ފީފާ ވޯލްޑް ކަޕުގެ ޔޫރަޕް ކޮލިފައިންގައި ހޮނިހިރު ދުވަހުގެރޭ ކުޅުނު މެޗުތަކުން މޮޅުވެ، އަންނަ އަހަރު ގަތަރުގައި ބޭއްވުމަށް ހަމަޖެހިފައިވާ ވޯލްޑް ކަޕަށް އެންމެ ފަހުގެ ޗެމްޕިއަން ފްރާންސާއި ބެލްޖިއަމް ކޮލިފައިވެއްޖެއެވެ.

ފްރާންސަކީ 2018 ވަނަ އަހަރު ރަޝިއާގައި ބޭއްވި ވޯލްޑް ކަޕުގެ ޗެމްޕިއަނުންނެވެ. އަދި ބެލްޖިއަމުން ވަނީ އެ މުބާރާތުގެ ތިންވަނަ ހޯދާފައެވެ.

ކޮލިފައިންގެ ގްރޫޕް ޑީގައި ހިމެނޭ ފްރާންސުން ވޯލްޑް ކަޕުގެ ޖާގައެއް ހޯދީ ހޮނިހިރު ދުވަހުގެރޭ ކަޒަކްސްތާން އަތުން 8-0 ގެ ތަފާތު ބޮޑު ނަތީޖާއަކުން މޮޅުވެގެންނެވެ.

އަމިއްލަ ދަނޑުގައި ކުޅުނު މި މެޗުގައި ފްރާންސުން މޮޅު ކުޅުމެއް ދެއްކިއިރު، އެ ޓީމުގެ ޒުވާން ތަރި ކީލިއަން އެމްބާޕޭ ވަނީ ހަތަރު ލަނޑު ޖަހާފައެވެ. އަދި މި މެޗުގައި އޭނާ ހެޓްރިކް ހަދާފައިވަނީ މެޗު ފަށައިގެން 32 މިނެޓުގެ ތެރޭގައެވެ. މިއީ ފްރާންސްގެ ޖާޒީގައި އެމްބާޕޭ ހެދި ފުރަތަމަ ހެޓްރިކެވެ. ދެން މި މެޗުގައި ފްރާންސުގެ އަނެއް ލަނޑުތައް ކާމިޔާބުކޮށްދިނީ ދެ ލަނޑު ޖެހި ކަރީމް ބެންޒެމާ އާއި، އޭޑްރިއަން ރަބިއޯގެ އިތުރުން އެންޓޮއިން ގްރީޒްމަނެވެ.

މި މޮޅާއެކު ގްރޫޕް ޑީގެ އެއްވަނަ ފްރާންސުން ކަށަވަރުކުރިއިރު، އެ ޓީމަށް ވަނީ ކުޅުނު ހަތް މެޗުން 15 ޕޮއިންޓް ލިބިފައެވެ. ދެވަނައިގައި އޮތް ފިންލެންޑަށް ހަތް މެޗުން 11 ޕޮއިންޓް ލިބިފައިވާއިރު، ތިންވަނައިގައި އޮތް ޔޫކްރޭނަށް ހަތް މެޗުން ލިބިފައިވަނީ ނުވަ ޕޮއިންޓެވެ.

މީގެ އިތުރުން ކޮލިފައިންގެ ގްރޫޕް އީގައި ހިމެނޭ ބެލްޖިއަމުން ވޯލްޑް ކަޕުގެ ޖާގައެއް ހޯދީ ހޮނިހިރު ދުވަހުގެރޭ އެސްޓޯނިއާ އަތުން 3-1 ނަތީޖާއަކުން މޮޅުވެގެންނެވެ.

ބެލްޖިއަމުގައި ކުޅުނު މި މެޗު ފަށައިގެން 11 ވަނަ މިނެޓުގައި ކްރިސްޓިއަން ބެންޓެކޭ ވަނީ އެ ޓީމަށް ލީޑު ނަގައިދީފައެވެ. އަދި ދެވަނަ ހާފު ފަށައިގެން އަށްވަނަ މިނެޓުގައި ބެލްޖިއަމުން ލީޑު ފުޅާކުރިއިރު، މި ލަނޑު އެ ޓީމަށް ކާމިޔާބުކޮށްދިނީ ޔަނިކް ކަރަސްކޯއެވެ.

އޭގެ ފަހުން މި މެޗުގެ 70 ވަނަ މިނެޓުގައި ބަދަލު ކުޅުންތެރިއެއްގެ ގޮތުގައި ކުޅެން އެރި އެރިކް ސޯގާ ވަނީ ލަނޑެއް ޖަހައި، އެސްޓޯނިއާއަށް ފަރަގު ކުޑަކޮށްދީފައެވެ. އެކަމަކު އޭގެ ހަތަރު މިނެޓު ފަހުން ބެލްޖިއަމުން އަލުން ލީޑު ފުޅާކުރިއިރު، މި ލަނޑު އެ ޓީމަށް ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން އެރި ތޯގަން ހަޒާޑެވެ.

މި މޮޅާއެކު ގްރޫޕް އީގެ އެއްވަނަ ބެލްޖިއަމުން ކަށަވަރުކުރިއިރު، އެ ޓީމަށް ވަނީ ކުޅުނު ހަތް މެޗުން 19 ޕޮއިންޓް ލިބިފައެވެ. ދެވަނައިގައި އޮތް ވޭލްސްއަށް ހަތް މެޗުން 14 ޕޮއިންޓް ލިބިފައިވާއިރު، ތިންވަނައިގައި އޮތް ޗެކް ރިޕަބްލިކަށް ހަތް މެޗުން ލިބިފައިވަނީ 11 ޕޮއިންޓެވެ.

މި ނަތީޖާތަކާއެކު ޗެމްޕިއަން ފްރާންސާއި ބެލްޖިއަމް ވޯލްޑް ކަޕަށް ކޮލިފައިވިއިރު، މިހާތަނަށް ޖުމްލަ ހަ ގައުމެއް ވަނީ މި މުބާރާތަށް ކޮލިފައިވެފައެވެ. އެއީ ފްރާންސާއި ބެލްޖިއަމުގެ އިތުރުން ޔޫރަޕުގެ ދެ ގައުމު ކަމަށްވާ ޖަރުމަނާއި ޑެންމާކް އަދި ދެކުނު އެމެރިކާ ބައްރުން ބްރެޒޒިލެވެ. މީގެ އިތުރުން ވޯލްޑް ކަޕް ބާއްވާ ގައުމުގެ ގޮތުން މީގެ ކުރިން ގަތަރަށް ވަނީ މި މުބާރާތުގެ ޖާގައެއް ލިބިފައެވެ.