"މިނިވަންކަމުގެ ދިފާއުގައި ދިވެހީން" މި ނަމުގައި އިދިކޮޅުން ކުރިއަށް ގެންދިޔަ ރެލީގައި ބައިވެރިވުމަށް މާލޭގައި ހަރަކާތްތެރިވާ އެކި ގްރޫޕުތަކަށްވެސް ދައުވަތު ދިންކަމަށް ރާއްޖެއެމްވީއަށް މައުލޫމާތު ލިބިއްޖެއެވެ.

މި ރެލީ ކުރިއަށް ގެންގޮސްފައިވަނީ ހުކުރު ދުވަހުގެ ހަވީރުއެވެ. އެގޮތުން ރެލީގެ ކަންކަމުގައި އިސްކޮށް އުޅުނު ފަރާތަކުން ނަން ހާމަ ނުކުރުމަށް އެދި "ރާއްޖެއެމްވީ" އަށް ކިޔާދީފައިވާ ގޮތުގައި މި ރެލީ ކަނޑައެޅިފައިވާ ވަކި މަގުތަކެއްގައި ކުރިއަށް ގެންދިއުމަށް ފުލުހުން ވަނީ ހުއްދަ ދީފައެވެ.

އަދި މި ރެލީގައި ބޭނުން ކުރުމަށް "އިންޑިއާ އައުޓް" ބެނަރ ތަކާއި، "ޑިފެންޑް މޯލްޑިވްސް" ޖަހާފައިވާ ބެނަރ ތައް ވަނީ ތައްޔާރުކޮށްފައެވެ. އަދި މި ދެ ސްލޯގަން ޖަހާފައިވާ ޓީޝާރޓުތައްވެސް ވަނީ ތައްޔާރުކޮށްފައެވެ.

އޭގެ އިތުރުން، ދިވެހިރާއްޖޭގެ ގައުމީ ދިދައާއި، ޑިފެންޑް މޯލްޑިވްސް ސްލޯގަން ޖަހާފައިވާ ދިދަވެސް މި ރެލީގައި ބޭނުން ކުރުމަށް ކުރީ ބައިގައި ތައްޔާރު ކޮށްފައިވެއެވެ. މި ހަރަކާތަކީ މި ސަރުކާރުގެ ސިޔާސަތުތަކުގެ ސަބަބުން ރާއްޖޭގެ ސިޔާދަތީ މިނިވަންކަމަށް އަސަރު ކުރަމުންދާކަމަށް ބުނެ ކުރިއަށް ގެންދާ ހަރަކާތެކެވެ.

މި ރެލީގައި ބައިވެރިވުމަށް އަތޮޅުތަކުންވެސް ބައެއް މެމްބަރުން އައިސްފައިވެއެވެ. އެގޮތުން ކ ހިންމަފުއްޓާއި ދިއްފުށިން 110 މީހަކު އަންނަ ގޮތަށް އޮތީ ހަމަޖެހިފައެވެ. އަދި މ މުލިން 50 މީހުންނާއި، ރ ދުވާފަރުން 70 މީހުންނާއި، ބ އޭދަފުށިން 60 މީހުންނާއި، އދ އަތޮޅުން 150 މީހުން ހިމެނޭ ގޮތަށް 500އާ ގާތްކުރާ އަދަދަކަށް މީހުން ގެނައުމަށް އޮތީ ވާހަކަދެކެވި މަޝްވަރާ ކުރެވިފައެވެ. ނަމަވެސް މޫސުން ގޯސްވުމުގެ ސަބަބުން އޭގެ ތެރެއިން ބައެއް ފަރާތްތަކުން ވަނީ ދަތުރު ކެންސަލް ކޮށްފައެވެ.

މީގެ ކުރިން އިދިކޮޅުން ވަނީ ހަމައެކަނި އަތޮޅު ތެރެއިންވެސް ގިނަ އަދަދަކަށް މީހުން ރެލީގައި ބައިވެރިވުމަށް އަންނާނެކަމަށް އަންދާޒާ ކޮށްފައެވެ. ނަމަވެސް އެފަހަރު ރެލީ ފަސްކުރީ މޫސުން ގޯސްވުމުގެ ސަބަބުންނެވެ. ރާއްޖެއެމްވީއަށް މައުލޫމާތު ދިން ފަރާތުން ބުނި ގޮތުގައި މޫސުން އަދިވެސް މުޅިން ރަނގަޅު ނުވާތީ ރެލީގައި ބައިވެރިވުމަށް އައުމަށް ނިންމާފައިވާ ބައެއް ފަރާތްތަކުން ވަނީ ދަތުރު ކެންސަލް ކޮށްފައެވެ. އެހެންނަމަވެސް، ކޯލިޝަނުން ވަނީ ދެހާހާ ގާތްކުރާ އަދަދަކަށް މީހުން ރެލީގައި ބައިވެރި ކުރުމަށް އަމާޒު ހިފައި، ރެލީއަށް މީހުން އިތުރު ކުރުމަށް ގިނަ މަސައްކަތްތަކެއް ކޮށްފައެވެ.

ރާއްޖެއެމްވީއަށް މައުލޫމާތު ދިން ފަރާތުން ބުނި ގޮތުގައި ރެލީގައި ބައިވެރިވުމަށް އިދިކޮޅުން ވަނީ ރާއްޖޭގެ ބައެއް ކްލަބްތަކާއި، އެންޖީއޯތަކަށް ދައުވަތު ދީފައެވެ. އަދި މާލޭގައި ހަރަކާތްތެރިވާ 6 ގްރޫޕެއްގެ މީހުން ރެލީއަށް ނެރުމަށްވެސް މަސައްކަތް ކޮށްފައިވެއެވެ. އެގޮތުން އިދިކޮޅުން ވާހަކަ ދެއްކި ބައެއް ޖަމާއަތްތަކުން ވަނީ ރެލީއަށް ތާއީދުކުރި ނަމަވެސް، އެކަމުގައި ބައިވެރިވާން ދިއުމަށް އުޒުރުވެރިވެފައެވެ.

ފަހަކަށް އައިސް އިދިކޮޅުން ކުރިއަށްގެންދާ މުޒާހަރާތަކާއި އެއްވުންތަކުގައި ގައުމީ ދިދައާއި ރަތްކުލައިގެ ޓީޝާޓް ބޭނުންކުރާއިރު، މައިގަނޑު ޝިއާރެއްގެ ގޮތުގައި ބޭނުންކުރަނީ "މިނިވަންކަމުގެ ދިފާއުގައި ދިވެހީން" މިއެވެ.

އިދިކޮޅު ކޯލިޝަނުގެ ފަރާތުން ދޭތެރެ ދޭތެރެއިން ގެންދަނީ ސިލްސިލާ މުޒާހަރާތައް ކުރަމުންނެވެ. އެކި ނަންނަމުގައި ކުރިއަށްގެންދާ މުޒާހަރާތަކުގައި މައިގަނޑު ގޮތެއްގައި ގޮވަނީ މަނީ ލޯންޑަރިންގެ ކުށް ސާބިތުވެ ޖަލު ހުކުމެއް ތަންފީޒު ކުރައްވަމުން ގެންދަވާ ކުރީގެ ރައީސް އަބްދުﷲ ޔާމީން މިނިވަން ކުރުމަށެވެ.