ކޮވިޑްގެ ހާލަތު ގޯސްވަމުންދިޔުމާއެކު ނެދަރލެންޑްސް ލޮކްޑައުން އަކަށް
13 ނޮވެމްބަރު 2021 | ހޮނިހިރު 03:06ރެސްޓޯރެންޓްތަކާއި ފިހާރަތައް ކުރިން ބަންދުކުރުމާއި ބޮޑެތި ކުޅިވަރު މުބާރާތްތައް ބެލުމަށް މީހުން ވަނުމުގެ ފުރުސަތު މަނާކުރުމަށް ސަރުކާރުން ވަނީ ނިންމާފައި
ނެދަރލެންޑްސްގައި މީހުން މާސްކު އަޅައިގެންނާއި މާސްކު ނާޅާ މަގުތަކުގައި އުޅެމުންދޭ
ކޮވިޑް-19 ހަލުވިކަމާއެކު ފެތުރެމުންދިޔުމާއެކު ވައިރަސް ފެތުރުން ކޮންޓްރޯލްކުރުމަށްޓަކައި ހޮނިހިރު ދުވަހުން ފެށިގެން ނެދަރލެންޑްސްގައި ފިޔަވަޅުތައް ވަރުގަދަކުރުމަށް ނިންމާފައިވާކަމަށް އެގައުމުގެ ބޮޑުވަޒީރު ހާމަކުރައްވައިފިއެވެ.
އެގޮތުން ރެސްޓޯރެންޓްތަކާއި ފިހާރަތައް ކުރިން ބަންދުކުރުމާއި ބޮޑެތި ކުޅިވަރު މުބާރާތްތައް ބެލުމަށް މީހުން ވަނުމުގެ ފުރުސަތު މަނާކުރުމަށް ސަރުކާރުން ވަނީ ނިންމާފައެވެ. ނެދަރލެންޑްސްގެ ބޮޑުވަޒީރު މާރކް ރޫޓާ ޓީވީ މެދުވެރިކުރައްވާ ރައްޔިތުންނާ މުޚާތަބުކުރައްވަމުން ވިދާޅުވީ މިފިޔަވަޅުތައް ކުރިޔަށް އޮތް ތިން ހަފްތާގެ މުއްދަތަށް ދެމިއޮންނާނެކަމަށެވެ.
ރޫޓާ ވިދާޅުވީ ވައިރަސް ގައުމުގެ ހުރިހާ ހިސާބަކަށްވެސް ފެތުރިފައިވާކަމަށާއި އެހެންކަމުން ފިޔަވަޅުތައް އަޅަންޖެހޭކަމަށެވެ.
ވައިރަސް ފެތުރުން ކޮންޓްރޯލްކުރުމަށް ދެން އަޅާ ފިޔަވަޅުތަކުގެ ތެރޭގައި ސުޕަރމާކެޓްތަކާއި ޒަރޫރީނޫން ތަކެތި ވިއްކާ ތަންތަން އަވަހަށް ބަންދުކުރުމާ އިޖުތިމާއީ ގައިދުރުކަން ގެންގުޅުން ހިމެނެއެވެ. އަދި ގޭގެއަށް ޒިޔާރަތްކުރާއިރު ހަތަރު މީހުންނަށްވުރެ ގިނައިން ނުދިޔުމަށްވެސް ވަނީ އަންގާފައެވެ.
ރޫޓާ ވިދާޅުވީ ލޮކްޑައުންގެ މުއްދަތު ނިމުމުން ވެކްސިން ނުޖަހާ ތިބި މީހުންނަށް އާންމު ތަންތަނުގައި އުޅެ ޚިދުމަތްތައް ހޯދުމުގައި ވަކި ހިފެހެއްޓުންތަކެއް ގެންގުޅުމަށް ވިސްނަމުންދާކަމަށާއި އެކަންކުރެވޭނެ ގޮތްތަކެއް ބަލަމުންދާކަމަށެވެ.
