ހިތްނޭދޭ އެތައް ނަމަކާއި ކަމެއްގެ ތެރެއިންވެސް، އަލުން އަނބުރާ މަންޒިލް ހޯދާ ބަޔަކީ ދިވެހި ލޮބުވެތި ރައްޔިތުން
ގުޅިފައިވާ ސިޔާސީ ޕާޓީތަކުގެ މަޝްވަރާތަކުގެ ތެރެއިން
ގިނަ ޕާޓީ އެކުލެވޭ ވާދަވެރި ސިޔާސީ ނިޒާމަކީ، ހަތުރުވެރިކަމާއި އަދާވާތްތެރިކަން ނޫންކަން ދައްކަން ޖެހޭ ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ދިވެހިރާއްޖޭގެ 54 ވަނަ ޖުމްހޫރީ ދުވަހުގެ މުނާސަބަތުގައި ބާއްވާ ރަސްމީ ޖަލްސާގައި ގައުމާ މުޚާތަބުކުރައްވަމުންނެވެ. ރައީސް ވިދާޅުވީ، ހިތްނޭދޭ އެތައް ނަމަކާއި ކަމެއްގެ ތެރެއިންވެސް، އަލުން އަނބުރާ މަންޒިލް ހޯދާ ބަޔަކީ ދިވެހި ލޮބުވެތި ރައްޔިތުން ކަމަށެވެ. ފާއިތުވި 3 އަހަރު، ޖުމްހޫރިއްޔަތުގެ މަގުގައި ސަރުކާރުން ކުރާން ޖެހުނު ވަކި ޚާއްސަ ކަންތަށްތަކެއް ހުރި ކަމަށް ރައީސް ވިދާޅުވިއެވެ.
އެމަނިކުފާނުގެ ވާހަކަފުޅު ކުރިއަށް ގެންދަވަމުން ވިދާޅުވީ، ޑިމޮކްރަސީ ޢިއާދަކޮށް ހިފެހެއްޓުމުގެ މަސައްކަތް ފާއިތުވި 3 އަހަރު ކުރެއްވުނު ކަމަށެވެ. ރައީސް ވިދާޅުވީ ގިނަޕާޓީ އެކުލެވޭ ވާދަވެރި ސިޔާސީ ނިޒާމަކީ، ހަތުރުވެރިކަމާއި އަދާވާތްތެރިކަން ނޫންކަން ދައްކަން ޖެހޭ ކަމަށެވެ. އަދި އެއީ ވަކިވެ ގަތުމާއި، ބައިބައިވެ މުޖުތަމައު ރޫޅި ދިއުން ނޫންކަން ލޯތަކަށް ފެންނަން ޖެހޭ ކަމަށް ރައީސް ވިދާޅުވިއެވެ.
އެމަނިކުފާނު ވިދާޅުވީ ޑިމޮކްރަސީއެއް އެކުވެ ޝާމިލްވަނީ، މި ހުރިހާ ބައިތައް ހިމެނިގެން ކަމަށެވެ. އަދި ގަދައަޅައި ހިފަހައްޓާން ޖެހެނީ ހަމައެކަނި ގައުމިއްޔަތުގެ ބަހާތައް ކަމަށާއި، އެއީ، މާތްވެގެންވާ އިސްލާމް ދީނާއި މިނިވަންކަމާއި ސިޔާދަތާއި ތާރީޚާއި އާދަކާދައާއި ބަހާއި ސަގާފަތް ކަމަށެވެ. އެއީ ހުރަސް ނުކުރެވޭނެ ރޮނގެއް ކަމަށާއި، އެއީ ދޫނުދެވޭނެ ތަން ކަމަށް ރައީސް ވިދާޅުވިއެވެ.
