ސުޕަ ޔުނައިޓެޑް ސްޕޯޓްސް (ސަސް) ގެ އައު ކޯޗުގެ މަގާމަށް ތަޖުރިބާކާރު ކޯޗު އިސްމާޢީލް މަހްފޫޒް (އިންމަ) ހަމަޖައްސައިފިއެވެ.

މިދިޔަ އޮކްޓޯބަރު މަހުގެ ތެރޭގައި ސަސްގެ ކޯޗުގެ މަގާމުގައި ހުރި މުޙައްމަދު ޝިޔާޒް (މޯހަން) ވަނީ ދެ ފަރާތް އެއްބަސްވެގެން އެއްބަސްވުން އުވާލާފައެވެ. އަދި ކުރިއަށް އޮތް ސީޒަނަށް މޯހަން ވަނީ އެންމެ ފަހުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަނުގެ ކޯޗުގެ މަގާމާ ހަވާލުވެފައެވެ.

އެއާއެކު ހޮނިހިރު ދުވަހު ސަސްއިން ވަނީ އެ ޓީމުގެ ކޯޗުގެ މަގާމަށް އިންމަ ހަމަޖެއްސިކަން އިއުލާންކޮށްފައެވެ. ސަސްއާ ހަވާލުވާން އިންމަ ނިންމިއިރު، އޭނާ އެންމެ ފަހުން މަސައްކަތްކޮށްފައިވަނީ ގައުމީ ފުޓްބޯޅަ ޓީމުގެ އެސިސްޓަންޓް ކޯޗެއްގެ ގޮތުގައެވެ. އެގޮތުން މިދިޔަ މަހު މާލޭގައި ބޭއްވި "އުރީދޫ ސާފް ޗެމްޕިއަންޝިޕް 2021" ގައި ގައުމީ ޓީމާއެކު އިންމަ ވަނީ މަސައްކަތްކޮށްފައެވެ.

އޭގެ ކުރިން މިދިޔަ ދެ ސީޒަނުގައި އިންމަ އިރުޝާދުދިނީ ދަ ގްރާންޑޭ ސްޕޯޓްސް ކުލަބަށެވެ. އެގޮތުން އެންމެ ފުރަތަމަ އިންމަ ދަ ގްރާންޑޭއާ ހަވާލުވީ 2019 ވަނަ އަހަރުގެ ފެބްރުއަރީ މަހުގެ ތެރޭގައެވެ.

މީގެ ކުރިންވެސް ގައުމީ ޓީމުގެ އެސިސްޓަންޓް ކޯޗެއްގެ ގޮތުގައި ގިނަ އަހަރުތަކެއް ވަންދެން މަސައްކަތް ކޮށްފައިވާ އިންމަ ވަނީ އޭރު ދެ ފަހަރެއްގެ މަތިން ގައުމީ ފުޓްބޯޅަ ޓީމުގެ ހެޑް ކޯޗެއްގެ ޒިންމާވެސް އުފުލާފައެވެ. އެކަމަކު ކުލަބު ކޯޗިން ކެރިއަރުގައި އިންމަގެ ހަމައެކަނި ކާމިޔާބީއަކީ މާޒިޔާއާއެކު 2012 ވަނަ އަހަރުގެ އެފްއޭ ކަޕް ކާމިޔާބުކުރުމެވެ.

މިދިޔަ ސީޒަނުގައި މުޅިން އަލަށް ސަސް ފުރަތަމަ ޑިވިޝަނުގައި ވާދަކުރިއިރު، އެ ޓީމުން މިދިޔަ ސީޒަނުގެ ދިރާގު ދިވެހި ޕްރިމިއާ ލީގު ނިންމާލާފައިވަނީ ތާވަލުގެ ހަވަނައިގައި އޮވެގެންނެވެ. އެގޮތުން ކުޅުނު 14 މެޗުން ސަސްއަށް ލިބިފައިވަނީ 15 ޕޮއިންޓެވެ.

ކުރިއަށް ސީޒަނަށް އިންމަ ސަސްއާ ހަވާލުވިއިރު، ރާއްޖޭގެ ފުޓްބޯޅަ ސީޒަން ފަށާނީ އަންނަ ޑިސެމްބަރު މަހުގެ ތެރޭގައި ޕްރެޒިޑެންޓްސް ކަޕުންނެވެ. އަދި އެއަށްފަހު ކުރިއަށް އޮތް ސީޒަނުގެ ދިވެހި ޕްރިމިއާ ލީގު ފެށުމަށް ތާވަލުކޮށްފައިވަނީ އަންނަ އަހަރުގެ ފެބްރުއަރީ މަހުގެ ތެރޭގައެވެ.