ކޮވިޑް-19ން ދިފާއުވުމަށް ވެކްސިން ޖެހުމާ ދެކޮޅު ހަދާ ލެޓްވިއާގެ ގާނޫނު ހަދާ މަޖިލީހުގެ މެމްބަރުންނަށް މަޖިލީހުގައި ކުރިޔަށްދާ ބަހުސްތަކާއި ވޯޓުތަކުގައި ބައިވެރިނުވެވޭގޮތަށް އެގައުމުގެ ގާނޫނު ހަދާ މަޖިލީހުން ފާސްކޮށްފިއެވެ.

ލެޓްވިއާ އަކީ ޔޫރަޕިއަން ޔޫނިއަންގެ ގައުމުތަކުގެ ތެރެއިން އެންމެ މަދު މީހުން ވެކްސިން ޖަހާފައިވާ ގައުމެވެ. އަދި މިހާރު އިތުރުވަމުން އަންނަ ކޭސްތަކާއެކު އެސަރަހައްދުން އެންމެ ފުރަތަމަ ލޮކްޑައުންއަކަށްދިޔަ ގައުމެވެ.

ވެކްސިން ޖެހުމާ ދެކޮޅުހަދާ ވެކްސިން ނުޖަހާ މެމްބަރުންގެ މުސާރައިން އުނިކުރުމަށްވެސް ވަނީ ފާސްކޮށްފައެވެ. އެކަމަށް ނެގުނު ވޯޓުގައި 100 މެމްބަރުންގެ ތެރެއިން 62 މެމްބަރުން ވަނީ މިކަމަށް ތާއީދުކޮށްފައެވެ. އަންނަ އަހަރުގެ މެދު ތެރެއާ ހަމައަށް މިގޮތަށް އަމަލުކުރަމުންދިޔުމަށް ވަނީ ފާސްކޮށްފައެވެ.

ލެޓްވިއާގެ ސްޓޭޓް ޓީވީން ރިޕޯޓްކޮށްފައިވާ ގޮތުގައި ގާނޫނު ހަދާ މަޖިލީހުގެ ނުވަ މެމްބަރަކު ވަނީ ވެކްސިން ޖެހުމާ ދެކޮޅު ހަދާފައެވެ.

ވެކްސިން ޖެހުމާ ދެކޮޅު ހަދާ މެމްބަރުންނަށް މިފަދަ ފިޔަވަޅުތައް އެޅުމަކީ އާންމުންގެ މެދުގައި ވެކްސިނާ މެދު އިތުބާރު އުފައްދާ އެކަމަށް ހިތްވަރު ދިނުމަށް މުހިންމު ކަމެއްކަމަށް މިހުށަހެޅުން މަޖިލީހަށް ހުށަހެޅުއްވި މެމްބަރ ޖެނިސް ރެންކަންސް ވަނީ ވިދާޅުވެފައެވެ.

1.9 މިލިއަން މީހުން ދިރިއުޅެމުން އަންނަ ލެޓްވިއާގައި މިހާތަނަށް އައިއިރު 235،765 މީހުންނަށް ވަނީ ކޮވިޑް-19 ޖެހިފައެވެ. އަދި 3،646 މީހުން ވަނީ މިހާތަނަށް އައިއިރު މިބަލީގައި މަރުވެފައެވެ.