުއްޓުވާފައެވެ. މި މައްސަލައިގެ އިސްތިއުނާފް އަދި ފަށާފައެއް ނުވެއެވެ.

ގަރާރުގެ މައްސަލަ ކޯޓަށް ހުށަހަޅާފައިވަނި އެމެރިކަން ސިވިލް ލިބަރޓީސް ޔޫނިއަން (އޭސީއެލްޔޫ) އަދި ނެޝެނަލް އިމިގްރޭޝަން ލޯ ސެންޓަރުންނެވެ. އޭސީއެލްޔޫގެ ޑިރެކްޓަރ އުމަރު ޖަދްވަތް ވިދާޅުވީ ޓްރަމްޕްގެ ގަރާރަކީ އެމެރިކާގެ ގާނޫނު އަސާސީއާ ޚިލާފު އެއްޗެއް ކަމަށާއި ކޯޓުން ގަރާރާއި ދެކޮޅަށް ކޯޓުން ނިންމުމުންވެސް އެކަން އެނގިގެންދާނެ ކަމަށެވެ.